«...Бұл жай ғана экологиялық шара емес, терең өмірлік мәні мен маңызы бар дүние. «Жасыл ел» дегеніміз – Мәңгілік ел. Біз елімізді жапырағы қурамайтын, тамыры суалмайтын, көрген жан тамсанбай тұра алмайтын мәңгілік жасыл елге айналдыруымыз керек. Кейінгі ұрпаққа желден ық, суықтан пана, ыстықтан сая болатын мәңгілік бәйтерек тұрпатты жасыл елді табыстауымыз керек» – деген еді Елбасы Н.Назарбаев «Жасыл – Ел» бағдарламасы жайында.

Аталған бағдарлама аясында еліміз жасыл желекке айналып, елді мекендер абаттандырылуда. Жасылелдіктер елдің тек қана көгалдануы мен тазалығын сақтауға ғана емес, оған қоса біздің ортақ шаңырағымыз – Қазақстанның өркендеуіне жауапты жаңа буынын тәрбиелеп, жастарды жұмыспен қамтуға, студенттердің патриоттық рухын көтеруге үлкен үлес қосып келеді. Бұл бағдарлама еліміздің түпкір-түпкірінде қолдауға ие болып, жүйелі түрде іске асуда және оған еліміздің жастары үлкен қолдау білдіруде.

Бартоғай ауылдық округінде де жасақ мүшелері ауылдың тазалығын сақтауға, абаттандыруға мол еңбек сіңіруде. Нәтижесінде жұмыссыз жастарымыз уақытын бос өткізбей, өз ауылының санитарлық тазалығын сақтауға үлес қосып, елді мекендерді гүлдендіру жолында еңбек етуде.

Жастарға экологиялық білім беріп, оларды еңбексүйгіштікке, патриоттыққа, жинақылық пен тазалыққа тәрбиелейтін «Жасыл ел» бағдарламасының өскелең ұрпақ үшін маңызы зор болып қалмақ.

Ф.АСАНОВА,

Бартоғай ауылдық округінің

жастар ісі жөніндегі әдскер-нұсқаушысы.