Биылғы оқу жылы оффлайн форматта басталады. Яғни, коронавирус індетінің таралуына байланысты осы уақытқа дейін үйде отырып сабақ оқыған балалар мектеп қабырғасында білім алады. Сондықтан жаңа оқу жылында балалардың көшедегі қауіпсіздігін қамтамасыз ету аса маңызды.
Осы орайда, аудан көлемінде оқушылардың кедергісіз сапалы білім алуына, жолдағы қауіпсіздігіне баса назар аударылуда. Былтырғы жылы оқу орындарының жанындағы жаяу жүргінші жолдарына оқушылардың макеттері қойылып, Есік қаласындағы саяжай маңынандағы тас жолға жерүсті өткелі салынды.
Биылғы жылы да бұл игі істер жалғасын табуда. Аудан орталығындағы мектептер маңындағы жаяу жүргіншілер жолы жаңартылып, шулы жолақтар салынды. Бұл жолақтар көлік жүргізушілеріне жаяу жүргіншілер жолына жақындағанын ескертеді.
Балалардың қауіпсіздігін қаматамасыз етуді тапсырған аудан әкімі Әлібек Жақанбаев мектептер мен балабақшалар алдындағы шулы жолақтар жұмысын білім күніне дейін аяқтау керектігін ескертті.
С.НҰРАДИН
