Алланың қалауымен биылғы жылдың15 наурыз Шағбан айы басталды. Шағбан айы – көптеген қасиеттерді өз аясында қамтыған құлшылық айы. Алла Тағаланың пенделеріне деген ризық-несібесін молайтатын ай.

«Көптеген жақсылықтардың бастауы» деген мағынаға ие «шағбан» сөзімен аталған қасиетті ай Ережеп айының бітуінен хабар беріп, Рамазанның жақындағанын сүйіншілейтін ай. Сүйікті Пайғамбарымыз (с.ғ.с.) Ережептен кейінгі кезекте Шағбан айына ерекше көңіл бөлген. «Алла Тағалам, Ережеп пен Шағбан айларын берекелі ете гөр. Бізді Рамазанға аман-есен жеткіз», – деген дұғасын жиі айтқан. Қасиетті Шағбан айына белгілі бір дайындық жасаудың мәні зор. Өйткені, Әбу Умәмә әл-Бәһилиден (р.а.) жеткен хадис-те Алла Елшісі (с.ғ.с.): «Шағбан айы кіргенде, өздеріңізді тазалаңыздар және ниеттеріңізді дұрыстаңыздар», – деген. Бұл айдағы сауабы көп құлшылықтың бірі − ауыз бекітіп, нәпіл ораза ұстау.

Айша (р.а.) анамыз айтады: «Расулуллаһтың (с.ғ.с.) бірінің артынан бірін ұстаған оразасына қарап, енді ораза ұстауын тоқтатпайды деп ойлайтынбыз. Ал оразаны бірінің артынан бірін ұстамаған кездері, енді Ол оразаны ұстамайтын шығар деп ойлайтынбыз».

Шағбан айында мұсылманның иманы толысып, кемелденеді. Пайғамбарымыз (с.ғ.с.) бұл айды ерекше ұнатып, осы айды ораза ұстаумен өткізетін. Демек, бізге де осынау мүбарак айда шама-шарқымызға қарай ораза ұстауға талаптанғанымыз абзал екен.

Усама ибн Заид (р.ғ.) риуаят етеді: «Пайғамбарымыз Мұхаммедке (с.ғ.с.): «Я, Алланың Елшісі, айлардың ішінде Шағбан айында көбірек оразада болғаныңды көремін».

Шағбан айының оразасын шамасы жеткендер ғана тұтқаны абзал. Егер Шағбан айында үздіксіз ораза тұтып, Рамазан айындағы парыз оразаға шамасы келмей қалуынан сезіктенген адам болса, ол адамға Шағбан айында ораза тұтудың қажеті жоқ. Өйткені Шағбан айындағы ерікті оразадан Рамазан айындағы парыз ораза маңызды.

Шағбан айының тағы бір қасиеті, осы айдың орта шенінде ұлық бір түн бар. Ол – наурыз айының 28-нен 29-не қараған мүбарак Бараат түні. Бұл түні мұсылмандарға рахмет, берекет, жақсылық, кешірім және мағфират жауады.

Али бин Әбу Талибтен (р.ғ.) риуаят етілген бір хадис шәрифте былай делінген: «Алла Тағала Шағбанның он бесінші түні дүние аспанына түседі. Мыналардан өзгенің бәрінің күнәлары кешіріледі. Кешірімнен тыс қалғандар: мүшрік, мұнафық, туысымен қарым-қатынасын үзген және зинақор әйел».

Алла Тағаланың «дүние аспанына түсуі» деген сөзі, Оның рахметі мен берекетінің, қайыр мен нығметінің түсуі. Көк есіктерінің ашылуы, дұғалардың дереу қабыл болуы әрі құлдарына рахым мейірімімен қарауы. Өйткені Алла Тағалаға мекен тағайындау дұрыс емес.

Пайғамбарымыз (с.ғ.с.) мүба-рак сөздерінде «Жәбрәйілден (ғ.с.): «Бұл түні мына есіктер қашанға дейін ашық тұрады?» – деп сұрағанымда Жәбрәйіл (ғ.с.): «Таң атқанша», – деді де: «Я, Мұхаммед! Алла Тағала осы түні тозақтан құтқаратын құлдарының саны Бәни Кәлб руының қойларының жүндерінің санындай (Яғни, кейбіреулерден басқа, барлық мұсылмандар кешіріледі)» – деді». Қалб тайпасы – көп қой өсіруімен танылған тайпа болатын. Сол себепті де хадисте осы түні көптеген адамдардың Алланың кешірімі мен рақымына ие болатыны айтылған.

Бұл түні не істеу қажет? Бараат түнін дұрыс қарсы алу үшін, бұл түнді ұйқысыз өткізген абзал. Егер кімде кімнің шамасы жетсе, бұл түнді тек құлшылықпен өткізгені жақсы. Алайда кімнің бұған шамасы жетпесе, ол адам осы түннің кез келген бөлігін құлшылыққа арнай алады. Құлшылыққа түннің екінші бөлігін арнап, мына ғибадат түрлерін атқарса болады:

– Намаз. Намаз – осы түнде атқарылатын ең абзал құлшылықтың бірі. Намаз ракағатының белгіленген саны жоқ, алайда ракағат саны сегіз-ден кем болмауы тиіс. Сондай-ақ әр намаздағы рукуғ, қиям, сәджеде ұзағырақ болғаны абзал. Намазда Құраннан ұзақ аяттар оқылғаны жақсы. Егер кімде-кім ұзақ сүрелерді есіне түсіре алмайтын болса, бір ракағатта қысқа бір сүрені бірнеше рет қайталауына да болады.

– Тиләуәт. Қасиетті Құранды оқу – осы түні атқарылар пайдалы құлшылықтың түріне жатады. Намаз оқып болған соң, я болмаса басқа уақытта шамаңыз жеткенше Құран оқыңыз.

– Зікір. Бұл түнді зікірге арнаған өте жақсы. Әсіресе Пайғамбарымызға (с.ғ.с) салауат айту. Сондай-ақ зікірді жүріп бара жатқанда, төсекте жатып және де жұмыс уақытында немесе жұмыстан тыс уақытта да оқуға да болады.

– Дұға. Бұл түні бізге көп пайда әкелетін ғибадаттың бірі. Осы түні Алла Тағала дұғамызды қабыл етеді деген үміт бар. Дұға – ғибадат. Алла Тағала жасаған әрбір дұға үшін сұраушының мұқтаждығын өтеп қана қоймай, сауап та жазады. Тіпті сұраған нәрсесі қолжетімсіз болса да, ол адам жасаған дұғасы үшін сауаптан құрқалмайды. Сонымен қатар дұға барлық ғибадаттың өзегі болып табылатын Алла мен адамның байланысын арттырады. Адам баласы қалағанынша, кез келген түрде дұға ете алады, алайда ең жақсы дұға – Пайғамбарымыздың (с.ғ.с) дұғалары. Бұл дұғалар шебер сөздерімен пенденің бұл өмірдегі әрі ақыреттегі барлық мұқтаждығын қамтиды. Расында да Пайғамбарымыздың (с.ғ.с) дұғасы соншалықты терең мағыналы, тіпті пенденің оған баға беруге шамасы жетпейді.

Пайғамбарымыздың (с.ғ.с) дұғасы жайлы көптеген кітаптар әр тілде жарық көрген. Мұсылман адам Алла Тағалаға сол дұғалар арқылы, араб тілінде я болмаса өз ана тілінде сол дұғалардың мағынасын айта отырып жалбарынуы керек.

– Нәпіл намазды я болмаса Құранды белгілі себептерге байланысты оқи алмаған адамдар болса (ауру, әлсіздік немесе шұғыл тірлігі бар болса), ол кісілерге осы берекелі түннің сауабынан құр қалмас үшін төмендегі амалдарды орындауды ұсынамыз:

1. Ақшам, құптан және таң намаздарын мешітте, егер сырқат болып, шамасы жетпесе үйінде оқысын.
2. Үнемі зікір айту, әсіресе салауат. Кез келген халде, адам ұйықыға кетпейінше зікірде болуытиіс.
3. Алладан кешірім тілеу. Мұны төсекте жатып та сұрауға болады.

– Әйел адамдар етеккір кезінде намаз бен Құран оқи алмайтындықтан, олар кезкелген зікірді айтып, тасбих тартып, салауат айтуы керек. Сонымен қатар Құран мен хадистерде келген араб тіліндегі дұғаларды дұға ету ниетімен оқи алады.

Бараат түні – мұсылмандар үшін ерекше түн. Сондықтан да осы түнді Аллаға толықтай бойұсынған күйде өткізу керек. Әрі Алланың алдында ұнамсыз амалдардан тыйылу қажет. Дегенмен әрбір мұсылман әр кезде күнәлі істерден аулақ болуы қажет. Осындай түндері күнәлі іс жасау үлкен қылмыс әрі Алла Тағалаға бойұсынудан бас тартқандық болып саналады. Мұндай амал Алланың қаһарына ұшыратады. Сондықтан да барынша күнәлі істерден тыйылуымыз қажет, асылында осы түнгі жасалған күнәлар бұл түннің барлық нығыметінен құр қалдырады.

Шағбан айының (13, 14, 15) күндері ораза ұстаудың сауабы зор. Бұл күндер «Аямул байд» яғни ақ күндер деп аталады. Хижри жыл санау бойынша әр айдың ортаңғы күндері ораза ұстау қажет. Себебі бұл күннің түндерінде ай толықсып, түнді нұрға бөлеп тұрады. Бұл күндері ораза ұстаған адамның жүрегін Алла Тағала дүние қараңғылығынан ағартады. Сол үшін де Пайғамбарымыз (с.ғ.с.): «Шағбан айының ортасының түні болғанда күндізінде ораза болып, түнінде намазға тұрыңдар», – деді.

Сапархан ТӨРЕҚҰЛОВ,

ауданның бас имамы

Алматы облысының Бас мемлекеттік-санитариялық дәрігері Ерғали Сыдымановтың жаңа Қаулысы жарияланды. Енді облыста 12 сәуірден бастап карантин талаптары күшейтіледі.

Қаулыға сәйкес, толтырылуы 50 пайыздан жоғары, соның ішінде, залдарда 30 орыннан жоғары қоғамдық тамақтану объектілері, банкет залдарының қызметіне тыйым салынады.

Ойын алаңдары, ойын-сауық объектілері, оның ішінде түнгі клубтар, кальян, көрмелер, букмекерлік кеңселер, караоке, РS-клубтар, боулинг-орталықтар, лото-клубтар, компьютерлік клубтар, цирктер, бильярд залдары, театрлар, кинотеатрлар, қалааралық, ауданаралық тұрақты автобустардың (шағын автобустардың) қозғалысы, облыстық және республикалық деңгейдегі чемпионаттарды, жарыстарды өткізуге тыйым салынады.

Білім беру орталықтарынан басқа, секциялар мен үйірмелер, оның ішінде спорттық, би, гимнастикалық және тағы басқаларға;

Мәдениет нысандары (мұражайлар, мәдениет үйлері, концерт залдары және басқа);

Құрылыс материалдарын, ауыл шаруашылығы техникасы мен жабдықтарын сататын объектілерден басқа, ауданы 2000 шаршы метрден асатын азық-түлік емес дүкендер (жеке тұрған) жұмысына тыйым салынады.

Қашықтықтан оқыту нысанын (онлайн) қоспағанда, техникалық және кәсіптік, орта және жоғары білімнен кейінгі білім беру ұйымдарының студенттерін дәстүрлі форматта оқыту тоқтатылады.

Адамдарды қоғамдық көлікпен тасымалдау қызметін жұмыс уақытын 23.00-ге дейін ұзарту, қарбалас уақытта автобустар санын көбейту көзделеді.

Көріністік, салтанатты жаппай іс-шаралады, көрмелерді, форумдарды, конференцияларды, корпоративті, отбасылық іс-шараларды (еске алу, банкеттер, үйлену тойлары, мерейтойлар, ауызашар), оның ішінде, үйде және адамдар көп жиналатын өзге де іс-шараларды өткізуге тыйым салынады.

Жерлеу рәсімдері саны 15 адамнан аспайтын жақын туыстарының қатысуымен жүргізілуі тиіс.

Жұмыс күндері сағат 09:00-ден 20:00-ге дейін, сенбі және жексенбі күндері қоғамдық тамақтану объектілерінің қызметіне тыйым салынады, тек шығару және жеткізу жұмыстарына уақыт бойынша шектеусіз рұқсат етіледі. Осы қаулыда белгіленген жұмыс уақыты өткеннен кейін келушілердің ас залында болуына тыйым салынады.

Ұжымдық, салтанатты, отбасылық және басқа да бұқаралық іс-шараларды өткізуге қатаң тыйым салынады (еске алу, корпоративтер, банкеттер, тойлар, туған күндер, мерейтойлар, шығарып салу, құдалық, беташар және басқа).

Супермаркет, гипермаркеттер сағат 09:00-ден 22:00-ге дейін жұмыс істейді.

Ашық, жабық, азық-түлік және азық-түлік емес базарлары толымдылығы 30 пайыздан аспайтын, кіре берісте термометриямен, жұмыс кестесі сағат 10:00-ден 17:00-ге дейін, сенбі және жексенбі күндері жұмыс істеуге тыйым салынады.

Қаулы 2021 жылы 12 сәуірде таңғы 07 сағат 00 минуттан бастап күшіне енеді.

Биыл қайырымдылық мөлшері – 420 теңге. Бұл өткен жылдарға қарағанда біршама көп.

Талдықорған қаласы «Нұр» мешітінің имамы Алмас Данағұлов: «Садақаның мөлшері екі килограмм ұнның орташа құны негізінде есептелді. Ұн бағасы ҚМДБ-ның қалалық және аймақтық өкілдіктері ұсынған ақпарат негізінде анықталды. 2020 жылы пітір-садақаның мөлшері 370 теңгені құрады. Пітірді Рамазан айы бойы төлеуге болады», – деп атап өтті.

Қасиетті Рамазан айы жақындаған сайын қазіргі эпидемиологиялық жағдайға байланысты «Короновирусқа қарсы екпені ораза кезінде салдыруға бола ма?» деген сауал туындап отырғаны рас. Имамдар, екпе салдыру оразаны бұзатын амалдарға жатпайтынын айтады. «Шариғат бойынша оразаны ағзаға табиғи жолдар – ауыз, мұрын, ішек арқылы енетін заттар бұзады. Ал денеге коронавирусқа қарсы екпені салдыру оразаны бұзбайды», – дейді Талдықорғандағы Қазақстан мұсылмандары діни басқармасының бас имамы Ардақ Оразбай. Сондай-ақ емдеуге қолданылатын инъекцияларға рұқсат етілгенін ескертті.

Естеріңізге сала кетейік, 2021 жылы қасиетті Рамазан айы 13 сәуірде басталып, 12 мамырда аяқталады. 13 мамырда мұсылмандар Ораза Айт мерекесін, ал қасиетті түн – Қадір түнді 8-9 мамыр аралығында қарсы алады.

Жақында санитарлық-эпидемиологиялық талаптарды ескере отырып, көктемгі демалыс аралығындағы  оқушылардың  сапалы  және  қауіпсіз  демалысы  ұйымдастырылды. 

Таутүрген негізгі орта мектебінде «Қазақстан балаларын көктем шақырады» тақырыбында тәрбие саласының 8 бағыты қамтылған ауқымды шара ұйымдастырылды. Шара аясында ұлттық спорт түрлерінен жарыс  өткізіліп, үстел  үсті ойындар ойнатылып, ұлттық тағамдар тарихымен таныстырылды. Қазақстандық режиссер Абдолла Қарсақбаевтың 1977 жылы Ригада өткен бүкілодақтық кинофестивалінде «Бала психологиясын жақсы ашқаны үшін» атты ең таңдаулы балалар фильмі ретінде бас жүлде олжалаған «Алты жасар Алпамыс» туындысын көрсе, ұлттық құндылықтарымызды дәріптеу мақсатында «Есік» мемлекеттік тарихи-мәдени қорық  және «Ұста Дәркембай Шоқпарұлы атындағы қолөнер мұражайларына» онлайн  түрінде саяхат  жүргізілді.

Гүлнәр СӘРСЕНҚЫЗЫ,

Таутүрген  негізгі орта мектебі директорының 

тәрбие ісі жөніндегі орынбасары.