«Тізерлеп жүріп түңілткеннен, тік жүріп өлген артық» деген елміз. «Жауға жалынба, досқа тарылма» деген де қазақ. Ендеше, дұшпанға тастай қатты болу, досқа балдай тәтті болу – қанымыздағы қасиет. Осындай құдіретті намыс сан соқпақта сүрінсе де, құламады. Қайта алмас қылыштай тас шауып қайралды. Ел мен жерге, ар мен ұжданға келгенде атқа қонды ерлерім айбарлы. Қазақ тарихында Қарқара көтерілісі атауымен қалған сонау 1916 жылғы оқиға ғасыр өтсе де жадымызда жаттаулы. Ұзақ Саурықов, Жәмеңке Мәмбетов, Жаңабай Құдайбергенов, Қазыбай Шарманов, Әбубәкір Сұлтанбеков сынды батырлар, Т.Бокин, Ж.Ниязбеков, Т.Рысқұлов, Ә.Жангелдиндей қазақ зиялылары патша жарлығына қарсы шықты. Себебі, жарлықтың көксегені отарлау еді. Демек, 1000-нан астам қол жинап, Ереуіл төбеге келіп ту тіккен ерлеріміздің есімі жадымызда мәңгі.

«Біз бүгінгі бейбіт тірлігіміз үшін, Қазақстан деп аталатын Республиканың жер бетінде барлығы үшін тарихтың әр тұсында осы елді, осы жерді қорғаған қайсар жандардың әруағының алдында қашанда қарыздармыз». Мемлекет басшысының осы бір өрелі ойы Тәуелсіздік жолында құрбан болған бабаларымыздың арман-үмітін ақтағандай. Иә, олар ел басына күн туғанда етігімен қан кешті. Сондықтан болар, ерлік – елге мұра. Сол мұраны қадірлеп, тарихын танымаған жан, текті ұрпақ боп жарымайды.

«Тәуелсіздік. Келісім. Болашағы біртұтас ұлт. «Мәңгілік Елге» апаратын басты құндылықтар міне, осылар» – деді Елбасымыз Қазақстан халқы Ассамблеясының кезекті ХХІV сессиясында. Осыған орай жақында ел қалаулылары Қазақстан халқы Ассамблеясының мүшесі Асылы Осман, ҚР Парламенті мәжілісінің депутаты, жерлесіміз Зағипа Балиева ауданға ат басын бұрды. Жұртпен емен-жарқын жүздесті, сессияда қабылданған патриоттық актіні жан-жақты түсіндірді. Кейіннен аудан әкімдігінің мәжіліс залында кеңейтілген отырыс өткізді. Оған аудан атқамінерлері, халық қалаулылары, ақсақалдар алқасы, әйелдер кеңесі, ҮЕҰ төрағалары қатысты. Келелі кездесуді аудан әкімі Бинәлі Ысқақ жүргізіп отырды.

Қайғы-қасіретімен халықты зар жылатқан Отан қорғау соғысы Жеңіспен аяқ-талғанда:

Қан майданды қақ жарып,

Аман келсе жауынгер;

Ауыл түгел қарсы алып,

«Нағыз ер» деп таныды ел.

Келмей қалса біліп пе ең,

Өзіңдей жас арыстан.

Тосып ана үмітпен,

Қабырғасы қайысқан.

Әр ауылда бірі әкеден, бірі баладан, бірі жардан, енді бірі бауыр-туыстан айырылып, аза тұтса да, азат күн орнаған қуанышқа тәубе айтып, бейбіт күннің берекесін беріктеуге жұмылды. Жанды жадыратқан Жеңістің шуақты нұрын шашқанына да, міне, 71 жылдың жүзі болыпты.