«Ұрыстан кейін шаршап, қалжыраған солдаттар дем алмастан қала ішінде жарылған бомба мен снарядтардан шыққан өртті сөндірумен болды. Осы кезде өртеніп жатқан бір үлкен үйден шырылдаған жас баланың дауысы шықты. Үлкен жүрек иесі, балажан Аманғали Сегізбаев өз басына төніп тұрған қауіп-қатерге қарамастан өртеніп жатқан үйдің ішіне кіріп кетті де, көк түтінге булығып, тұншығып жатқан екі жасар неміс қызын от-жалынның арасынан алып шықты. Бала деген кім? Ол – нәресте, ол – сәби. Ол достың да, дұшпанның да кім екенін білмейді, әлгі неміс қызы да сондай нәрестелердің бірі еді. Ол бейтаныс жауынгердің, Аманғалидің қойнына тығылып, мойнынан мықтап құшақтап алды. Аманғали оны қолына алып, екінші бір жауынгерге берді де:

– Бір қауіпсіз жерге апарып, аман сақтаңдар, – деп тапсырды. Ауыр ұрыс-тардан, әрі өрт сөндіруден шаршап-шалдыққан жауынгерлер жайғасып дем ала бастады. Осы кезде Аманғали өзінің жауынгер жолдасынан: «Жаңағы баланың жайы қалай?» деп сұрады. Бірақ ол жауап беріп үлгермеді. Қал-тарыста тығылып тұрып оқ атқан қор-қақ та зұлым жаудың оғы Аманғали Сегізбаевтың үлкен жүрегінің соғуын тоқтатты, оның тамаша өмірін үзіп кетті» –  деп жазады жазушы Бүркіт Ысқақов «От ортасынан оралмағандар» атты кітабында. Осы жолдарды оқып отырып, кеудесін жау оғына тосып, немістің сәби қызын құтқарып қалған көріністі көзге елестеткенде, Берлин қаласының Трептов паркінде орнатылған «Памят-ник воину освободителю» деген кеңес жауынгерінің скульптурасын осы Аман-ғали Сегізбаевтың тұлғасынан тұрғыз-ған ба дерсің!

Ал Бүркіт Ысқақов жазушының жазған Аманғали Сегізбаевтың соғыс-қа дейінгі бейбіт өмір жолы біздің Алматы облысының Еңбекшіқазақ ауданымен қалай қиылысты? – деген сұраққа келсек, 1928 жылы астаналық аумақта жаңадан құрылып жатқан ауданның басқару жүйесін, әсіресе ақпараттың идеологиялық салаларын құруға, шефтік көмекке өте тәжірибелі жазушы-журналист, бүгінгі «Егемен Қазақстанның» «атасы», ол кездегі «Еңбекші қазақ» газетінің жауапты қызметкері – Аманғали Сегізбаевты аттандырған екен ауданның алғашқы орталығы – Қаракемер ауылына. Арасы-на екі жыл салып ұйымдастырыл-ған жаңа ауданның жаңа баспасөзін – «Үлгілі колхоз» газетін құрып, оны басуға Одақ орталығынан қарапайым баспахана құрал-жабдықтарын ал-дыртқан да осы Аманғали Сегізбаев екенін бірнеше мәрте газет беттерінде жариялап, оқырмандарымызға ұсынған болатынбыз. Сондықтан да ғасырға жуық уақыт шығып келе жатқан «Ең-бекшіқазақ» газетінің әр жылғы шығар-машылық ұжымдары жауынгер-журналист, көптеген кітап авторы, ауданымыздың атын еліміздің бас газетінің атымен атауға атсалысқан, газеттің алғашқы нөмірлерін дайындап, таралымдауға көмектескен Аманғали Сегізбаевты пір тұтады. Ер есімі ел есінде!

Хайролла АХМЕТЖАНОВ,

ҚР Құрметті журналисі.