Оба - бактериалдық зооноздық, өте тез дамитын және ауыр өтетін, науқастардың өлім-жітім деңгейі жоғары болатын, адамды және кейбір үй жануарларын зақымдайтын, аса қауіпті табиғи-ошақтық  инфекциялық ауру.                

Микробты негізгі таратушылар - жабайы аңдар, тышқандар мен бүргелер, үй жануарлары арасында түйелер. Обаның микробы жұққан жағдайда ауру белгілері 2-6 күннен соң біліне бастайды. Бұл уақыт ішінде микробтар адам ағзасын жайлап, уын жая бастайды. Міне, осы жасырын кезеңнен кейін адамды ауру билеп әлсірете бастайды. Бұл науқасқа шалдыққан адамның басы ауырып, лоқсып құсады, қан тамырларының соғуы жиілеп, дене қызуы 38,5-39,5 0 С-ке көтеріліп, есінен танады, сөйлегенде тілі күрмеліп әрең үн қатады, сандырақтап сөйлейді, көздері қанталап, қызарып кетеді. Бетінде қорқыныш пен қайғы әжімі деп аталатын белгі пайда болады.

Ауру кейде жеңіл өтуі де мүмкін. Аурудың белгілерін нақтылау үшін айта кетуіміз қажет жағдайларға тоқталайық. Өйткені ауру белгілері оның жұғу түріне байланысты болады. Аңның, тышқанның (қосаяқтың) терісін, обадан өлген түйені сойғанда жұқса, ол адамның қолтық пен тамақ бездері іседі. Ал бүрге, кене арқылы жұққан болса, шаққан жерге таяу бездер ісініп, қабынады, аяқтан шақса адамның шап бездері, кеудеден, қолдан немесе мойыннан шақса сол адамның қолтық, тамақ бездері іседі. Қабынған бездерде қатты ауру пайда болып, қол тигізбейді. Без обасы асқынған кезде адамның өкпесіне шабады. Мұндай жағдайда науқас жөтелгенде, шашалғанда қан аралас қақырық тастайды. Ауру адамның сілекейіндегі микробтар  үй ішіне тез таралып, сау адамдарға жұғуы мүмкін. Сондықтан осы көрсетілген ауру белгілері байқалса шұғыл түрде дәрігерге қаралу керек.

Ерте заманда оба ауруынан елімізде адам шығыны көп болғаны белгілі. Соңғы 20 жылдан астам уақыт бойы адамдар арасында оба ауруы тіркелген жоқ. Алайда бұл дерттен толықтай арылдық дегенді білдірмейді. Сол себепті әр азамат өзінің, отбасының денсаулығын сақтау үшін қолынан келетін барлық шараларды қолдануы қажет. Аурудан ем іздемей, ауырмайтын жол іздеп,  амал жасап сақтансаң сақтайды демекші, обадан сақтану үшін келесі жайларды жадыларыңызда ұстауларыңыз абзал:

- Кеміргіштер бар немесе олардың іні орналасқан жерде тұруға және киіз үй   тігуге  болмайды;

- Далада сарышұнақты, қосаяқты, құмтышқанды аулап олардың терісін сыпыруға болмайды

-  Обамен түйелер ауырады сол себепті, оларды мал дәрігерінің рұқсатынсыз соймау керек. Ауру түйенің етін жегенде және оның терісін сыпырғанда дертті жұқтыру қаупі бар;

- Тұрғын және шаруашылық жайларда кеміргіштер мен бүргелер болмауы тиіс, олар обаны жұқтыруы мүмкін;

- Үй жануарларын (ит, мысық)  залалсыздандырып тұру қажет;

Сіз тұратын аумақ обаның табиғи ошағы болып саналады сол себепті, бұл инфекцияны жұқтыру қауіпі бар. Мұны үнемі есте сақтаған  жөн. Еліміз аман, жұртымыз тыныш болсын.

Алматы обаға қарсы күрес

бөлімшесінің зертхана меңгерушісі: Жунисбекова Г.С.