1941 жылы 22 маусымда фашистік Германия Кеңес Одағына соғыс ашты. Бұл соғыс Қазақстандағы әрбір отбасын шарпыған алау өртке ұласқаны аян.
Менің атам - Күлембаев Серікбай 1918 жылы Жамбыл облысы Шу ауданында дүниеге келген. Әлгі айтылған алау өрттің аласапыранында қолына қару алып жау бетін тойтару жолында шейіт болған. Ол 1939 жылы әскер қатарына шақырылып, Нижний-Новгород қаласындағы атты әскер сапында 3 жыл Отан алдындағы борышын өтеген. Еліне қайту мерзімі таяған тұста соғыс басталады да, көппен бірге соғысқа аттанған.
1943 жылы атамнан хат келеді. Онда: «Екі мың сарбаз тойға дайындалып жатырмыз»,-делінген екен. Той дегені – соғыс та, дайындалып жатырмыз дегені – оқу-жаттығу жиындары болса керек.Осы хат атам соғыстан жазған соңғы хат болған. Қара қағаз келген кемегені белгісіз, бәлкім қара қағаздың келенін әжемізден жасырып қалса керек. Қасық қаны қалғанша Отан үшін жан қиған аталарымыздың алдында басымды иіп, тағзым етемін. Ер есімі ел есінде!
Ғазиза ЕРЛАНҚЫЗЫ,
Әл-Фараби атындағы орта мектептің 4 «А» сынып оқушысы,
Бәйтерек ауылы
Сонау орта ғасырларда елі мен жерін жау найзасынан қорғаған Қарахан есімді батыр өмір сүрген екен. Талай алыпты тағынан түсіріп, қарсыласының алдында тайсалмаған Қарахан батыр қас жауының қызына ғашық болады. Көп ұзамай қыз әкесінің бұл некеге қарсы болатынын білген соң сүйгенін алып қашуға бел буады.
Екі жастың қол ұстасып қашып кеткенін білген әкесі сарбаздарына оларды өлтіруді бұйырады. Қуған нөкерлерден қашамыз деп ғашықтар ұзақ жол жүреді. Арада біраз уақыт өткен соң тоқтаусыз шапқылай беруден шаршаған ару Асу атты өзеннің жағасында аялдауды ұсынады. Хан жарлығын бұлжытпай орындауды жөн көрген сарбаздар Қарахан мен Айша бибіні көре салысымен қыздың сәукелесіне жылан салып қояды. Бақыттың құшағында жүрген ғашықтар мұны байқамай қалады. Жылы суға рахаттанып түсіп шығып, Айша бибі киіне бастайды. Ақырында сәукелесін кие берген кезде жылан шағып алады. Осы сәтте ғашығының қолында мерт болып бара жатқанын көрген Қарахан алай-дүлей күйге түсіп, мына өмірден баз кешеді. «Бұл жалғанда бірге болу бұйырмаса да, о дүниеде жұбымыз жазылмасын» деп сүйгенін жақын маңдағы молдаға алып барады. Жас жігіттің Мәжнүндей қайысқанын көрген молда ғашықтарға батасын беріп, некесін қияды. Бейкүнә екі жастың отбасылық бақыты небары бірнеше минутқа созылады.
Даналардың «Шын ғашықтар қосылмайды» деген сөзі бекер айтылмаса керек. Ешбір жауының алдында иілмеген батыр тағдырдың алдында бас иіп, Айша бибі қайтыс болған жерге мазар тұрғызады. Қарахан батыр сүйгенінің жанында болу үшін Айша бибінің қасынан өзіне де мазар салдырады. Өмірінің соңына дейін ақ киім киіп, Айша бибі мазарында түнейді. Жаратқанға жалбарынып, кешірім сұрайды. Осы адалдығы үшін халық оны есінде сақтаған. Ал бұл жер «Әулие ата» деп аталып кеткен.
Айша бибі кесенесі ХІІ ғасырда Жамбыл облысы Жамбыл ауданында Тараз қаласынан 18 шақырым жерде тұрғызылды. Қазір мемлекеттік дәрежедегі архитектуралық ескерткіш. Кесенені өңдеу үшін Қазақстанның ертеректегі андрон, сақ тайпаларының геометриялық, зооморфты мотиві бар ою-өрнектері пайдаланылған. Төрт бұрышында батпан тіреуіші бар. Оның қалай салынғандығы жайлы тарихта нақты деректер жоқ. Алайда, халқымызда Айша бибінің сүйген жігітіне деген махаббатын баяндайтын аңыз бар. Ол аңыздың 28 нұсқасы сақталған. Жоғарыда сол аңыздың 1 нұсқасы келтірілді. Алғаш Айша бибі кесенесін 1893 жылы орыс археологы Василий Бартольд зерттеген. 2002 жылы кесене мен оның айналасындағы саябақты ретке келтіру жұмыстарын жүргізу үшін Нишан Рамето сайланған.
Кесененің жалпы көлемі – 7,6 х 7,6 метр. Кіру есігі шығыс бөлігінде орналасқан. Ал керегесі – 80 сантиметр, қалыңдықтағы – 3 қабаттан құралған. Бұдан өзге кірпішінде 60 түрлі ою-өрнек түрлі пайдаланылған.
Дайындаған: Қарлыға Бүйенбай
Осы аптада Есік қаласының орталығындағы базарларда әкімдік өкілдері рейд жұмыстарын жүргізіп, карантин кезінде заңсыз жұмыс істеп жатқан сауда орындарының иелеріне түсіндіру жұмыстарын жүргізді.
Аудандық кәсіпкерлік бөлімінің басшысы Нұрболат Серғали, қала әкімінің міндетін атқарушы Досжан Сейдахмет, учаскелік полиция қызметкерлері Фрунзе және Тіккелдиев көшелерінде орналасқан сауда орындарын аралады. Карантинге байланысты рұқсат етілмесе де, саудасын жүргізіп отырған кәсіпкерлерге ескерту жасалды. Облыстың бас санитар дәрігерінің шешіміне сәйкес базарлардың жұмысына әлі рұқсат етілмегенін түсіндірді.
С.НҰРАДИН
Қазақстан Республикасының Президенті Қасым-Жомарт Тоқаевтың Төтенше жағдай режимін қамтамасыз ету жөніндегі мемлекеттік комиссия отырысында берген тапсырмаларымен Еңбекшіқазақ ауданаралық көп салалы ауруханасының ұжымы мұқият таныстық.
Әсіресе, денсаулық саласына қатысты нақты шешім біз үшін үлкен қолдау болып табылады. Биологиялық қауіпсіздік жөніндегі кеңестің құрылуы, санитарлық-эпидемиологиялық қызметті күшейту, медициналық мекемелерді жаңа технологиялық жабдықтармен толық жабдықтау және ең маңыздысы медициналық қызметкерлердің құзыретін арттыру біз үшін үлкен мәртебе әрі нақты бағыт-бағдар. Ауданымыздың медицина қызметкерлері өз тарапынан халық денсаулығын қорғау үшін бар күшін салып, қазіргі қиын кезеңде бір жағадан бас, бір жеңнен қол шығарып, сынақтан сүрінбей өтетінімізге бек сенемін. Біз әрдайым біргеміз!
Диана СУЛЕЙМАНОВА,
Еңбекшіқазақ ауданаралық көпсалалы ауруханасы
директорының сапа жөніндегі орынбасары
Президент Қасым-Жомарт Тоқаевтың тапсырмасы бойынша Тұрғын үй құрылыс жинақ банкі «Нұрлы жер» бағдарламасының жаңа бағытын әзірлеуді бастап кетті.
Жаңа қанатқақты жоба 5-10-20 шарты бойынша тұрғын үй сатып алу үшін азаматтарды несиелендіруді қарастырады:
– несие мөлшерлемесі 5%;
– бастапқы жарна 10%-дан бастап;
– несиелендіру мерзімі – 20 жылға дейін.
«5-10-20» пилот жобасына тұрғын үйге мұқтаж ретінде жергілікті атқарушы органдарда есепте тұрған азаматтар қатыса алады. Баспананы «Нұрлы жер» бағдарламасының аясында салынған жаңа тұрғын үй кешендерінен де, жеке құрылыс салушылардан да сатып алуға болады. Қазір жобаның шарттары талқыланып жатыр және мына параметрлер ұсынылуда:
– Нұр-Сұлтан, Алматы және осы қалалардың маңындағы аймақтар үшін 18 млн аспайды;
– Атырау, Ақтау, Ақтөбе, Түркістан және Қарағанды облыстары, сондай-ақ Шымкент қаласы үшін 15 млн теңгеден аспайды;
– басқа аймақтар үшін 12 млн теңгеден аспайды.
Әкімдіктер салған несие тұрғын үй бойынша 1 шаршы метр бойынша мынадай баға параметрлері белгіленген:
240 мың теңгеге дейін – Алматы қаласында;
220 мың теңгеге дейін – Нұр-Сұлтанда және осы қала маңындағы аймақта;
200 мың теңгеге дейін – Шымкент қаласында және Алматы маңындағы аймақта;
180 мың теңгеге дейін – Ақтөбе, Атырау, Ақтау, Түркістан және Қарағанды облыстарында;
160 мың теңгеге дейін – басқа аймақтарда.
«5-10-20» пилот жобасы халықты тұрғын үймен қамтамасыз етуге арналған қосымша шара ретінде әзірленіп жатыр.
«Президент Қ.Тоқаев атап өткендей, Тұрғын үй құрылыс жинақ банкі базасында жыл соңына дейін даму және қолдаудың «Отбасы банкі» атты толыққанды институты құрылады. Ол тұрғын үйді есепке алу, тіркеу және бөлістіруді бір орталықтан атқаратын болады. Қойылып отырған міндетті орындау үшін қазіргі кезек жүйесін әкімдіктерден «Отбасы банкке» беру жоспарланып отыр. Өз кезегінде «Отбасы банкі» баспанасы жоқ жанұялар үшін «бір терезе» қағидаты бойынша қызмет ұсынатын болады», – деп атап өтті Тұрғын үй құрылыс жинақ банкі басқарма төрайымы Ләззат Ибрагимова.
Тұрғын үй қолжетімділігі сатысы белсенді түрде ендіріледі. Бір мүше үшін бір КМ-нан (күнкөріс минимумы) төмен табыс табатын отбасылар үшін сатып алу құқығынсыз үйді жалға алу мүмкіндігі ұсынылады. 2 КМ-на дейін табысқа ие баспанасыз отбасылар (көпбалалы, толық емес және мүмкіндігі шектеулі балаларды асырап отырған отбасылар) «Бақытты Отбасы» бағдарламасына, ал 3,1 КМ-на дейін табысқа ие баспанасыз отбасылар «5-10-20» пилот жобасына қатыса алады.
ИИДМ ұсынған 2020 жылдың 1 қаңтарындағы мәліметтер бойынша, жергілікті атқарушы органдарда 540 мыңнан астам адам кезекте тұр. Оның ішінде:
– мемлекеттік қызметкерлер, бюджет ұйымдар қызметкерлері – 212,5 мың адам;
– толық емес отбасылар – 120,5 мың адам;
– ата-анасыз балалар – 60,8 мың адам;
– 1 және 2-топтағы мүгедектер – 43,5 мың адам;
– мүмкіндігі шектеулі бала тәрбиелеп отырған отбасылар – 21,1 мың адам;
– зейнеткерлер – 18 мың адам; – басқа санаттар – 16 мың адам.
«Талдықорған обаға қарсы күрес станциясы» ҚР ДСМ «М.Айқымбаев атындағы аса қауіпті инфекциялар ұлттық ғылыми орталығы» ШЖҚ РМК филиалы індетпен күресуде ауқымды жұмыс атқаруда.
Қытай Халық Республикасынан тараған «аты жаман» кеселдің таралуынан бастап, станция қызметкерлері Қазақстан Республикасында аурудың алдын-алуға және таратпауға барын салуда.
Мамандар Қытаймен шекаралас СБП-де жұмыс істеп жатыр. Медицина мамандарды даярлықтарын пысықтап, өткізу пунктерінде қызмет жасап жүр. Сондай-ақ, дезинфекциялық шараларды жүргізіп,халық арасында санитарлық-ағарту жұмыстарын өткізіп жүр.
COVID-19 пандемиясымен күресуде жедел және сапалы диагноз қажет дейді мамандар. Бұл жерде ПТР диагностикасы жетекші рөлге ие.
«М.Айқымбаев атындағы аса қауіпті инфекциялар ұлттық ғылыми орталығы» ШЖҚ РМК «Талдықорған обаға қарсы күрес станциясы»филиалы Алматы облысында Талдықорған қаласында орналасқан және Қарасай ауданында орналасқан екі ПТР зертханасын ұйымдастырды.Зерттеулер ҚХР тест- жүйелерін қолдана отырып жүргізіле бастады, қазіргі таңда «М.Айқымбаев атындағы аса қауіпті инфекциялар ұлттық ғылыми орталығы» ШЖҚ РМК өндірген тест – жүйелер жұмысқа берілді. Бұл тест- жүйелері сынақтан сәтті өтті және орталық референс- зертхана жұмысында қолданылады»,- деді Алмас Тоқтамысұлы.
Қазіргі таңда жаппай тест жүргізу өзекті болып тұр. Сол мақсатпен Алматы облысында тест жүргізуге жататын контингенті анықталды. Оған медициналық қызметкерлер, блокпостарда жұмыс істейтін күш құрылымдары, әкімдік жұмысшылары, әлеуметтік нысан тұрғындары мен қызметкерлері және тағы басқа тұлғалар кіреді.
1992 жылдың мамыр айы еді. Бір шаруамен Өскемен қаласына барып, сондағы «Өскемен» қонақ үйіне табан тіредік. Кештетіп далаға шықсақ, қонақ үйдің маңайы толған сақшы-қосшылар. «Не болды?» десек, біз жатқан мәртебелі қонақ үйге Түркиядан аса қадірлі мейман келіп түсіпті. Мына шапқын сол адамның «қамы» көрінеді. Бопты, дедік те, өз жайымызға кеттік... Қонысымызға қайта оралсақ манағы даладағы дүрлігіс біз жатқан қабатқа көшіпті. Сақшы-қосшылар осында жүр. Себебі, қадірлі қонақ бізбен көрші бөлмеде екен.
Бастабында, қызметтік-іскерлік шаруамен жүрген көп түріктің бірі шығар деп аса мән бермедік. Десе де, пендеауи қызығушылық қалған ба, қадірлі қонақты бір көрмекке ынтамыз ауып, ақырын барып барлай-шолып байқасақ... о, жасаған, күллі жұрт түрік деп дүрлігіп жүрген қонақ кәдімгі өзіміздің Халифа Алтай атамыз екен. Жарықтық көзіме оттай басылды. Бір көруге арман боп жүрген ардақты қарияның кездескен жерін қарамайсыз ба!? «Ассалаумағалейкумді» азандата созып, иіліп барып атаның ыстық алақанын қос қолдап қымқыра ұстадым. Атамыз бәсең дауыспен сәлемімді алды. Шүйдесі еңкіш тартқан жұқалтаң адам екен «бұл кім болды» дегендей, бетіме бажайлап қарап алды да, үнсіз отыра берді.
Қасында жары Бәтіш апа (Бибәтіш Жүнісқызы) бар екен. Қайта апамыз: «Төрлет, қарағам, қайдан жүрсің?» деп, қазақы әдетпен жөн сұрай қалғаны. Маған да осы сұрақ керек еді... Қайда туып, қайдан келгенімді айтып сарнадым кеп. Атамыз үнсіз тыңдап отыр. Бір кезде бұрылып қарады. – Жөн, қарағым, Қобда бетінің қазағы екенсің ғой... – деп әңгіме ауанын өзі кеңітіп, ана-мынаны сұрап... әңгіменің көші түзелгендей болғаны. Мен де қарап қалмай, ақсақалдың бұл қалаға неге келгенін сұрадым. Жарықтық көпті көрген көрік кеудесін бір көтеріп қойып, шанағы кепкен көне домбыраның үніндей қоңыр дауысымен сөз бастады. Менің түсінгенім: атамызды бала кезінде оқытқан руы найман-сарыжомарт ұстазы болған екен. Сол кісі 1960-шы жылдары арғы беттен осы жаққа өтіпті. Соны іздеп келген беті. Тірі болса көзін көріп батасын алмақ, жоқ болса үрім-бұтағын тауып батасын бермек.
Осы мәселе бойынша ертеңінде атам екеуміз іздеуді бастадық. Алдымен облыстық «Дидар» газетінің редакциясына бардық. Ол жерде қаланың зиялы қауым өкілдері жиналып күтіп отыр екен. Барлығымыз фотоға түстік (суретте). Ақсақал ұстазының дерегін де тапты. Ертеректе Күршім жаққа қайтыс бопты. Кейін жарықтық сол ұстазының немере қызын әдейі Алматыға алдырып, өзінің үйінде тұрғызып, оқуын аяқтатты. Өз басым әлі күнге дейін осы оқиғаны есіме аламын. Ұстазға деген неткен құрмет, неткен адалдық...
Күн бесін ауғанда атаммен бірге қоналқы орынға келіп жайғастық. Бұл кісілер таңмен таласа жолға шықпақшы. Содан қарап отырмай әңгіме өрбіттім. Бір жыл бұрын от орнымнан ұшып атажұртқа қоныс тепкенімді айта келіп, тұрмыстық жағдайдың онша болмай тұрғанын, «атамекен деп аңсап жеткенде...» өзімше іштегі шер-шеменді төгіп жатырмын. Атам жарықтық үңіліп бетіме қарады (бұл не айтып кетті дегендей). Орыннан тұрып келіп қарсы алдыма отырды. – Қарағым, - деді. – Сен бақытты адамсың, мен сияқты жер әлемді шырқ айналып, тісі барға тістетіп, азуы барға алдырып, арман болған атамекенге зорға жетіп отырған жоқсың. Мені тыңда, шырағым, 1930-жылдары Алтайдан ауа көшіп Гансу өлкесіне келгенде біз 18000 адам едік. Осылардан 5000 адам Тибетке тірі өттік. 1941 жылы Үндістанға 3000 адам өтіп, 1942 жылы осыдан 1000 адам ғана тірі қалдық. Ақсақал осыны айтып, терең күрсінді. Өткен өмірі, бастан кешкен қиын күндері елес берсе керек. Үнсіз қалды. Аздан соң еңсесін қайта тіктеп алып:
– 1941 жылдың күзінде босып жүріп Үндістанның Мұзапар-Абат қаласына зорға жетік. Қаланың айналасын қалың қарағайлы тау қоршаған. Біз өзеннің бергі шетіне шатыр тігіп орналастық. Күнде жаңбыр. Су тамшылары баспанамыздан өтіп, көрпе-жастық, киім-кешек түгел көгеріп кетті. Алды иістеніп шіри бастады. «Жұт жеті ағайды» дегендей, ұзақ жауған жаңбырдың салдары ма, жаппай ауру-дертке ұшырадық. Аурудың сырын ешкім білмейді. Көп адамдар есінен ауысып жынданып кетті. Біреулердің бет-аузы ісіп, тұлабойына жара қаптап, тіпті тірідей тістері шіріп кеткендер қаншама. Күн сайын оншақты адам ажал құшады. Өлген адамдарымызды қалалық зиратқа немесе қоныс сыртына жерлетпейді, ұлықсат жоқ. Шатырдың сыртында қарулы әскери күзет. Амалсыз өлген адамдарды шатырлардың арасындағы бос жерлерге көміп, өзіміз олардың зиратын жастанып, өлгендермен бірге өмір сүрдік. Бітіретін жұмысымыз күні бойы тек зират қазу. Мүлде түтіні өшіп қалған отбасылар да болды... Осылай Үндістан мен Пәкістанда 12 жыл тұрдық. Ешкім бізді азаматтыққа қабылдамады. Жанымызды жалдап күн көрдік. Ел бөтен, жер бөтен, салт бөтен елде өмір сүрудің қиынын бастан өткердік. Алғаш барған алты жылда әйел затының жатыры шошынып, бірде-бір нәресте дүниеге келмеді. Егер бір жаққа көшпегенде сол күйі тұқым-тұяғымыз құрып жоғалар еді... Шырағым, құдай берген құтты шаңырағыңа реніш айтушы болма! Қазіргі азаттықтың қадірін білмесең, ешқашан ел болмайсың, балам! Тыныштық бар жерде бақ тұрады, деп аталық өсиетін айтты.
*****
Атамның бұл әңгімесі сол кезде қатты әсер етті деп айта алмаймын. Бірақ, бір үтірін қалдырмай жазып алыппын (қолжазба әлі сақтаулы). Бірақ бұл сөз көкейімде әрқашан жаңғырып жүрді. Кейін, тіпті бертінде түсінгендей болдым. Атам жарықтық азаттықтың не екенін, басында өзінің жеке шаңырағы бар тәуелсіз мемлекет болудың қадірі қанша қымбат екенін, терең де, толық түсінген һәм соны өмір бойы аңсаған жан екен. Сондықтан да қазақ елінің амандығын тілеп, көзі жұмылғанға дейін ел-жұртты жақсылыққа шақырудан таймады.
Сонау 1992 жылы табанының ізі қалған Өскеменде бертінде сән-салтанаты келіскен мешіт тұрғызылды. Сол мешітке оқымысты діндар, ағартушы, халықаралық «Алаш» әдеби сыйлығының тұңғыш лаураеты Халифа Алтайдың есімі берілді. Қазақ айтатын: «Жақсының аты, ғалымның хаты қалады» деген осы шығар.
Кешегі Президент Қасым-Жомарт Тоқаевтың жасаған мәлімдесінен кейін Алматы облысының бас мемлекеттік санитариялық дәрігері жаңа қаулы қабылдады.
«Алматы облысының аумағында үшінші сатыны іске асыру кезеңінде карантин және карантиндік шараларды босаңсыту туралы» қаулыда карантин шараларын жеңілдету шарттары белгіленген.
Қаулыға сәйкес көршілес облыстармен шекараларда блок-посттар, аудандар мен қалалар арасында мобильді посттар жұмысы жалғасады.
Сол сияқты санитарлық-дезинфекциялық талаптарды қатаң сақтай отырып, өз жұмысын бастайтын нысандардың тізімі кеңейтілді.
Бұл қатарда алаңы 500 шаршы метрден аспайтын азық-түліктік емес дүкендер, автобөлшектер, құрылыс материалдарын сататын, тұрмыстық химия, тұрмыстық техника сататын сауда орындары бар.
Сонымен қатар күшейтілген санитариялық-дезинфекциялық режимді сақтай отырып ұзақ және тығыз қатынасты болдырмайтын нысандар, құрылыс дүкендері, саяжай құралдарын тарататын дүкендер, оптика (дүкендер), фотосалондар, гүл сататын дүкендер, зоодүкендер, техникалық қызмет көрсету станциялары, автожуу, шиномонтаж, автосалондар, алдын ала жазылу бойынша медициналық бетперде киген келушілерге қызмет көрсететін сұлулық салондары, шаштараздар, бизнес орталықтары (сақтандыру компаниялары, адвокаттың, нотариустың, бухгалтердің және консалтингтің қызметтері, жылжымайтын мүлік жөніндегі агенттіктер, жарнама агенттіктері, сот орындаушылары және т.б) да жұмысына кіріседі.
• 30 адамға дейін қатысатын жеке және топтық дайындық жасайтын мәдениет нысандары да іске кіріседі.
• Типографиялық қызметтер, тігін ательелері, аяқ киім жөндеу, химиялық тазалау, кір жуу және сол сияқты тұрмыстық және электрондық техниканы жөндеу қызметтері кешкі сағат 17:00-ге дейін ашық болады.
• Әуежайлар, халыққа қызмет көрсету орындары да жұмысын бастайды.
• Сол сияқты сағат 10.00-ден бастап 15.00-ге дейін банктік емес ақша айырбастау пункттері де есігін қайта ашады.
• Қоғамдық көлік сағат 07.00-ден 19.00-ге дейін жүреді, бұл ретте қоғамдық көліктің толымдылығы отыратын орындардың санынан артық болмауы тиіс.
• Қаулы күшіне енді. Барлық санитарлық-дезинфекциялық шараларды қатаң сақтау талабы сақталады.
Күні кеше Президент Қасым-Жомарт Тоқаев ел аумағында төтенше жағдай режимінің алынып тасталғаны жөнінде хабарлады. Дегенмен, бірқатар аймақта карантин шаралары сақталатын болады. Оның ішінде Алматы облысы да бар. Карантин уақыты мамыр айының соңына дейін созылады деп күтілуде.
ТЖ кезінде Алматы облысы бойынша арнайы штаб тәулік бойы қызмет атқарды. Олар күніне 500 электронды түрде өтінім мен 100 қоңырау қабылдап отырды. Сонымен қатар, Call- орталықта елмен етене қызмет жасады. Ондағы мамандар әлеуметтік сауалдарға жауап беріп отырды. Осы күнге дейін 6 мың сұрақ келіп түскен. Барлығына тұшымды жауап қайтарылған.
Қасым-Жомарт Кемелұлының тапсырмасымен ТЖ кезеңінде табысынан айырылған адамдарға әлеуметтік төлем тағайындалған еді. Алматы облысы бойынша аталған көмекке 658 мың адам қол жеткізген. Ал, тегін азық-түлік жиынтықтары 11 мың адамға таратылған. Ол үшін жалпы сомасы 618 млн. теңге қаражат игерілген.
« Біз біргеміз» қоғамдық қоры да халықтың осал топтарына көмек қолын созуда. Облыс орталығының 10-ға жуық тұрғыны аталған қордан 50 мың теңге жәрдемақы алған. Игі іске 497 млн. теңге қаржы қарастырылған. Одан өзге « Біргеміз Жетісу» облыстық қоғамдық қордан 985 отбасына материалдық көмек көрсетілген. Саупты амал жолында 9,5 млн. теңге жаратылған.
5 мамырдан бастап облыста карантин режимін кезең-кезеңімен жеңілдету басталған болатын. Қазір үшінші кезеңі жүзеге асуда. 8 сәуірден бері бірқатар кәсіпорындар жұмысына кіріскен. Соның арқасында Алматы облысының 75 мың тұрғыны жұмыстарына қайта оралды.
Алдағы уақытта Алматы облысының бас мемлекеттік санитарлық дәрігерінің қаулысына сәйкес, ХҚКО, қоғамыдық көліктер, бизнес орталықтары, сақтандыру компаниялары, жылжымайтын мүлік агенттіктері, аумағы 500 метірден аспайтын азық-түлік дүкендері жұмысқа кіріседі.
Сондай-ақ, мәдениет саласының іс-шараларға дайындалуына рұқсат етілген. Тек адам саны 30-дан аспауы тиіс. Бұл санатқа, шеберхана, баспа үйі, тігін шеберханасы, аяқ киім жөндеу орындары да кіреді.
Айта кетер басты жаңалықтың бірі, әуежайда әуе көлігі тасымалы іске кірісті.
ТЖ режмі енгізілгеннен күннен облыс аумағында 12 бекет жұмыс жасаған. Оның 4-і тұрақты. Яғни, карантин аяқталғанша жұмысын жаслғасырады.
Осы екі айдың ішінде қалаға 301 мың көлік пен 627 мың адам кірген. Карантин шараларын сақтамаған жағдайдар тіркеліп, 300-ге жуық хаттама толтырылған. Барлығы 6 млн. 250 мың айыппұл салынған.
Баршаны алаңдатып отырғаны білім саласындағы өзгерістер. Оқушылардың қашықтықтан оқу жүйесіне ауысқаны сол еді, ел соңғы қоңырау салтанаты мен ҰБТ жайы туралы сұрап әлек.
Алматы облысы әкімінің орынбасары Батыржан Байжұмановтың айтуынша, ҰБТ уақыты өзгеріссіз қалады. Демек, жылдағыдай 20 маусым мен 5 шілде аралығында түлектер сынақ тапсырады.
Биылғы жылы облыста 15 мың 122 оқушы мектептен түлеп ұшқалы тұр. Соның ішінде 11 мыңы ҰБТ –ден өтеді екен. Ал, мектеп бітіру кеші 3-4 маусым аралығында өтетін болады.
Қызметтеріне кіріскен өндіріс орындары мен өзге де нысандардың санитарлық талаптарды сақталауына басым назар аударылады. Егер аталған талаптар сақталмаған жағдайда әкімшілік жауапкершілікке тартылып, бірнеше тәулікке қамауға алынуы мүмкін.
Жұмыссыздық – қоғам дерті. Ал оның алдын алу мақсатында ілкімді істерді атқару – мемлекеттің ерекше назарында. Мәсе-лен, «Жұмыспен қамту жол картасы-2020» шеңберінде Алматы облысына 109,2 млрд теңге бөлінгенін, нәтижесінде 977 инфрақұрылымдық жобалар іске асатынын аймақтық БАҚ-тар жарыса жазуда. Бұл біріншіден, жаңаруға бастаса, екіншіден, жұмыссыздықтың алдын алуға жарқын жол ашты. Себебі, жобаны ұтып алған мердігер жұмыскерлерінің кем дегенде 50 пайызын сол құрылыс жүргізілетін өңірдің тұрғындарын тартуы тиіс. Ал ауданымызда бағдарлама шеңберінде нендей өзгеріс?
Бүгінде аудандық экономика және бюджеттік жос-парлау бөлімінің мәліметіне сүйенсек, аталмыш жоба аясында ауданымызға 11 млрд 513 млн теңге бөлінген. Оның ішінде айшықтап айтарымыз, жуырда Есікте 1500 орындық мектеп құрылысы басталмақ. Сол секілді Көктөбеге жаңа амбулатория салынады. 8 әлеуметтік нысанға күрделі жөндеу жұмыстары жүргізіледі. Оның ішінде Т.Молдағалиев атындағы және Көлді мәдениет үйі бар. Сол сеіклді Бижанов ауылындағы спорт кешені жаңғыртылады деп жоспарлануда.
Инфрақұрылымдық жобалар да жүйеленбек. Нақтыласақ, 46 жоба жол жөндеу бағытында. Онда аудан аумағында 22,2 шақырым жол орташа жөндеуден өтсе, 21,6 шақырым жол жиегі жаңармақ. Әрі 27 ауылда ауылішілік көшелер ағымды жөндеуден өтпек. Ең бас-тысы, үш жылға жоспарланған Есік топтық су жүйесі биыл басталмақ. Оған аталмыш бағдарлама аясында 1 млрд 2 млн 32 мың теңге бөлінді.
Сатай, Қызылшарық, Лавар, Шелек, Құлжа ауылының орталық көшелерін жарықтандыруға да тиісті қаржы қарастырылып отыр. Әрі 26 млн теңгеге Ащысайдағы саябақ абаттандырылады.
Бәрін айт та бірін айт, қазіргі қысылтаяң сәтке қарамай жасалып жатқан мемлекет қамқорлығы көңілге қуаныш ұялатады. Жоғарыда атағанымыздай, біріншіден әлеуметтік түйткілдер түйіні тарқатылса, екіншіден, жұмыссыздыққа тосқауыл болмақ. Яғни, қомақты қаражатқа аудан бойынша 106 жоба іске асырылмақ.
Қайнар ЖҰМАҒОЖА
Бар әлемді уысында ұстап отырған коронавирустық инфекцияның зардабы дүниені дүрліктіріп тұр. Сол үшін де елімізде республика бойынша алғаш рет төтенше жағдай енгізіліп отыр. Қауіпсіздік сақтау мақсатында үйден шықпаймыз.
Мемлекет өз тарапынан әлеуметтік ахуалды жақсарту үшін уақытша жұмыссыз қалғандарға, әр топтағы адамдарға қаржылық көмек беріп, жағдайларын жасауда. Осы кезде байқағанымыз, адамдардың өзара қарым-қатынасы өзгере бастаған сияқты. Бір-бірін қолдап, көмек беруге ықыластары мен қамқоршылық сезімдері арта түскенін аңғарып жүрміз. Бұл сөзіме нақты мысал да келтіргім келіп отыр.
Бізде «Береке» кооперативінің тұрғындары қазір оқшаулану тәртібін сақтаудамыз. Әрине, елмен бірдей бізде де қиындықтар болып тұр. Осы сәтте кооператив төрағасы Ә. Аңсатбаевтың ұйымдастыруымен «Біз біргеміз» акциясы біздің саяжайда да өтті. Алматы қаласындағы Рой Клубтың бас директоры Асхат Жакиевтің бастамасымен рамазан айы қарсаңында азық-түлік салынған қораптар келді. Оны волонтерлер кооперативте тұратын аз қамтылған 65отбасы мен мүгедек жандарға таратып берді. Уақытша жұмыссыз қалған жағдайы төмен отбасыларын да қамтыды. Өз кезегінде кооператив тұрғындары алғысын білдірді.
Елге жақсылық жасап жүрген осынау Рой Клубтың жұмысы алға басып, кәсіптері берекелі болсын демекпіз. Барлық сынақтардан бірлігіміздің арқасында шығатын халқымыз осы індетті де бірлесіп жеңетініміз сөзсіз. Бірлік – елдіктің басты кепілі. Бірлік пен береке барда еліміз өркендеп, ілгері баса береді. Жұдырықтай жұмылып, бір болайық, ағайын. Рамазан айы құтты болсын. Әр отбасына береке-бірлік тілеймін.
С. Жолдыбаев,
Береке саяжайының тұрғыны
Ауданымыз – ауылшаруашылығына оңтайлы құнарлы қою топырағымен, төскейі төрт түлікті емін-еркін өргізуге қолайлы жайқалған жайылымымен қашаннан ырыстың қайнар көзі. Тек көкейде бұл ырысты көсіп алуға ынта болса жеткілікті. Шаруалардың бұл ынтасын қолдау мақсатында мемлекет тарапынан да түрлі бағдарламалар белгіленген. Айталық, «Сыбаға» бағдарламасы. Етті әрі асыл тұқымды мал басын өсіруге бағытталған бағдарлама аясында аудан шаруалары бүгінде жеңілдетілген несие алып, несібе айыруда.
Сөзіміздің дәлелі – Қаракемер ауылдық округіне қарасты Талдыбұлақ ауылындағы «Иманбаева Ш.Ш» шаруа қожалығы.
Аталған шаруа қожалығы 2019 жылы «Сыбаға» бағдарламасымен 61 млн 250 мың теңге жылдық 4% жеңілдетілген несие алған. Ресейдің таулы Алтай аймағынан әкелінген 100 бас қазақтың ақбас асыл тұқымды аналық мал (сиырлар) бүгінде төлдеп жатыр. Шаруа қожалығының меңгерушісі Берік Қазыбайұлы «Сыбаға» бағдарламасымен жеңілдетілген несие рәсімдеу үшін қожалық тарапынан үлкен дайындық қажет екендігін жеткізді. Ол үшін асыл тұқымды малдың ерекше күтімін қамтамасыз ететін қора-жайы және жайылымынан бөлек, азығын да сатып алмайтындай алдын-ала шаралар қамдануы қажет. Бұл «Сыбаға» бағдарламасының талаптарынан да аңғарылады. Аталған шаруа қожалығының жайылымдық жері, егістік алқаптары мен қора-жайы сай.
Қазақтың ақ бас асыл тұқымды сиырларын таңдау себебін де сұрадық. Аналығы 600 келіге дейін, аталығы 1 тоннаға дейін салмақ қосатынын ескерсек, себебі айқын. Аталған тұқым 1932-1950 жылдары ет жинау қасиетін молайту мақсатында герефорд асыл тұқымды бұқаларымен будандастыру арқылы дүниеге келген. Сондай-ақ, Берік Қазыбайұылының айтуынша, қазақтың асыл тұқымды ақ бас сиырлары жергілікті жердің ауа-райына төзімді әрі аса қатты күтімді қажет етпейді. Сонымен қатар, «Сыбаға» бағдарламасының қолайлы шарты – алынған несиені тек екі жылдан кейін ғана ай сайын бөліп төлеу мүмкіндігі. Бүгінгі таңда төл алумен айналысып жатқан әрі пайдасын әлі көре қоймаған шаруа қожалығы үшін бұл – аяғынан тік тұрғанға дейін көрсетілген үлкен қолдау. Берік Қазыбайұлы анасы Шолпан Иманбаевамен биылғы жылы тұрақты он жұмыс орнын ашуды көздеп отыр. Сондай-ақ, техника тетігін де реттеу жоспары бар. Атап өткен жөн, шаруа қожалығының меңгерушісі Берік Қазыбайұлы аталған шаруаны қолға алмай тұрып, мемлекет қызметінде болған. Аудандық салық комитетінде бөлім басшысы, одан бұрын аудан әкімінің көмекшісі қызметтерін атқарған. Әкесі, аудан тұрғындарына белгілі азамат Қазыбай Жылқыбеков қайтыс болғаннан кейін, шаруа жайы тұралап қалған. Ойластыра келіп Берік – шалқайған шаруаны тік тұрғызу ниетімен мемлекеттік қызметтен бас тартқан. Бүгінде Берік Қазыбайұлы анасы Шолпан Иманбаевамен шаруаны шыр көбелек айналдырып, асыл тұқымды ақбас сиырлардың жартысынан төл алып үлгерген. Әлемді әуреге салған коронавирус індетінің таралуына байланысты жарияланған төтенше жағдай шаруа қожалығының шаруасына кері әсерін тигізбеген. Тек, Берік Қазыбайұлы шаруа қожалығы күн санап дамып, мал басы өсіп отырғандықтан жайылымдық жер қажет екендігін жеткізді. Бұған аудан әкімдігі тарапынан пәрмен берілсе болды, мәселе шешімін таппақ.
Әділет САРЫБАЙ