Жексенбі, 28 Мамыр 2023 21:11

Еңбекшіқазақ ауданы әкімдігінің халықты жұмыспен қамту орталығының директоры Досжан СЕЙДАХМЕТОВ: Мемлекеттік бағдарламалар оң нәтижесін беруде

Президент Қ.Тоқаев өзінің Қазақстан халқына арнаған «Сындарлы қоғамдық диалог – Қазақстанның тұрақтылығы мен өркендеуінің негізі» атты Жолдауында еңбек нарығын цифрландыру, жұмыспен қамту орталықтарының жұмысын реформалау, нәтижелі жұмыспен қамту және жаппай кәсіпкерлікті дамыту, тұрғындарды жұмыспен қамтуды арттыруды, жұмыспен қамту орталықтарының жұмысын қарқынды жүргізуді тапсырған болатын. Тиісінше, тұрғындарды жұмыспен қамтудың оңтайлы бағдарламалары әзірленіп, екі қолға бір күрек тапқандардың саны арта түсті. Осылай деген аудандық халықты жұмыспен қамту орталығының директоры Досжан Сейдахметовпен сұхбаттасудың сәті түсті.

– Досжан Қайратұлы, әлем елдерін тұрақсыздық жайлап, жұмыссыздық белең алған уақытта азаматтардың тұрақты жұмыспен қамтылуы аса маңызды. Осы бағытта  жыл басынан бері қандай жұмыстар атқарылды?

– Оныңыз рас, жұмыссыз адамдар санының азаюы – ел экономикасының артуына оң ықпал етеді. Сондықтан, біздің орталық аудан азаматтарын тұрақты жұмысқа орналастыруда жүйелі жұмыс атқарып келеді. Қазіргі таңдағы мәлімет бойынша, жыл басынан бері орталыққа 4674 адам жүгініп, олардың 3095-і жұмыссыз ретінде тіркелді. Бүгінде оларды жұмыспен қамту бойынша ауқымды шаралар жүзеге асуда. Нәтижесінде, ақылы қоғамдық жұмысқа 821 азамат, әлеуметтік жұмыс орындарына 63 адам тартылды. Сонымен қатар, 58 азамат жастар тәжірибесіне, 2 азамат ұрпақтар келісім-шарты бойынша, 59 азамат алғашқы жұмыс орындарына жолдама алды. Ал 363 адам жұмысынан айрылуына байланысты жәрдемақы алады.

– Биылғы жоспарларыңыз қандай? Қанша адамды жұмыспен қамту көзделуде?

– Жоспарларымыз ауқымды. Атап айтар болсақ, 2023 жылы 9811 жұмыс орнын құру жоспарда тұр. Жасыратыны жоқ, осыншама азамттың барлығын тұрақты жұмысқа орналастыру мүмкін емес. Сондықтан, жоғарыда аталған жұмыс орнының 7 765-і тұрақты,  2 858-і уақытша жұмыс.

– Қазіргі уақытта бұл жоспар қаншалықты орындалды?

– Осы күнгі мәлеметке сүйенсек, аудан бойынша 3444 жұмыс орны құрылды. Яғни, жоспар 35,1 пайызға орындалды. Оның 2 294-і  тұрақты жұмыс орны және 1 150-і уақытша жұмыс орындары.

– Мемлекет басшысы кәсіпкерлікке қолдау көрсетуді арттыруды айтқан еді. Бұл бағыттағы жұмыстарыңыз қалай жүзеге асуда?

– Иә, кәсіпкерлік – экономиканың негізгі тіректерінің бірі. Сондықтан бұл саланың дамуына баса назар аударылуда. Бүгінде халықты жұмыспен қамту орталығы арқылы жүзеге іске асып жатқан «Кәсіпкерлікті дамытудың 2021-2025 жылдарға арналған ұлттық жобаның» 3 бағыты бойынша қызмет көрсетілуде.

Бірінші бағыт бойынша аудан аумағында орын алған нарықтық жұмыс орындарының қажеттілігіне байланысты бағдарлама қатысушыларын техникалық және кәсіптік білімі бар кадрларды даярлау және қысқа мерзімді қайта даярлау курстарында 250 адамды оқыту жоспарланып отыр. Қазіргі таңда жұмыс берушілердің сұрауы бойынша «KazSafetyGarments» оқу орталығына 15 тігінші  және Алматы облысының қызмет көрсету және тамақтандыру саласындағы инновациялық технологиялар колледжіне 18 тігінші, 9 аспаз және 7 кондитер мамандықтары бойынша азаматтар оқуға жіберілді. 

Бағдарламаның екінші бағыты ауылдық елді мекендерде жаппай кәсіпкерлікті дамытуға бағытталған. Осы орайда «Кәсіпкерлікті дамыту жөніндегі 2021-2025 жылдарға арналған ұлттық жобаның» қатысушыларына жаңа бизнес идеяларды іске асыруға ағымдағы жылы 110 азаматқа 400 айлық есептік көрсеткіш (МРП) мөлшерінде мемлекеттік грант беру жоспарланған. Бизнес жоспарларын қорғап, грантқа ие болғандар да бар. 52 үміткер 72 млн 300 мың теңге мемлекет тарапынан қайтарымсыз қаражат алды.

«Бизнес бастау» жобасы шеңберінде биыл 280 азаматты кәсіптік оқытуға жіберу жоспарланып отыр.

Үшінші бағыт халықты жұмыспен қамтуға жәрдемдесу және еңбек ресурстарының ұтқырлығы арқылы еңбек нарығын дамытуға негізделген. 2023 жылы ақылы қоғамдық жұмыстарды ұйымдастыру аясында 944 адамды жұмыспен қамтамасыз ету жоспарланып отыр, қазіргі таңда 821 азамат жолдама алды. Әлеуметтік жұмыс орындарын ұйымдастыруға 74 азамат жоспарланып, бүгінде 63 адам жолдама алды. Жастар практикасынан өтуге жұмыс берушілердің өтінімдеріне сәйкес жыл соңына дейін ауданның 161 түлегін жұмысқа жіберу жоспарланып отыр, қазіргі уақытта 58 түлек жолдама алды.

– Жұмыспен қамтуға бағытталған, әсіресе, жастарға арналған бағдарламалар өз тиімділігін көрсетіп жатыр  ма?

– Әрине, жұмыспен қамту орталығына жүгінген азаматтарды, жастарды жұмысқа орналастыру арнайы бағдарламалар шеңберінде жүзеге асуда. Атап айтар болсақ, «Алғашқы жұмыс орны» жобасы аясында жыл соңына дейін 102 адамды жұмыспен қамту көзделуде. Бүгінде 59 азамат жұмысқа жолдама алды.

«Ұрпақтар келісім-шарты» жобасы аясында 6 жас маманды жұмысқа орналастыру жоспарланған, 2-еуі жұмысқа орналасты.

– Осы жылдан бастап «Күміс жас» пилоттық жобасы қолға алынғаны бізге мәлім. Жобаға толығырақ тоқталып өтсеңіз.

– «Күміс жас» жобасына қатысушылар – зейнеталды жастағы жұмыссыз адамдар. Бағдарлама аясында зейнеткерлікке шығуға 2 жыл қалған азаматтар уақытша жұмыспен қамтылады. Жобаға қатысушылардың жалақысының жартысын мемлекет, жартысын жұмыс беруші төлейді. Салықтарды, міндетті әлеуметтік аударымдарды, пайдаланылмаған еңбек демалысына өтемақы мен банк қызметтерін ескере отырып субсидияның ең жоғары шегі – 30 АЕК, яғни, 91 890 теңге. Экологиялық үстемақы бойынша төлемдер есепке алынбайды. Мысалы, жұмыс беруші 180 мың теңге жалақы белгілесе, онда оның 90 мыңын мемлекет төлейді. Егер де айлығы 200 мың болған жағдайда мемлекеттен 30 АЕК мөлшерінен артық төленбейді. «Күміс жас» жобасына қатысу мерзімі 12 айдан аспайды. Жобаға қатысу мерзімі аяқталған соң, жұмыс беруші зейнет жасына жақындаған адамды зейнетке шыққанға дейін тұрақты жұмысқа алуға міндетті.

– Жобаға қатысуға ниет білдірушілер бар ма?

– Пилоттық жобаның жоспары бойынша биыл 200 азаматты жұмыспен қамту жоспарланған. Қазіргі таңда 152 адам түскен өтінімдер бойынша жолдама алып, жұмыстарын атқаруда.

– Сұхбатыңызға рахмет.

Тілдескен С.НҰРАДИН.

Оқылды 1258 рет

Соңғы жаңалықтар

Нау 18, 2024

Құрылтай

Кешегі Атырау қаласында өткен Ұлттық құрылтайда Президент Қасым-Жомат Тоқаев күн…
Нау 14, 2024

Түйінді түйіткілдер оң шешімін…

Жуырда аудандық мәслихаттың тұрақты комиссияларының бірлескен отырысы өтті. Отырыстың күн…
Нау 07, 2024

Аудан әкімінің міндетін атқарушы …

Ардақты ақ жаулықты аналар, аяулы арулар! Сіздерді 8 наурыз – Халықаралық әйелдер күні…
Ақп 22, 2024

Отбасы – тәрбие бастауы

Жақында Азат орталау мектебінде Рахат округінің аналар кеңесінің төрайымы Райхан…
Ақп 22, 2024

Ерлік – елге мұра, ұрпаққа ұран

Кеңес әскерінің Ауған жерінен шығарылғанына 35 жыл толуына орай Есік қаласында ауқымды…
Ақп 21, 2024

Алматы облысы Еңбекшіқазақ ауданы…

Мен Тустукбаев Бағлан Ахихатұлы, 1989 жылы 7 сәуірде Алматы облысы, Еңбекшіқазақ ауданы,…
Ақп 21, 2024

Алматы облысы Еңбекшіқазақ ауданы…

Мен, Әділхан Азамат Әділханұлы, 1993 жылы 11 қаңтарда Алматы қаласында дүниеге келдім.…
Ақп 21, 2024

Алматы облысы Еңбекшіқазақ ауданы …

Мен Тойғанбеков Бақберген Бауыржанұлы 1988 жылы 21 сәуірде Еңбекшіқазақ ауданы Көктөбе…

Күнтiзбе

« Наурыз 2024 »
Дс Сс Ср Бс Жм Сб. Жк
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Кез келген материалды
көшіріп басу үшін
mezet.kz - ке гиперсілтеме
қою керек 

Яндекс.Погода

 

https://kurs.kz/ - Курсы валют в обменных пунктах г. Алматы и других городах Казахстана

Жарнама

для детей, достигших 12 лет