Жер жүзіне жайылған аты жаман ауру өмір ағысына өз түзетулерін енгізуде. Осыған байланысты биыл оқу жылы бұрынғыдан басқаша басталды. Дегенмен, ата-аналардың өтінішімен кезекші сыныптар ашылып, бастауышта оқитын оқушылардың мектепте білім алуына рұқсат берілген еді. Өкініштісі, оқу басталған бір жарым айдың ішінде елімізде кезекші сыныпта оқитын 73 баладан коронавирус анықталды.
Олардың көпшілігі Шығыс және Солтүстік Қазақстан облыстарында оқиды. Сондай-ақ еліміздің өзге өңірлерінен 2-3 деректен тіркелген. Ал біздің аудандағы жағдай қандай?
Аудан көлемінде бүгінде барлығы 86 мектеп, 53 147 оқушы бар. Мектептердің 73-інде 987 кезекші сынып ашылған. Оларда 12 786 оқушы білім алуда. Сондай-ақ бала саны 180-ге жетпейтін мектептердің қатаң санитарлық талаптарды сақтай отырып, жұмысын дәстүрлі түрде жалғастыруына рұқсат етілген болатын. Осыған байланысты жалпы оқушы саны 164-ті құрайтын Тексенсу ауылдық округіндегі Толқын орта мектебі бүгінде толыққанды жұмыс істеп жатыр. Яғни 1-11 сынып оқушылары түгелдей мектепте білім алуда. «Ал осы кезекші сыныптардың санитарлық жағдайы қандай?» деген сұраққа Еңбекшіқазақ аудандық Тауарлар мен көрсетілетін қызметтердің сапасы мен қауіпсіздігін бақылау басқармасы басшысының орынбасары Дәурен Бақбергенұлы жауап берді.
«Барлық кезекші сыныптар ҚР Денсаулық сақтау министрінің 2017 жылғы 16 тамыздағы № 611 бұйырығына коронавирус пандемиясына байланысты биыл тамызда енгізілген талаптарға сай ұйымдастырылды. Мектептер портативті 144 пирометрмен, яғни жанаспайтын дене қызуын өлшегіш құралдармен, сондай-ақ дезинфекциялық тоннельдермен жабдықталған. Білім ошақтарында дезинфекциялық құралдардың төмендемейтін қоры жасалған. Күшейтілген санитариялық-дезинфекциялық режимде жұмыс істеп жатқан оқу орындарының қызметкерлері мен оқушылар мектеп ғимратына тек бетпердемен кіргізіледі және күнделікті жанаспайтын термометриямен таңертеңгілік сүзгіден өтеді. Әлеуметтік қашықтықты қамтамасыз ету мақсатында ғимарат алдында асфальт таңбаланған, ғимарат ішінде қашықтықты сақтау үшін сигналды белгілер жасалған, оқушылар мен қызметкерлердің қолдарын өңдеуге арналаған антисептикті санитайзерлер әр қабатта және әр сыныпта орнатылған, аяқкиім табанын дезинфекциялық кілемшелерге сүрту міндеттелген, сабақ арасындағы үзіліс кестесі әр сыныпқа әр уақытқа белгіленген, мектеп ішінде жүріп-тұру мен баспалдақпен көтерілу «біржақты қозғалыс» қағидасы бойынша арнайы көрсеткіштермен таңбаланған. Әр қабатта санитарлық бекеттер жұмысы ұйымдастырлған», – дейді Дәурен Бақбергенұлы.
Құралай МҰРАТҚЫЗЫ
