Жақында аудандық ішкі саясат бөлімінің қолдауымен «Іле мұрагер» қоғамдық бір-лестігінің ұйымдастыруымен Ақши ауы-лындағы Бөлек батыр және Есіктегі Қ.Сәтпаев атындағы орта мектепте Президент Н.Ә.Назарбаевтың «Қазақстанның үшінші жаңғыруы: жаһандық бәсекеге қабілеттілік» атты Қазақстан халқына Жолдауындағы басты басымдықтар мен «5 институционалдық реформа: 100 нақты қадам» Ұлт жоспарын жүзеге асыру аясында кездесу өтті.

Шара барысында қоғамдық бірлестік төрағасының орынбасары Қымбат Құрманжанова Жолдаудағы басымдықтарға тоқталып өтті:

– Елбасы осы Жолдауда еліміздің дамыған 30 елдің қатарына кіру керектігін тағы бір еске салып өтті. Сондай-ақ, сын-қатерлерді күтіп отырмай, оған кез-келген сәтте қарсы тұра алатын мемлекетті қалыптастыру керектігін қадап айтты. Ол үшін бес басымдықты жүзеге асыруы-мыз керек. Экономикамыздың жеңілдетілген технологиялық жаңғыртылуы елімізде 3D принтинг, онлайн-сауда, мобильді банкинг, цифрлық қолтаңба, цифрлық қызмет көрсету түрлері мемлекеттік ұйымдар, денсаулық сақтау, білім беру жүйесінде қолданылып және басқа да сұранысы көп салаларда дамытылуы керек – деп, сандық технологияның ел дамуында атқарар рөлі орасан зор екендігін айтып өтті. Сонымен қатар, бес басымдыққа жеке-жеке тоқталған Қымбат Құрманжанова Елбасының реформаларын жүзеге асыруда барша қазақстандықтар күш біріктіріп, іске кірісу керектігін алға тартты.

Жиынға қатысқан ішкі саясат бөлімінің бас маманы Қайсар Асқарұлы да Жолдауда айтылған тапсырмаларды орындау – туған мемлекетіміздің келешегін жарқын етуге қосқан үлесіміз екендігін айтты. «5 институтционалдық реформа: 100 нақты қадам» Ұлт жоспары жайлы әңгіме өрбітті:

– Тәуелсіз Қазақстанның барлық салаларындағы кемшіліктерді жойып, алпауыт мемлекеттермен иық тірестіруге қабілетті болу үшін дамуға бастайтын 100 нақты қадамды ұсынған болатын. Бұл маңызды құжатта дамушы елдің алға нық қадам басуына керекті негізгі салалар қамтылған. Бүгінгі таңда «Кәсіби мемлекеттік аппарат құру», «Заңның үстемдігін қамтамасыз ету», «Индустрияландыру және экономикалық өсім», «Есеп беретін мемлекетті қалыптастыру» деп аталатын бөлімдерден тұратын құжаттағы 100 қадамның барлығы дерлік жүзеге асты – деді.

Жиын соңында жиылған көпшілік аталған екі маңызды құжаттағы тапсырмалар мен ұсыныстар бойынша көкейдегі сауалдарын қойып, мамандардан нақты жауаптар алды.

Сардарбек НҰРАДИН.