Алғыс айту күні – бұл, ең алдымен елімізде тыныштық пен үндестік, өзара сенімділік пен барлық қазақстандықтарға деген құрметтің орнығуына негіз болған  бейбітшілік пен келісім саясатының салтанатты күні. Бұл – тағдыр тәлкегімен Қазақстанға қоныс аударған түрлі этностардың миллиондаған өкілдерінің құтты қонысына айналған қасиетті қазақ жері мен қонақжай қазақ халқына деген терең тағзымның белгісі.

Сол қиын-қыстау кездерді көрген көнекөздер өмірден өткенімен жас ұрпақ өзге этностарға құшағын жайып, қонақжайлық танытқан алаш елінің қамқорлығын әлі де ұмытпаған. Индира Османова Қарасай ауылындағы Абай атындағы орта мек-тептің  9 сыныбында қазақ тілінде білім алады.

– Менің ұлтым күрд болғанымен, жаным – қазақ. Біз отбасымызбен қазақ тілінде сөйлейміз. Қазақтың салт-дәстүрін құрметтейміз, қазақ дәстүрлерін ұстанамыз. Отбасымызбен әр мерекені қазақша тойлаймыз. Менің бар байлығым – қазақ тілі деп айта аламын. Өйткені күрд халқы қиын-қыстау кезеңдерде өздерінің қолтықтарынан сүйеп, барын алдына тосып, қолдау көрсеткен қазақ халқына қарыздар. Сондай мейірімділіктің арқасында осы күнге жетіп отырмыз. Сондықтан қазақ халқының бізге жасаған жақсылығының қайтарымы ретінде оның жерін, тілін қорғап өтемін, – дейді ол.

Индира қазақ сыныбында оқып, қазақтың тілін меңгергендіктен қазақтың ақын-жазушыларының шығармаларын оқып, халқымыздың болмысын, салт-дәстүрін туыстары мен достарына насихаттайды. Мектеп қабырғасындағы жас шәкірт қазақты болмысынан адал, арамдықтан ада, жаны да, қаны да таза, ешкімді бөліп-жармайтын, алысты жақындататын, аразды татуластыратын, баршаның баласын жат деп жатырқамай, бауырына басатын керемет данышпан халық деп түсінеді.

– «Алғыс» деген сөздің мәні ерекше. Қуғын-сүргіннің құрбаны болған халықтарға жартысын жарып берген, бүтінін  бөліп берген, бауырына басқан қазақ халқына алғысым шексіз. Сол заманда бізге пана да, ана да болған қазақ халқы-ның арқасында біз уайым-қайғысыз бақытты өмір сүріп жатырмыз, қашан да қамқорлықты ұмытуға болмайды – дейді Индира Османова.

Е.АСЫЛ.