Мемлекет басшысының жыл сайынғы жолдауында қабылданатын реформалар көптің көңілінен шығып жататыны белгілі. Дәстүрлі түрде өтетін шарада Президент 2024 жылдың 1 қаңтарынан бастап ең төменгі жалақы мөлшерін 85 мың теңгеге көтеруді тапсырды.

Президенттің айтуынша, еңбекақының ең төменгі мөлшерін үш жыл ішінде екі есеге дейін көбейтпек. Бұл 1 миллион 800 мың адамның, оның ішінде бюджет саласында еңбек ететін 350 мың азаматтың әл-ауқатын арттыруға септігін тигізеді екен. Сонымен қатар, 2030 жылға дейін қысқа мерзімде еңбек нарығын жан-жақты дамыту үшін кешенді жоспарды Үкімет бекітуі қажет. Жаңа экономикалық саясаттың қағидалары мен басымдылықтарын нақты айқындап, алға қойған  реформаларды сапалы әрі толық  жүзеге асырудың маңыздылығын атап, бұл реформалардың сәтті орындалуы мемлекеттік қызметшілердің біліктілігі мен ерік-жігеріне тікелей байланысты болатынын  айтты.

– Реформалардың іске асырылуына негізінен атқарушы билік жауап береді. Сондықтан, ең алдымен оның өзін өзгерту қажет, – деді Қасым-Жомарт Тоқаев.

Осы саладағы реформаның басты үш бағытын атап шықты. Оның ішінде нақты салаларға қатысты шешімдерді әзірлеу және орындау міндеті мен жауапкершілік толығымен министрлерге жүктеледі. Екіншіден, экономикалық саясаттың іске асырылуына Үкімет толығымен жауап беретінін айтса, үшінші, Президент Әкімшілігі басты «саяси штаб» ретінде мемлекетті әлеуметтік-экономикалық дамытудың стратегиялық бағыттарына, ішкі және сыртқы саясат, қорғаныс және қауіпсіздік, құқық және кадр саясаты мәселелеріне барлық күш-жігерін жұмылдыратынын айтты.

Перизат ӘБДІЛ-ӘШІМ,

журналист.