«Nur Otan» партиясы аудандық филиалы төрағасының бірінші орынбасары Қуат Байғоджаев, аудандық мәслихат депутаттары Бағдат Рахимов, Бекболат Алтаев Шелек ауылындағы политехникалық колледждің құрылысымен танысып,  мониторинг жүргізді.

Бүгінде оқу ордасының күрделі жөндеу жұмысына 63 адам жұмылдырылған. Мердігер мекеме - «ПСК Градцентр» жауапкершілігі шектеулі серіктестігі. Оқу ордасының жөндеу жұмыстары 31 наурызда аяқталады деп жоспарлануда. Осыған орай, тағы да жұмыс күші жұмылдырылмақ.

Құрылыс алаңына арнайы барған халық қалаулылары жұмыс барысымен танысып, мердігер компания өкілдеріне құрылысты сапалы жүргізіп, мерзімінде аяқтау керектігін тапсырды.

Ілия СҰЛТАН

«Nur Otan» партиясы аудандық филиалы төрағасының бірінші орынбасары Қуат Байғоджаев және аудандық мәслихат депутаттары Бағдат Рахимов, Камшат Қарағұлова Шелек ауылындағы спорт мектебінде болып,

мекеме директоры, екі дүркін әлем кубогінің иегері, Еуропаның екі дүркін чемпионы, Азия чемпионы Елмұрат Қайыпжановпен кездесті, болашақ чемпиондарды тәрбиелеп жатқан оқу ордасының жұмысымен танысты.

Жақында ғана басшылық қызметке тағайындалған Елмұрат Мұқашұлы сала төңірегіндегі жаңалықтарымен, алдағы жоспарларымен бөлісті. «Ауыл спортын дамытудағы мақсатымыз – спортшы ғана емес, еліне жанашыр ер азамат, нағыз патриот қалыптастыру», – дейді Елмұрат Мұқашұлы. Сөзіне сүйенсек, қазіргі уақытта бүркітшілік, саятшылық, атқа отыру сынды ұлттық спорт түрлері бойынша сайыстар өткізілуде. Сондай-ақ, Бартоғай ауылдық округіндегі спорт кешенінде көркем гимнастика сұранысқа ие.

– Қандай сала болсын, үздік атанып, чемпиондыққа ұмтылу керек. Ол үшін жалқаулықтан бойды аулық ұстау, еңбек пен жігерді жанға серік ету қажет. Осындай ізгі қасиеттерді шәкірттерімнің бойына сіңіріп, олимпиада жеңімпаздарын шығаруға барымды саламын, – деді Елмұрат Қайыпжанов.

Ілия СҰЛТАН

Алғыс айту күні – Қазақстан халқын біріктіруге бағытталған «Мәңгілік Ел» жалпыұлттық патриоттық идеясының, қазақстандық бірегейліктің негізгі арқауы – еліміздегі барлық ұлт пен ұлысты бір шаңырақ астына топтастыратын Қазақстан халқы Ассамблеясының күні. Бұл күн – күрделі заманда иық тіресе бірге еңсеріп, қысқа мерзім ішінде Елбасының басшылығымен Тәуелсіз Қазақстанды құру жолында аянбай тер төккен еліміздің барлық азаматтарының бір-біріне құрмет білдіретін күн.

Осы орайда,  Азат негізгі орта мектебінде мектеп басшысы Р.Жапарованың нұсқаулығымен, тәрбие ісі жөніндегі орынбасары Р.Низамованың ұйымдастыруымен қашықтықтан оқып жатқан оқушылармен түрлі шаралар өткізілді. 1-4 сыныптар сурет байқауын ұйымдастырып, 5-9 сыныптар шығарма, эссе жазудан сайысты. Әр сыныптан 1 оқушыдан келесі сыныпқа алғыс айту видеосы арқылы челлендж жолдады. Жеңімпаздар мақтау қағаздарымен марапатталды.

Балалар сынып сағаттарында, түрлі шара кезеңінде бір-біріне алғыс айтумен бірге, ата-аналарына, ұлағатты ұстаздарына шексіз ризашылықтарын  білдірді. Бұл бір жағынан білімді жай жеткізу емес, өз бетімен қабылдау дағдыларын дамытуға түрткі болды. Алғысты  сөзбен немесе қимыл, іс-әрекет, қашықтықтан, яғни ақпараттық құралдар арқылы білдіре алса, штаттық режимдегі оқушылар заттай сыйлық беріп алғыстарын алып жатты.

Ляйля МОЛДАСИНОВА,

Азат негізгі орта мектебі

қазақ тілі мен әдебиеті пәнінің мұғалімі.

Өткен аптада аудандық әкімдіктің мәжіліс залында аудандық мәслихаттың тұрақты комиссиялардың біріккен  отырысы өтті. Жиынға мәслихат хатшысы Бекет Ахметов, тұрақты комиссия төрағалары, аудандық мәслихат депутаттары қатысып, ауыл шаруашылығы, қаржы бөлімдері, жұмыспен қамту орталығы мен мемлекеттік кірістер басқармасы басшыларының есептері тыңдалды.

6 шақырылған аудандық мәслихат депутаттары осы күнге дейін аз жұмыс атқарған жоқ. Аудан аумағын аралап, тұрғындармен жүздесіп, өзекті мәселелердің оң шешімін табуға барын салды. Аудан тұрғындарымен етене еңбек еткен 6 шақырылым депутаттарын да жиынға арнайы шақырған мәслихат хатшысы алғысын айтып, ризашылығын білдірді.

– Жұртшылықтың сенімін арқалап, халық қалаулысы атану оңай емес. Жүктелген жауапкершілікті сезініп, сайлаушылардың мұң-мұқтажын, түйінді мәселелерін шешуде аянбай тер төктіңіздер. Бәріміз ауданымыздың, еліміздің гүлденуі жолында жемісті еңбек еттік – деген Бекет Төлегенұлы бұрынғы депутаттарды аудан әкімінің және мәслихат хатшысының Алғыс хатымен марапаттады. Сонымен қатар, 6 шақырылым депутаты Гүлсара Егенбаева сөз сөйлеп, жаңа сайланған халық қалаулыларының жұмысына сәттілік тіледі.

Бекет Төлегенұлы мен аудандық аумақтық сайлау комиссиясының төрағасы Бақыт Жексембиев мәслихат депутаттарына қызметтік куәліктерін табыстады.

Тұрақты комиссиялардың біріккен  отырысы ауыл шаруа-шылығы бөлімінің басшысы Ермек Жакеевтің есебімен басталды. Күн тәртібіндегі алғашқы мәселе бойынша баяндама жасаған Ермек Ильянұлы аудан аумағындағы шаруаларды суармалы сумен қамтамасыз ету мәселесі, көктемгі-жазғы суару науқанына су қорын жинау, Д.Қонаев атындағы ҮАК мен ішкі каналдардың жағдайын сөз етті. Бөлім басшысының сөзіне сүйенсек, ауданда 1030 ауыл шаруашылығы тауарларын өндірушілер тіркелген. Оларды тіршілік нәрімен 4 субъект қамтамасыз етеді. Д.Қонаев атындағы ҮАК (53 мың га), «Гидросервис» ЖШС (5 мың га), «Талғарирригация» ЖШС (5,5 мың га), «Қараш» ЖШС (4,5 мың га). Барлық суару желілерінің ұзындығы 1421 шақырымды құрайды. Оның 774 шақырымы бетон, арналардың 623 шақырымы қара жер арқылы өтеді. Сонымен қатар, 21 шақырым жерасты желілері бар. Ауданда 793 мүшесі бар 20 су тұтыну кооперативтері жұмыс істейді. Кооперативтерде 84 адам еңбек етеді және 7 ауыл шаруашылығы техникасы бар. Олардың басты мақсаты – суармалы суды соңғы пайдаланушыға дейін тарату және тасымалдау.

Баяндама жасаған Ермек Ильянұлына мәслихат хатшысы мен депутаттар сұрақтарын жаудырды. Себебі бүгінде суармалы су мәселесі ауданымызда өзекті болып отыр. Былтыр тіршілік нәрінен таршылық көрген шаруалар өздеріне тиісті мөлшерде су ала алмаған. Нәтижесінде, егін алқаптары күйіп кеткен, шаруалар өнімді жылдағыдан аз алған. Осыны айтып, дабыл қаққан мәслихат депутаттары жуырда Д.Қонаев атындағы Үлкен Алматы каналының бойымен жүріп, шаруа қожалықтарының, су кооперативтерінің басшыларымен кездесіп, арыз-шағымдарын тыңдаған еді.

Ірі инвесторларға берілетін жерлердің округ әкімдігімен ке-лісілмейтінін алға тартқан Бекет Ахметов суармалы судың тапшылығы бойынша мәселе көтерді:

– Жер үсті және жер асты суларының ластануы, нормативтен тыс су шығындары, халықты таза ауызсумен қамтамасыз етудегі проблемалар, климаттың өзгеруінен су ресурстарының сарқылуы байқалады. Соның салдарынан соңғы 4-5 жылда су тапшылығы сезілуде. Бұл, әсіресе, өткен жылы шаруалардың жанына батты. Биыл да бұл мәселе қайталануы мүмкін. Себебі, қысқы маусымдағы қар көлемі аз. Ал аудандық ауыл шаруашылығы бөлімінің тарапынан күзгі кезеңнен бергі уақытта дайындық жұмыстарына талдау жасалды ма? Шаруа қожалықтарымен кездесулер өткізілмеген, олардың ұсыныс-тілектеріне назар аударылмаған. Бұл мәселе талдау жұмысының барысына тұрғындар тарапынан көтеріліп отыр, – деді.

Өз кезегінде бөлім басшысы аталған мәселе бойынша тиісті жұмыстар жасалып жатқанын айтты. Сөзіне сүйенсек, былтыр шаруалармен кездесулер өткізіліп, суды аса қажет етпейтін дәнді-дақылдар мен көкөністер отырғызуға кеңес беріліп, суармалы су тапшы болатынын ескерткен. Алайда, депутаттардың жұмыс сапары кезінде шаруалардың айтқан уәжі мүлдем басқаша еді. Ермек Жакеевтің сөзінше, қыс мезгілінде жауын-шашынның мөлшерден аз түсуіне байланысты биыл да тіршілік нәрінің тапшылығы сезілуі мүмкін. Тіпті, Есік қаласы мен жақын орналасқан елді мекендердің ауызсу мәселесі күн тәртібіне қойылып отыр. Себеп жалғыз, таудағы қар көлемінің аздығы. Аталған мәселені шешу мақсатында Есік көліне су жинау бойынша ұсыныстар төтеншеліктер мен Қазселденқорғау мекемесімен келісілуде.

Депутаттардың іс сапары барысында шаруалар каналдан шыққан судың тиісті алқапқа жеткенше 30-40 пайызы жерге сіңіп кететінін, жоғалған суды ҮАК-ның басшылары ескермейтінін айтып шағымданған. Осы сауалды мәслихат хатшысы Ермек Ильянұлына қойды.

– Бұл мәселе бойынша Д.Қонаев атындағы Үлкен Алматы каналымен келіссөздер жүр-гіздік. Алдағы уақытта егістікке жетпей жерге сіңген су көлемі ескерілетін болады. Белгілі коэфицентпен есептеліп, шаруалар өздері пайдаланған судың ғана ақшасын төлейді – деп, бөлім басшысы жағымды жаңалықты жеткізді.

Жиын барысында ауыл шаруашылығы басшысына депутаттар мен жиынға арнайы шақырылған қоғамдық кеңес мүшелерінен суармалы су тақырыбында бірнеше сұрақтар қойылды.

Күн тәртібіндегі екінші мәселе бойынша баяндама жасаған қаржы бөлімінің басшысы Батыр Хайруллаев өткен жылдың қорытындысы бойынша аудандық бюджеттің орындалуы және игерілуін баяндады. Сонымен қатар,  «Жұмыспен қамтудың жол картасы», «Өңірлерді дамыту», «Ауыл – ел бесігі» бағдарламалары аясында бөлінген қаржының игерілгенін айтты.

Келесі болып мінберге көтерілген жұмыспен қамту орталының директоры Досжан Сейдахметов бір жылғы атқарылған жұмыстар бойынша есеп берді. Мәліметтерге сүйенсек, 2020 жылы жұмыспен қамту орталығына 4930 адам жүгінген. Олардың 3189-ы жұмыссыз ретінде тіркеліп,  ақылы қоғамдық жұмысқа 2308, әлеуметтік жұ-мыс орындарына 143, жастар тәжірибесіне 133 азамат және де қысқа мерзімдік курстарға 75 азамат жіберілген. Ал 530 адам жұмысынан айрылуына байланысты жәрдемақы алғандар.

Жиын соңында салық түсімі бойынша жыл бойы атқарған жұмыстар бойынша есеп берген Еңбекшіқазақ ауданы бойынша мемлекеттік кірістер басқармасының басшысы Қайрат Ашуов бюджеттік түсім артығымен орындалғанын баяндады. Салық түсімінің болжамы 18 млрд 603 млн 200 мыңды құрап, 19 млрд 519 млн 400 мың теңге салық жиналған.

Сонымен қатар, басқа да бағыттағы жұмыстарға тоқталған басқарма басшысы алкаголь, темекі өнімдерін заңсыз саудала-ған азаматтармен күрес кешенді жүргізіліп жатқанын айтты:

– Салықтық тексерулерді жүргізу барысында мемлекеттік кірістер  органдарында жеке кәсіпкер ретінде тіркеу есебіне қоймай, алкоголь және темекі өнімдерін бөлшек саудада сатумен айналысуға  арналған  мемлекеттік  лицензиясыз, тиісті құжаттарсыз  кәсіпкерлік қызметті  жүзеге асырған 5 жеке тұлға анықталған. Олардан  жалпы саны  3519 бөтелке  немесе 3036,2 литр алкогольдік өнімдер және  500 қорап немесе 10 000 дана темекі өнімдері тәркіленген. Аталған тұлғаларға ӘКБтК-нің 463 бабының 1 бөлімімен әкімшілік құқық бұзушылық туралы хаттама толтырылып, сотқа жолданды. Барлық хаттамалар сотта қаралып, құқық бұзушылар кінәлі деп танылып, оларға жалпы соммасы 170 800 тенге айыппұл салынды – дейді Қайрат Ашуов.

Есеп берген мекеме басшыларына сұрақтар қойылып, ұсыныстар айтылды. Аудандық мәслихаттың тұрақты комиссия-лардың біріккен отырысында енгізілген ұсыныстар мен ескертулер қаулыға енгізіліп, оның орындалуын бақылау тұрақты комиссия төрағаларына жүктелді.

Сардарбек НҰРАДИН