Биыл бакалавриатқа 51 500, ал магистратураға 13 500 грант беріледі. Бұл туралы Орталық коммуникациялар қызметіндегі баспасөз мәслихатында ҚР Білім және ғылым министрі Асхат Аймағамбетов айтты.
«Биылғы мемлекеттік тапсырысты ұйымдастыру бойынша тиісті жұмыстарды атқарып жатырмыз. Жазда бакалавриатқа берілетін грант саны - 51 500, ал магистратураға берілетін гарант саны 13 500-ге жетеді. Грантты алу конкурсына түсу үшін Ұлттық бірыңғай тестілеуден міндетті түрде өтіп, тапсырылған сертификатты өз еркімен тиісті базаға тіркеп, конкурсқа қатысады. Сонымен қатар, магистратура бойынша да екі жылдан бері біз оны ҰБТ сияқты тестілеу форматында өткіздік. Бұның алдында әр университет өздері билеттерін дайындап, тапсырмаларын әзірлеп, өздері тексеріп, шешім қабылдайтын. Бұнда әртүрлі тәуекелдер болды. Сондықтан біз магистратураға қабылдау рәсімін өзгерттік. Биыл магистратура электронды форматта нақты тестілеудің нәтижесінде, яғни орталықтандырылған тест нәтижесінде өткізіліп, алған балл бойынша грантты алуға мүмкіндігі болады», - деді министр.
mezet
Табиғаттың төрт мезгілі кезек төркіндеп кететін қазақ жеріне көктем жетсе, көптеген елді мекенді сең басып, сел шайып кету қаупі туатыны шындық. Әрине, биылғы жауын-шашыны көп көктемде көшкін мен селді ауыздықтау оңайға соңқапайтыны анық. Біз «Қазселденқорғау» мемлекеттік мекемесінің ауданымыздағы бөлімшесінен өңіріміздегі наурыз-сәуір айларындағы тасқынға тосқауыл қою жұмыстары мен өзге де апатты жағдайлардың алдын алуға дайындығын білген едік.
Ауданымыздағы ҚР ТЖМ «Қазселденқорғау» ММ-нің филиалы ІААӨПТБ қызметінің ресми мәліметіне сүйенсек, бүгінде аудан аумағында 36 мореналық көл бар. Олардың 25-і Есік өзен алабында, 11 көл Түрген өзен алабында. Сонымен қоса ауданымызда 31 бірлік топырақкөшкін және 17 бірлік қаркөшкін телімі бар екен. Қазір қар көшкінінің қаупі сейілген. Ал толпырақ көшкіні мен селдің қаупі әл жойылған жоқ. Сондықтан ҚР ТЖМ «Қазселденқорғау» ММ-нің филиалы ІААӨПТБ қызметі аталған апаттардың алдын алуға дайындық жұмыстарын пысықтап үлгерген көрінеді. Олардың сөзінше, бүгінде сел қаупін тудыратын Есік өзенінің жоғары ағарындағы №22-23 көл мен Түргендегі №1 көлдің су деңгейі төмендетіліп, екі өзен арнасындағы сел қаупі сейілген.
Өткен жылдың соңында Есік өзенінің арнасы аршылып, судың іркіліксіз ағуына мүмкіндік жасалған. Бұл ретте ҚР ТЖМ «Қазселденқорғау» ММ-нің филиалы ІААӨПТБ кезекшілік қызмет мониторинг және құлақтандыру бөлімінің басшысы Айдын Көпжасаров: «Көктемгі дайындық өте маңызды екенін баршамыз жақсы білеміз. Осыған сай бізде төтенше жағдайлардың алдын алу мақсатында біршама жұмыстар атқарылуда. Бүгінде ауданымызда көктемгі топырақ көшкіні мен селдің алдын алуға арнайы апаттық топ жасақталды. Аталған апаттық топқа үш техника бөлініп, он арнаулы кәсіби маман жұмылдырылды. Олар ауданымыздағы барлық елді мекенде топырақ көшкіні мен селдің қаупін қадағалауда. Біздің өңірде сел қаупі көбінде жаз айларында туындайды. Сондықтан тұрғындар өмірінің қауіпсіздігін қамтамасыз ету және қауіпті табиғи құбылыстардан, су тасқындарынан қорғау мақсатында маусымдық гидробекеттер құрылған. Ондағы бақылаушылар өзен суларының ағысы мен сыйымдылығын тәулігіне үш мәрте бақылайды. Сонымен қоса, олар ауа райының түрлі өзгерістерінен де алдын ала мәлімет беріп отырады. Осы мәліметтерге сай өңірімізде түрлі апаттық жағдайлардың туындау қаупі сарапқа салынады. Сонымен қоса, апатты жағдайдың алдын алуға бағытталған ақпарат қызметі де қолға алынған. Осыған сәйкес қандай да бір сел не көшкін қаупі туындаса, жергілікті тұрғындарға алдын ала ескерту беріледі. Тіпті топырақ көшкіні мен сел қаупі туындайтын жерлерге арнайы ескерту тақталары орынатылған. Белгілі бір төтенше жағдайдың алдын алу үшін жергілікті әкімдіктермен тығыз жұмыс істеп келеміз. Жыл басынан бері аудан аумағында сел қаупі туындағын жоқ. Алдағы уақытта сел апатына жол бермеуге күш саламыз», – дейді.
«Қазселденқорғау» ММ-нің филиалы ІААӨПТБ қызметінің мәліметінше, ауданымызда селден қорғайтын 16 бөгет бар. Оның кей бүлінгендері күрделі жөндеуден өткен. Барлық бөгет апатты жағдайда селден қорғауға қауқарлы.
Ерзат АСЫЛ
Ең жақсы сөз – іс! Осы орайда аудан басшысы Әлібек Жақанбаев қала, ауылдық округ әкімдерін қабылдап, перспективалық жоспарын жүйелеп, нақты тапсырма берді.
Әлбетте, қазіргідей қауіпті індет өршіген уақытта тұрғындар денсаулығы басты назарда. Сондықтан талапқа бағыну – әрбіріне ортақ міндет. Мұны тұрғындарға түсіндіру бірінші кезекте. Аудан әкімі округ басшыларына талап үдесінен шығу үшін түсіндіру жұмыстарын жетілдіруді әңгімесінің әліппе-сінде тапсырды. Алғашқы болып Әлібек Әскербекұлының қабылдауында болған қала әкімі Айдар Бошкулов өзінің жұмыс жоспарымен таныстырып, нақты тапсырмаларын алды.
– Бірінші кезекте, Тәуелсіздіктің 30 жылдығына арнап мәдениет үйінің аумағында балаларға арналған ойын, футбол алаңдарымен бірге «Тәуелсіздік бағын» жасау мақсатында жоба дайындап, қанша қаражат жұмсалатынын анықтаңыз. Орталық стадионды ретке келтіру үшін тиісті құжаттарды әзірлеңіз. Сол секілді, орталықтағы Алматы мен Абай көшелерінің қиылысында орналасқан Керей-Жәнібек ескерткішін қайта жаңартуға өтініш беріңіз. Сонымен қатар, Алтын Адам аллеясын абаттандыруға, Набережная көшесінің жобасын дайындап, кезеңдерге бөліп жұмыстарды бастауға әрекеттенуіміз керек. 25 шақырым жолды жөндеу, күл-қоқыс тастайтын орын мәселесін шешу уақыт күттірмейді, – деді Ә.Жақанбаев. Сондай-ақ, Есік өзенінің жағалауын абаттандыру бойынша нақты жоспар әзірлеуді тапсырды.
Аудан әкімі Шелек ауылдық округінің әкімін қабылдай отырып, округтің жұмыстарымен танысты. Сонымен қатар өз сөзінде үстіміздегі жылы аталмыш ауылдық округке баса назар аударылатынын айтты. Жұмыстарды жүйелей отырып Әлібек Жақанбаев округ әкімі Сәкен Абдыхалиевке нақты тапсырмалар берді. Атап айтқанда, алдағы уақытта жеке тұрғын үй құрылысын жүргізу үшін 237 га жер теліміне инженерлік-коммуникациялық инфрақұрылымын жүргізу мәселесі, 34 көппәтерлі тұрғын үйлердің жағдайын реттеу, ауыл маңындағы 2 саяжайдың жерін мемлекетке қайтару, ауыл тұрғындарының сұрауы бойынша көшелерді барынша жарықтандыру, жастардың жұмыспен қамту деңгейін анықтау және жұмыссыздық мәселесін реттеу, көпбалалы отбасыларды тұрғын үймен қамту жұмыстарын жүргізу, өрт сөндіру бекетін салу үшін жер телімін дайындау, санитарлық тазарту және абаттандыру жұмыстарын тұрақты жүргізу. Шелек ауылдық округіің әкіміне осындай тапсырмаларды берген Әлібек Әскербекұлы атқарылған істің тиянақты әрі сапалы болу керектігін атап өтті.
Сөгеті ауылдық округінің әкімі Еркінбек Дауытқұловқа елді мекендегі ауыз су мәселесін жақын арада шешуді тапсырды аудан басшысы. Сонымен қоса, Көкпек ауылында интернет, ұялы байланыс желісі қарастырылмаған. Бұл олқылықтың орнын толтыру мақсатында округ әкіміне инвесторлар тарту керектігін айтты.
Әкімдерді қабылдау барысында жайылымдық жерлерді игеру бойынша Масақ ауылдық округінің әкімі Ертай Нұрмахановқа нақты тапсырмалар жүктелді. Бүгінде Нұрлы ауылында 40 үй иесіз ретінде тіркелген. Олар баспана кезегінде тұрған азаматтарға беріледі.
Байсейіт ауылының ауызсу жүйесін күрделі жөндеуден өткізу керек. осы мәселені көтерген аудан әкімі Талғат Өмірбековке тиісті мекемемен бірлесе отырып жобалық-сметалық құжаттаманы дайындауды тапсырды. Сонымен қатар, жеке тұрғын үй құрылысын салу үшін Бижанов ауылына 38 гектар жерге инженерлік-коммуникациялық желі жүргізу үшін құжаттар рәсімделетін болады.
Округ әкімдерін қабылдау барысында Әлібек Жақанбаев елді мекендердің қордаланған мәселелерімен танысып, оны шешу мақсатында тиісті шаралар қабылдайтынын айтты. Қабылдауда негізінен әлеуметтік нысандарды күрделі жөндеуден өткізу, жолдарды жөндеу, ауызсу құбырларын тарту, электр желілерін жаңарту, санитарлық тазалық бойынша әкімдерге нақты тапсырмалар жүктелді.
Динара ТӨЛЕМІСОВА,
аудан әкімінің баспасөз хатшысы
Бүгін Еңбекшіқазақ ауданы VII шақырылым депутаттары Байғоджаев Қуат Сұлтанұлы мен Рахимов Бағдат Болатұлы ауданымыздың құрметті азаматы, Халықаралық дәрежедегі спорт шебері, Қазақстан Республикасына еңбегін сіңірген спортшы төс белгісінің иегері, кезінде аудан әкімшілігінің спорт бөлімінде басшысы, Көктөбе селолық округінің әкімі болған Саматов Аманбек Фазылұлы ағамызбен канвассинг кездесу өткізді.
Аманбек Фазылұлы өмірлік тәжірбиесімен бөлісіп, спорт саласы мен мемлекеттік қызмет жайында сөз қозғады. Кездесу барысында Сайлауалды бағдарламада көтерілген барлық мәселе сарапталып, өңіріміздің 2021-2025 жылдарға арналған даму бағдарламасы талқыланды. Сондай-ақ,осы жылдың 20 мамырында ауданымызда спорт байқауын өткізу жайлы ойымен бөлісіп, депутаттарға ақ батасын берді.
А.ҒАБИДЕН
Қоғам үшін үлкен қауіптің бірі – сыбайлас жемқорлықтың дендеуі. Ол елдің экономикасына кері әсерін тигізіп, дамуына тежеу болып қана қоймай, халық мәдениетінің төмендеуіне, адами қасиеттің, ар-ұяттың жойылуына себепші болады. Материалдық қана емес, рухани тоқырауға түсіреді. Яғни коррупция – қоғамдағы ең үлкен кертартпа күш. Сондықтан да онымен күрес ешқашан тоқтаған емес. Ал күрестің қалай жүргізіліп жатқанын Алматы облыстық мәслихат депутаты, әрі «Nur Otan» партиясы Еңбекшіқазақ аудандық филиалы жанындағы Сыбайлас жемқорлыққа қарсы іс-қимыл жөніндегі қоғамдық кеңестің төрағасы Ерік Абитовтен сұрап-білдік.
– Сыбайлас жемқорлық фактілері неге азаймай тұр? Әлде заң әлсіз бе?
– Алдымен, сыбайлас жемқорлықтың не екеніне тоқталсақ. Бұл – жең ұшынан жалғасқан жымысқы жүйе. Ол жылдар бойы жүйеленіп, әрі әрдайым түрленіп отырады. Сондықтан мұқият зерделеу, әрі жылдам әрекет ету маңызды. Барлық саланы шырмауықша шырмап алған жемқорлықтың тамыры бірден үзілмесі анық. Дегенмен, соңғы уақытта сыбайлас жемқорлыққа қарсы тиімді жобалар жүзеге асып жатыр. Ал заңға келер болсақ, жемқорлықтың салдарымен емес, оның негізгі себептерімен күресу маңызды деп ойлаймын. Яғни қылмыскерді қамағаннан гөрі, сол қылмыстың алдын алуға, болдырмауға көп күш жұмсау керек. «Біздегі заң әлсіз» дегенмен келіспеймін. Былтыр ғана сыбайлас жемқорлыққа қарсы іс-қимылды күшейтуге арналған заң қабылданды. Соған сәйкес мемлекеттік қызметкерлерге, депутаттық корпусқа және судьяларға шетелдік банктерде есепшот ашуға тыйым салынды. Сондай-ақ ауыр және аса ауыр сыбайлас жемқорлық қылмысы үшін сотталғандарды мерзімінен бұрын босатуға да тыйым салынды. Яғни жазасын өтеу орындарындағы тәртібі мен басқасына қарамастан, ешқандай рақымшылдық жасалмайды.
– Жазалаудан гөрі қылмыстың алдын алу маңызды екенін айттыңыз. Ендеше, жемқорлықтың алдын алу шаралары қалай жүзеге асып жатыр?
– «Nur Otan» партиясы Еңбекшіқазақ аудандық филиалы жанындағы Сыбайлас жемқорлыққа қарсы іс-қимыл жөніндегі қоғамдық кеңестің жылдық жұмыс жоспары бар. Соған сәйкес мемлекеттік органдарда, бюджеттік мекемелерде Сыбайлас жемқорлыққа қарсы іс-қимыл бағдарламасының орындалуын үнемі қадағалап, ішкі және сыртқы мониторинг жұмыстарын жүргізіп отырамыз. Жемқорлық тәуекелдерін анықтау және жою, жемқорлыққа қарсы мәдениетті қалыптастыру, жемқорлыққа қарсы күреске қоғамды кеңінен тарту мақсатында жергілікті атқарушы органдардың қызметкерлерімен, түрлі әлеуметтік топтармен түсіндіру жұмыстарын өткіземіз. Өйткені параны беретін бар, алатын бар. Яғни сыбайлас жемқорлық – тек бір жақтан болатын қылмыс емес. Онда екі тарап бар екенін ескеру керек.
Осы орайда тұрғындарға айтарым, қоғамның қай бағытта өзгеретіні онда өмір сүретін әрқайсымызға тікелей байланысты. Сыбайлас жемқорлықтың алдын алуда әр азамат белсенділік танытуы қажет. Өзгерісті өзіңізден бастаңыз, жемқорлық әрекетке бармаңыз! Ондай жайтқа куә болсаңыз, бей-жай қарамай, 1424 тегін call-орталығына қоңырау шалыңыз. Қоғам дертіне айналған жемқорлықты бірлесе ғана жеңе аламыз.
– Жемқорлық фактілері жиі кездесетін салалар қандай?
– Статистикалық мәліметтерге сүйенсек, ішкі істер органдарында, мемлекеттік қызметтер саны бойынша көп қызмет атқаратын мемлекеттік мекемелер, сондай-ақ білім саласында да жемқорлық фактілері жиі тіркеледі екен. Дегенмен, соңғы уақыттарда мұндағы жемқорлықтың жолын кесу үшін көптеген тиімді жобалар іске асып жатыр.
– Ол жобалар жайында айтсаңыз...
– Мемлекеттік органдардың ашықтығын қамтамасыз ету мақсатында Ашық бюджеттердің интерактивті картасы жасалды. publicbudget.kz сайтынан кез келген түрлі әлеуметтік нысандарды салу, жөндеу және қызмет көрсету үшін қанша бюджет бөлінгенін көре алады. Мысалы, есігіңіздің алдында жөнделіп жатқан жолға қанша қаражат жұмсалғанын осы сайттан біліп, сапасына көңіліңіз толмаса, қандай да бір келеңсіздікті байқасаңыз, интерактивті карта арқылы хабарлама қалдыруыңызға болады. Түскен өтініштерге байланысты тиісті жұмыстар атқарылады. Одан бөлек, соңғы жылдары цифрландыру, мемлекеттік қызметтерді электронды форматқа ауыстыру қарқын алды. Мемлекеттік қызмет беруші мен қызмет алушы арасындағы тікелей байланыс көп болған сайын сыбайлас жемқорлық жасау тәуекелі де арта түседі. Осы тәуекелді болдырмау үшін кезінде енгізілген «бір терезе» қағидаты да тиімді жоба болды. Мұның барлығы да коррупцияның алдын алуда үлкен күш екені сөзсіз.
Сұхбаттасқан
Құралай МҰРАТҚЫЗЫ
Бір аптада (30.03 – 05.04.2021 аралығында) Еңбекшіқазақ ауданында ПТР сынама арқылы 221 адамнан коронавирус анықталды. Олар:
Тіркелген науқастардың әлеуметтік-кәсіби мәртебесі төмендегідей:
78 науқас – жұмыссыз
54 науқас – зейнеткер
27 науқас – мектеп оқушысы
15 науқас – мемлекеттік мекеме қызметкері
16 науқас – түрлі жеке кәсіпорындарда жұмыс істейді
11 науқас – мұғалім
9 науқас – балабақша тәрбиеленушісі
5 науқас – ұйымдаспаған бала
3 науқас – медициналық қызметкер
3 науқас – студент.
mezet
Елімізде Қазақстан Республикасының Тұңғыш Президенті Нұрсұлтан Назарбаевтың Жастар жылының ашылу салтанатында жарияланған тапсырмасына сәйкес «Жас маман» жобасы жүзеге асырылуда.
Жобаның мақсаты «Жас маман» жобасы шеңберінде колледждің материалдық-техникалық базасын халықаралық талаптарға сәйкес жабдықтау, сұранысқа ие мамандықтарды жаңғырту және білікті мамандарды даярлаудың халықаралық тәжірибесін енгізу арқылы Республикалық және Халықаралық World Skills чемпионаттарына студенттерді дайындау барысында шығармашылық қабілеттері мен қызығушылығын қолдау, жұмыс дағдысы мен тәсілдерін жаңғырту.
««Жас маман» жобасының шеңберінде колледждің оқу-өндірістік базасы жаңартылды. Студенттерді сұранысқа ие 100 мамандық бойынша оқыту мақсатында қажетті заманауи құрал-жабдықтармен жабдықталды. ІТ және құрылыс, коммуналдық шарушылық бағыттары бойынша оқу кабинеттері мен шеберханалары жаңа технологиялармен толықтырылды. Енді студенттер желілік құрылғыларды консольде де, графикалық интерфейсте де басқаруды үйренеді. Жаңа материалдық-техникалық база еңбек нарығында сұранысқа ие білікті кадрларды даярлауға мүмкіндік береді»,-дейді Талдықорған жоғары политехникалық колледжінің директоры Ерқат Биғалиұлы.
Колледждерді жаңғыртуға арналған жабдықтардың тізімі жергілікті атқарушы органдар мен колледждердің ұсыныстарына, жұмыс берушілердің талаптары мен WorldSkills стандарттарына сәйкес жасалады. Нәтижесінде Талдықорған жоңары политехникалық колледжінде World Skills жаттығу лагері құрылып, әртүрлі деңгейдегі World Skills чемпионаттарына қатысушыларды дайындауға және сертификаттауға мүмкіндік беріп отыр.
Басты оқу корпусының үшінші қабатында және оқу-өндірістік шеберханаларында ІТ және құрылыс, коммуналдық шарушылық бағыттарына арналған WorldSkills жаттығу лагері орналасқан. World Skills жаттығу лагерінде ІТ бағыты: «Web-дизайн және әзірлеу», «Прототиптеу», «Графикалық дизайн», «Желілік және жүйелік әкімшілендіру», «Ақпараттық кабельдік желілер», «Мобильді робототехника», «Бизнеске арналған IT-шешімдер», «Электроника», «Инженерлік графика Cad», «Заттар интернеті», «Бейнемонтаж», «Ұшқышсыз ұшу аппараттарын басқару», «Ақпараттық қауіпсіздік», «Баспа технологиясы» бойынша чемпионатқа дайындайды.
Сонымен қатар Құрылыс және коммуналдық шаруашылық бағыты бойынша: «Тас қалау», «Сырлау және сәндік жұмыстар», «Тақтайшалармен қаптау», «Бетон жұмыстары», «Ағаш ұста ісі», «Құрғақ құрылыс және сылақ жұмыстары» құзіреттіліктерін оқытуда.
Алматы облысының білім басқармасының ұйымдастыруымен Талдықорған жоғары политехникалық колледжінің базасында «WorldSkillsTaldykorgan» аймақтық кәсіби шеберлік чемпионаты өткізілген болатын. Аймақтық чемпионатқа 18 компетенция бойынша облыстағы 15 колледжден 99 білім алушы қатысты.
Айта кетейік, Талдықорған жоғары политехникалық колледжінің студенттері 16 құзіреттілік бойынша аймақтық чемпионаттан жүлделі орныдар алып, қазіргі уақытта Республикалық «World Skills Kazakhstan» чемпионатында дайындық үстінде.
Анар САБЫРОВА
5 сәуірде ауданымызда COVID-19-ға қарсы жаппай вакцинациялау басталды. Сол күннің өзінде Еңбекшіқазақ көпсалалы ауданаралық ауруханасында 465 адам «Спутник-V» вакцинасын алыпты.
Еңбекшіқазақ аудандық санитарлық-эпидемиологиялық бақылау басқармасының мәліметіне сүйенсек, 2021 жылғы 2 сәуірден бері ауданға коронавирусқа қарсы «Спутник-V» вакцинасы 1-компонентінің 3300 дозасы, 2-компонентінің 2100 дозасы жеткізілген. Егу жұмыстары Еңбекшіқазақ көпсалалы ауданаралық ауруханасы мен Шелек аудандық ауруханасында жүргізілуде.
Бүгінгі күні COVID-19-ға қарсы вакцинаның 1-компоненті ауданның 2851 тұрғынына салынған. Олар: 1528 медициналық қызметкер, 1213 ұстаз, 27 полиция қызметкері, 1 мемлекеттік қызметкер, түрлі созылмалы сырқаттары бар 19 науқас және басқа топта 63 адам. Екі компонеттің арасы – 21 күн.
Вакцинаның 2-компонентін ауданымызда 863 адам салдырыпты: 801 медициналық қызметкер және 62 ұстаз.
Еңбекшіқазақ көпсалалы ауданаралық аурухананың емхана меңгерушісі Жансая Әліпбаеваның мәліметінше, ауданымызда коронавирусқа қарсы вакцина салу жұмыстарын жүргізу үшін 5 пункт және 2 жылжымалы топ құрылған. Олардың төртеуі алғашқы медициналық-санитарлық көмек көрсету орталықтары және Еңбекшіқазақ көпсалалы ауданаралық ауруханасы. Вакцина жеткізілген бойда осы орталықтарда екпені жалғастыру жоспарланған.
Егу жұмыстарын жүргізуге арнайы дайындықтан өткен, егу жұмыстарын жүргізуге рұқсаты бар медициналық қызметкерлер дайындалды. Егу кабинеттері санитарлық талаптарға сай, қажетті құрылғылармен жабдықталған.
Орталықтардың мекенжайы:
Есік қаласы, Абай көшесі, 336. №212, 214 кабинеттер;
Есік қаласындағы саяжай, 8 км., 19-линия 465. №6, 7 кабинеттер;
Түрген ауылы, Құлмамбет көшесі, 45. №12 кабинет;
Бәйдібек би ауылы, Алмабеков көшесі, 1. №105 кабинет;
Бәйтерек ауылы, Комаров көшесі, 6. №9 кабинет.
Құралай МҰРАТҚЫЗЫ
Дәстүрді сақтап, салттан аттамаған қазақ халқы ислам дінін берік ұстанған. Харамнан тыйылып, адал ас ішіп, жақсылықты жанына серік еткен. Десек те, бүгінгі таңда бұл дәстүр жүйелі жалғасын таппай отыр. Алла Тағала харам еткен ащы су дастарханымыздың сәніне айналғандай.
Арақ Құранда «жасырып тұру» мағынасын білдіретін «хамр» деген сөзбен аталған.Бұл арақтың адам ақылын жасыратындығымен, улайтындығымен байланысты. Әйелдердің жүзін жасырып тұратын орамал да араб тілінде осымен түбірлес «химар» деген сөзбен аталады. Яғни «хамр» ақылды жасырып тұрса, «химар» әйелдердің жүзін жауып тұрады. Сондай-ақ, қамыр ашытатын ашытқының да «хамира» деп аталуы тегін емес. Демек, арақтың ең әуелгі кесірі адам ақылын алжастырып, істен шығаратындығында. Адамның бойындағы ең құнды нығметтердің бірі – ақыл десек, арақ ішуші өз қолымен өз ақылын, тек ақылын ғана емес, санасын да барынша улайды. Араққұмардың небір жамандыққа ұрынуы, дінге тіл тигізуі, күнә артынан күнә жасай беруі сананың улануынан туындайтын арсыз әрекеттерге жатады.
Қазіргі таңда бұл улы суды кейде кәрілер де, жастар да, еркектер де, әйелдер де ұрттап қойып жүргеніне куәміз. Тіпті кейбір жанұяларда бала-шағасы әкелерінің бір күн арақ ішпей, сау келуін армандайтын жағдайға жеткені шындық. Әкелері көшеде құлап жатып, құрбы-құрдастарына күлкі етпесе, үйге келіп ұрыс-керіс шығарып, отбасының берекесін алмаса, бір күн болса да айқай-шусыз тыныш отырып тамақ ішсе, бейкүнә балалар үшін ең үлкен бақыт сол. Қаншама адамдар осы тентек судың салдарынан зардап шегуде. Арақты ішіуден туындайтын озбыр қылықтардың зияндығынан дініміз исламда бұл ішімдікке қатаң тыйым салынған.
Алла Тағала Құран Кәрімде: «Әй, мүміндер! Арақ, құмар, бұлттар, және бал ашатын оқтар лас, шайтанның істерінен. (Ақыретте ауыр азаптан) құтылу үшін одан сақтаныңдар (Ниса сүресі, 43)» деп ескертті.
Ал Әнас ибн Малик (р.а) жеткізген хадисте былай делінген: «Пайғамбарымыз (с.ғ.с) араққа қатысты он нәрсеге лағынет айтты: жасаушыға, жасатушыға, ішкенге, ішкізгенге, көтергенге, көтерткенге, сатушыға, сатып алушыға, сыйға тартушыға, арақты сатып, ақшасын пайдаланғанға».
Мінеки, бұлардың бәрі де лағнеттелген істер. Ал Пайғамбарымыздың лағынеті екі дүниеде де бақытсыздыққа апарары сөзсіз.
Тәбиғин ғалымы Ияс ибн Мұғауияһтан бір парсы диқаны сұраған екен:
– Осы адамды мас қылатын ішімдіктер жайында не айтасың? Оның харам қылынуы неде? Ол тек қана отқа қайнатылған, ашы-тылған жеміс пен су ғана емес пе? Ондағы су да, жеміс те мұбах (рұқсат етілген) қой.
– Айтып болдың ба, диқаншы, әлде тағы да айтар сөзің бар ма?
– Жоқ.
– Онда жақсылап тыңда. Алақаныма су толтырып алып ұрсам, саған зақым келтіре ме?
– Жоқ.
– Бір уыс топырақпен ұрсам, бір жеріңді ауырта ма?
– Жоқ.
– Бір уыс сабан алып ұрсам ше?
– Жоқ.
– Топырақ, сабан және суды араластырып, жақсылап илеп, кейін күнге кептіріп, қатқан кезде ұрсам, зақым келтіре ме?
– Иә, тіптен өлтіріп қоюың мүмкін.
– Арақ та сондай. Құрамына жеткілікті нәрселерді жинап, ашытсаң, харам болады.
Жаза берсек, шайтанның суының зиянын айғақтайтын басқада ғибратты оқиғалар көп-ақ. Қорыта айтқанда, ақыл-естен айыратын ішімдік Құран аяттары мен Пайғамбар хадистерінде анық тыйым салынғаны түсінікті. Қала берді, бұл араққа құмарлық халқымыздың дәстүріне де жат қылық. Өкінішке қарай, соңғы жүз жылдан бері біздің өмір сүріп отырған қоғамда өте көп көрініс беретін болды. Ақиқатында арақ адамға абырой әпермейді, керісінше ардан айырады.
Сапархан ТӨРЕҚҰЛОВ,
ауданның бас имамы
Алматы облысының 26 жасар тұрғыны Нұрас Тәлім гидропоника көмегімен жасыл жемшөп өсіре бастады. Гидропоника – топырақты пайдаланбай, құрама жемге балама бола алатын экологиялық таза өсімдікті өсіру тәсілі.
Нұрас кәсібін мемлекеттік бағдарламаға қатысудың арқасында бастап отыр. «Атамекен» кәсіпкерлер палатасының мамандары жас кәсіпкерге идеясын іске асыру үшін «Бастау Бизнес» кәсіпкерлік негіздері жобасы бойынша оқытудан өтіп, кейін мемлекеттік грант байқауына және жеңілдетілген несиелендіру бағдарламасына қатысу мүмкіндігін ұсынды.
Кәсіпкер Талғар ауданының Қарабұлақ ауылында тұрады. Негізгі мамандығы – инженер-техник және автоэлектрик. Алайда, мамандығы бойынша ұзақ жұмыс істемеді. Себебі кәсібін ашып, өзіне жұмыс істеуге және қаржылай тәуелсіз болуға ұмтылды.
«Кәсіпкер болу мақсатым болды. Қоғамға бір пайдамды тигізіп, алға қойған армандарды орындағым келеді. «Бастау Бизнес» жобасына келіп, өзімнің арманыма бір қадам жасадым деп есептеймін. Міне, сондықтан да қиындығы мен қуанышы қатар кәсіпкерлік жолды таңдадым. Ұзақ уақыт бойы айналысатын бизнестің түрін зерттеп, гидропоника сияқты инновациялық бағытты таңдадым. Бұл сала біздің елімізде енді ғана дами бастады, әлеуеті жоғары», – дейді кәсіпкер.
Өткен жылы Нұрас «Бизнестің жол картасы – 2025» бағдарламасы бойынша гранттар байқауына қатысты. Оның өсіп келе жатқан дәнді пайдаланып, гидропоникалық жасыл жемшөп өсіруді ұйымдастыру және оны түйіршіктеу жобасы инновациялық деп танылып, 2,5 млн теңге көлемінде грант бөлінді.
Кәсіпкердің айтуынша, қаражатқа шағын жылыжай салып, гидропоникалық қондырғы, жабдықтар, дәндер сатып алынды. Қазір жылыжайда арпа, бидай және жүгерінің бірнеше түрі өсіріледі, сонымен қатар бидай өскіндерінен дәрумендер шырыны алынады. Шағын жылыжайдың айына бір тоннаға дейін жемшөп өсіруге қауқары бар. Шөп топырақсыз өсірілетіндіктен, қосымша салымды қажет етпейді. Тек жылыжайда әрқашан ерекше микроклимат сақталуы керек.
«Инновациялық жобамызға бірнеше ай ғана болды. 2020 жылдың соңынан бастап жұмыс істей бастадық. Қазір серіктестермен әріптестікті жолға қойып жатырмыз, бірқатар мүдделі сатып алушыларымыз бар. Жалпы, жасыл жемшөп – малдың негізгі тамақтануына арналған жем қоспасы. Гидропоникада өсірілген жасыл жемде малға қажетті барлық қажетті қоректік заттар бар екендігі дәлелденген. Сондықтан пайдалы, әрі сіңімді ас болады. Ең бастысы, құрама жемге балама бола алатын экологиялық таза өнім», – деп атап өтті жас кәсіпкер.
Енді кәсіпкер өңірдегі ірі мал шаруашылығы кешендерімен ынтымақтастықты дамытпақшы. Сондай-ақ келесі жылы малға арналған түйіршіктелген жасыл жемшөп өндірісін ашуды жоспарлап отыр.
Сәбиді балабақшаға бермей, отбасында тәрбиелеу ата-анаға үлкен жауапкершілік жүктейтіні сөзсіз. «Отбасылық тәрбие» әртүрлі педагогикалық қағидаларға бейімделмей, өзіңіздің ыңғайыңызға қарай тәрбиелеуге мүмкіндік береді. Баланы үйде тәрбиелеудің қандай жолдары бар?
Дос табу оңай ма?
Өз қатарластарымен тез тіл табысып, достаса білу, олармен асыр салып ойнау бала үшін аса маңызды. Мұндай қызығушылық бүлдіршіндер бойында 3 жасқа таяған кезде тез дамиды екен. Балаңыз ең алдымен өзіңіздің араласып жүрген достарыңыздың балаларымен бірге ойнап, жақын араласа бастайды, бір-бірінен көп нәрсені үйренуге тырысады. Бұл жерде жас айырмашылығы маңызды емес. Екіншіден, бір-бірімен жақын қарым-қатынас орнатып, тіл табысатын орта – балалар алаңы. Бұл жерде әртүрлі жастағы көрші-қолаңның балалары жиі кездесіп, бірге ойнауға таптырмайтын мүмкіндік туады. Үйдің маңындағы алаңда ойнаған балалар өзара орын алатын жанжалды, кейбір келеңсіздіктерді болдырмай, оны өз беттерінше шешуге дағдыланады. Құмнан әртүрлі ойыншықтар жасап, өзін және өзінен кіші балаларды қорғауды да дәл осы жерде үйренеді. Үшінші ортаға әртүрлі үйірмелер мен балалардың ой-өрісін дамыту орталықтарын жатқызуға болады. Бұл жерде бала кіммен ойнап, кіммен бір партада отыру қажетін, сабақтан кейін кіммен бірге жүру керегін өзі ойлап, дұрыс таңдау жасай біледі. Балабақшада немесе осындай үйірмелерде бір топта болып, бір-бірін жақсы танитын балалар мектеп табалдырығын аттаған сәтте де бір-бірімен тез тіл табысып, араласып кетеді.
Осы тұрғыдан алып қарағанда, отбасында тәрбиеленген бүлдіршіндер мектепке жаңа келгенде өзін ыңғайсыз сезінуі мүмкін. Мұндай қолайсыздықтың алдын алу үшін ата-ана баласын мектепалды даярлық тобына беруіне болады. Сол жерде ол өзінің болашақ сыныптастарымен алдын ала танысып, бір-біріне бой үйретуіне мүмкіндік туады. Мұндай тәжірибенің мектепке алғаш барған баланың өзін еркін сезініп, өзін өзгелермен бірдей ұстауына тигізер пайдасы зор.
Өзіңізге қалай уақыт табуға болады?
Ата-ана кей уақытта тыныштықты, жайлылықты қалайды. Ал керісінше, балалар өздеріне уақыт бөлінгенін қалап, бірге ойнағысы келеді немесе әңгімелесуге құлшынып тұрады. Күні бойы балабақшада болып, қатарластарымен ойнап келген балалардың өзі кешкілік ата-анасымен сөйлесіп, тағы да ойнағысы келетіні сөзсіз, ал үйде тәрбиеленетін балаға тәулік бойы көңіл бөлу аса қажет. Мұндай жағдайда артынан опық жеп жүрмес үшін баланы тәрбиелеп отырған ата-ана, ата-әжесі немесе тәрбиеші екі жаққа да тиімді әдіс-тәсілдерді қолдана білгені жөн.
Бірлесіп әрекет ету аса маңызды. Ыдыс-аяқтарды жуып тазалағанша кішкентай нәрестеңіздің қолына пластик ыдыстарды беріп қойыңыз. Ал 3-4 жастағы баланың сізге көмек көрсетіп, демеу бола алатыны сөзсіз. Өзіңіз бір жұмысты тындырып жатқан кезде балаңыз сізге қолқабыс етсе, жұмыстың тез аяқталатынын, одан кейін барып бірге кітап оқып, қуыршақ ойнауға болатынын айтып түсіндіріңіз. Ал егер газет-журнал оқып, жай ғана дем алып жатқыңыз келсе, ортақ келісімге келуге болады. Балаңыздың қолына қағаз, қарындаштар беріп, сурет салуын тапсырыңыз. Ол сурет салып болғанша сіздің де 15-20 минут дем алуыңызға мүмкіндік туады. Бір ескеретін жайт, қайшы, пышақ сынды өткір, кескіш заттарды балаңыздың көзінен таса жерге алып қойғаныңыз жөн.
Ал телефон арқылы сөйлесу мүлдем бөлек әңгіме. Телефон тұтқасын алып, біреуге қоңырау шалған уақытта балаңыздың жылап, мазалана бастайтыны белгілі ғой. Мұндай кезде кішкентайыңыздың бойында бір жағынан қызғаныш сезімі туындаса, екінші жағынан әуесқойлық пайда болады. Сол себепті, телефон тұтқасын балаңызға беріп, аздап сөйлестірген абзал. 1-2 минут сөйлескеннен кейін баланың қызығушылығы төмендеп, әуестігі басқа нәрсеге ауады. Сізде де бос уақыт пайда болады.
Баланы дамыту
Бала өсіп, ой-өрісі дамыған сайын «Жас ерекшелігіне сай білім бере алып жатырмын ма?», «Тәрбие бағыты дұрыс па?» деген сұрақтар ата-ананы жиі мазалайды. Мұндай жағдайда кітапта жазылған қағидалар немесе құрбыларыңыздың айтқан кеңесі бойынша емес, балаңыздың талап-тілектеріне және мүмкіндігіне сүйенген жөн. Мұндай кезде сүйікті ананың қатал, талапшыл мұғалімге айналып кетпеуі аса маңызды. Сондықтан «Оп-оңай нәрсені қалай білмейсің? Мен қалай айттым, солай орында» деген сияқты сөзден сақтанып, арадағы шиеленісті болдырмау үшін балаңызға дұрыс бағыт беріп, арнайы бағдарламаларға сүйене отырып оқытатын мамандардың көмегіне жүгінген дұрыс болар еді.
Отбасында тәрбиеленген ұл-қыздар ерке болып өседі, көп нәрсеге икемдері бола бермейді деген – бос сөз. Ол баланың балабақшаға барған-бармағанына байланысты емес, тәрбиешілеріне байланысты. Егер сіз болмашы жараға, сызатқа көңіл бөлмей, өзге балалармен арадағы қарым-қатынасына килікпей, барлық өтінішін орындай бермесеңіз еркелік, шолжаңдық, төзімсіздік сияқты қасиеттер бала бойына жоламайды.
Тәртіпке қатысты бірер сөз
Уақытты үнемдеп, барлығын дұрыс ұйымдастыра білсеңіз тілазар баланың өзін икемге келтіруге болады. Балаңызды үйде тәрбиелеп отырсаңыз, алдын-ала жасалған кесте бойынша жүріп-тұрған ыңғайлы. Ең бастысы, сол кестедегі талаптардың барлығының дер уағында орындалуын қадағалау қажет.
Құралай МҰРАТҚЫЗЫ
ҚР БҒМ Ұлттық тестілеу орталығының директоры Дидар Смағұлов ҰБТ-дан кейінгі аппеляция талаптарын түсіндірді.
«Тестілеу аяқталғаннан кейін, талапкер апелляцияға өтініш бере алады. Егер сұрақтардың құрамына немесе техникалық себептерге байланысты апелляцияға беретін болса, оның 30 минут уақыты болады. Отырған орнындағы компьютерден апелляцияға бере алады. Апелляция 30 күннің ішінде қарастырылады және оның нәтижесі талапкердің жеке кабинетінде көрсетіледі», - деді Д.Смағұлов Орталық коммуникациялар қызметінде.
Биылдан бастап ҰБТ электронды форматта тапсырылады және нәтиже тестілеу аяқталғаннан кейін бірден шығады. Тағы бір ерекшелік Ұлттық бірыңғай тестілеуді екі мәрте тапсыруға болады.
Тестілеуге 4 сағат (240 минут) беріледі. ҰБТ нәтижесі бойынша талапкер ең жоғары 140 балл жинай алады.
Әрине, қазіргі эпидемиологиялық жағдайға байланысты ҰБТ барысында барлық санитарлық-эпидемиологиялық талап қатаң сақталады. ҚР БҒМ жоғары және жоғары оқу орнынан кейінгі білім департаментінің директоры Әділет Тойбаев: «Ғимаратқа кіргізу маскалық режимді сақтай отырып, кемінде 2 метр арақашықтық арқылы іске асырылады. Әрбір талапкер дизинфекциядан өтеді және әрқайсысының оргәйнекпен қоршағалған өзінің орны болады», - деді.
Тестілеуге кіргізу кезінде қатысушылардың аяқ киімдері мен қолдары арнайы құралдарымен өңделеді. Бет маскасының дұрыс тағылуын қадағалау мен температураны өлшеу арнайы Face ID планшетінің көмегімен жүзеге асырылады.
Тест тапсырушыларды кіргізу және аудиторияда отырғызу кезінде әлеуметтік қашықтық сақталады. Аудиториялар желдетіліп, дезинфекциялық құралдармен өңделеді. Санитарлық нормаларға сәйкес ата-аналар мен мұғалімдерге ҰБТ өткізу пунктінің аумағында болуға тыйым салынады. Олар үшін аудиториядан бейнетрансляция қамтамасыз етіледі.
mezet