Шахматты ойын дейміз. Ал, тереңірек үңілсек, шахмат – адамның ақыл-ой дамуына ықпал ететін білім. Бүгінгі жасампаздық ой таразыға тартылатын  бәсекеде ұпайдан ұтылмайтындар мен  тыңнан түрен сала алатындар нағыз шахматта шах қоя білетіндер болса керек. Сол үшін де шахмат ойыны балалардың өскелең өмір салтын қалыптастыруға бағыт сілтейді.

Өсер ұрпақты ұтымды шешім қабылдауға, ұтқыр ойға тәрбиелеу мақсатында жақында Рахат ауылдық округі №1 орта мектебінде шахмат үйі ашылды. Аталаған шахмат үйінің ашылу салтанатына мектеп директоры Бибігүл Букаева, тәрбие ісі жөндегі директордың орынбасары Мадина Серікқызы, қамқорлық кеңесінің төрайымы Қадырхан Жұмабекова және мұғалімдер  мен  ата-аналар қатысты.

Мектеп директоры Бибігүл Букаеваның  айтуынша, Алматы облысындағы   алғаш  ашылған  мектептегі шахмат үйінің  шаңырақ көтеруіне аудандық білім бөлімінің басшысы Бәтес Аманова  мен ауылдық округ әкімі Қуат Ақшабаев тікелей қолдау білдіріпті. Мектеп директорының сөзінше, көлемі 16 шаршы  метр ойын тақтасы мен салмағы 3 килограмм болатын шахмат тастарын мектептің графика жобалау және Көркем еңбек пәні мұғалімдері  құрастырған. Олар осы игі істі тәмамдау үшін алты ай тынбай еңбек етіпті.

Шараға қатысқан ата-аналар балалардың саламатты өмір салтын сақтап, ақаусыз есеюіне жол ашатын жобаның қолға алынғандығына ризашылығын білдірді. Шара барысында аудандық балалар мен жасөспірімдер спорт мектебінің  жаттықтырушысы Диларам Ходжаниязова мен дене шынықтыру пәнінің мұғалімі Ринат Асанов балаларға шахматтан шеберлік сабағын өткізді. Сонымен қоса ұзақ жыл шахматты жанына серік еткен ақсақалдар  оқушыларға ойында оңай ұпай алудың қыр-сырын үйретті. Шара соңында шахмат ойынында үздік өнер  көрсеткен оқушылар марапатталды. Сонымен бірге «Орамал тон болмайды, жол болады», дегендей жас шәкірттерге ақ  бастасын берген ақсақалдарға, арнайы келген қонақтарға сый-сияпат жасалды.

Осы ретте, мектеп директорының тәрбие ісі жөніндегі орынбасары Мадина Серікқызы: «Қазіргі  ақпараттандыру технологиясы кең дамыған кезеңде, оқушылар ауқымды мәліметтерді тез қабылдап, сараптап, логикалық  қортындылар жасай білуі қажет. Логикалық және жүйелі ойлауда шахматтың  рөлі зор. Ол оқушылардың аз уақытта ойларын шоғырландыруға, әр түрлі жағдаятты сараптауға және жүйелі шешім шығаруға үйретеді. Сонымен қоса шахмат ойнау оқушыларды алдына қойған мақсатына жетуге, төзімділікке тәрбиелейді. Бір сөзбен айтқанда шахматтың шарапаты көп. Міне, біз шахматтың осындай рөлін ескере оны арнайы пән ретінде оқытуды қолға алдық. Мектебімізде  аптасына бір сағат оқушыларға шахмат сабағы оқытылады. Бізді қолдаған, жақыннан жәрдемші болған жан-дарға алғыс айтамыз»,  – дейді.                                            

                      Ерзат АСЫЛ