Мен, Айжан Акыжанова Алматы облысы, Еңбекшіқазақ ауданы, «Б.Майлин атындағы ОМ» КММ-де география пәнінің мұғалімі болып қызмет етемін. Қазіргі таңда мектеп ұстаздары қашықтықтан жұмыс жасап жатыр. Сондықтан мен мектебіміздің басшысы Мукаева Айгул Омарованы және мектеп ұжымын, барша Қазақстандық ұстаздар қауымын, қазан айының бірінші аптасында күз айының алғашқы белгісімен қатар келетін кәсіби төл мерекемен шын жүректен құттықтаймын! Ұстаздың атқаратын қажырлы қызметі өлшеусіз тәжірбиеге толы іргелі ізденістен тұрады емес пе? Сол себепті барша әріптестеріме болаттай бекемділік пен сарқылмас сабыр және жемісті жетістіктер тілеймін. Жас ұрпаққа саналы білім беру барысында жаңа заманға сай жігерлі де намысты ұлдарымызды, инабатты да ибалы қыздарымызды қазақы болмыспен тағылымды тәрбиелеу үшін бар білгеніміз бен түйгенімізді аянып қалмайық.
Ұстаз… Қандай қасиетті, қастерлі сөз десеңізші! Әр бір адамның жүрегінен ерекше жылулық нұрын себетін аяулы тұлға емес пе? Адам баласының жүрегінде қадір тұтып, құрметтейтін екі ұғым болса, соның бірі ұстаз. «Ұстаздан тәрбие алған» немесе «ұстаз алдын көрген» деген сөздер құлаққа «ананың тәрбиесін алғанмен» бірдей ұштасып жатады.Менің ойымша, кез-келген адам ұстаз бола алмайды. Себебі, ұстаздық өнердің тағылымы терең. Қасиетті өнер әр адамның бойына қона бермейді. Шын ұстаз болу үшін де табиғи дарын, ізгілікті ізденіс, ерен еңбек қажет. Шәкірт тәрбиелеуде тәлімгердің алар орны ерекше. Өйткені мұғалім әр бір баланың бойындағы қабілеті көзін ашып, үлкен өмірге бейімдейді. Ғылым иесі, ғалымда, ел қорғаған батыр да, тілінен бал тамған ақын да, темір балқытқан жұмысшыда, егін салған диқан да, мал бағып терін төккен шопан да, бәрі бәрі ағартушы ұстаздан білім алып, тәрбие нәрімен сусындаған. Сондықтан да парасатты ұстаздарға бүкіл адам баласы құрметпен бас иеді. Қиындығы мен қоса қызығы да жетерлік, ең бастысы жауапкершілігі жоғары бұл мамандықты таңдағандар береке тапқан кәсібін мәртебелі мақтаныш санайтыны даусыз. Өйткені біздің алдымызда мектеп табылдырығын тарыдай болып аттаған бүлдіршіндерді он жыл бойы баптап, таудай азамат ретінде қалыптастыру міндеті тұр. Демек басқа мамандық иелерінің баршасы ұстаздарына борыштар. Шәкірті өзінен озған ұстаздың еңбегі ақталғаны. Өйткені қазіргі өмірдің заңы даму, ілгерлеу, озу. Қытай философының «Маған жай айтсаң – ұмытамын, көрсетсең есімде сақтаймын, ал өзіме іс- әрекетке қатыстырсаң үйренемін» деген даналығы көп нәрсені ұқтырып тұрғандай. «Ұстаз болу өз уақытында аямай, өзгенің бақытын аялау» деп Мұхтар Әуезов айтқандай, уақытпен санаспай балалардың болашағы үшін аянбай жұмыс жасаған мұғалімнің бейнеті еш кетпейтіндігі анық.
А. Акыжанова,
«Б.Майлин атындағы ОМ» КММ
География пәнінің мұғалімі,
Алматы облысы
Еңбекшіқазақ ауданы
