Белгілі қолөнер шебері Дәркембай Шоқпарұлының 75 жылдығына орай Есік қаласы әкімі аппаратының және музей қызметкерлерінің ұйымдастыруымен «Ұстаның ұлы аманаты» тақырыбында Есік археологиялық-өлкетану музейінде қала жастарының қатысуымен көрме өткізілді.

Рухани ордаға Ұста Дәркембай атындағы қолөнер мұражайының көшпелі көрмесі қойылды. Қонақтар қолөнер шеберінің туындыларын тамашалап, қазақтың ұлттық өнерімен жақынырақ танысты.

Көрмені музей меңгерушісі Н.Тойжанова ашып, Ұста  Дәркембай атындағы қолөнер музейінің директоры, аудандық мәслихат депутаты Д.Шоқпаров, Есік қаласы әкімінің орынбасары М.Қосжанов, Есік археологиялық-өлкетану музейінің  ардагері  Д.Ахметбаева, туризм орта-лығының жетекші маманы Ж.Мошанова сөз сөйлеп, тағылымды шараның маңызына тоқталды.

– Тәуелсіз еліміздің жас ұрпақтарының сана-сезімін отаншылдық рухта тәрбиелеу жолында музейлердің атқаратын рөлі орасан зор. Жастарымыз мұражайда тамыры терең тарихымызбен танысып қана қоймай, рухани кемелденіп, дүниетанымын кеңейтеді. Осы жолда талмай еңбек етіп жүрген өздеріңізге алғысым шексіз – деген М.Қосжанов мұражай қызметкерлеріне ризашылығын білдірді.

Қ.ДӘУКЕ,

Есік қаласы әкімі аппаратының жастар ісі жөніндегі әдіскер-нұсқаушысы