Бағзы  заманнан бері батыс пен шығысты тоғыстыратын керуен жолдың бойына орнығып, шартарапқа өркениеттің шам-шырағын жаққан шаһарлар қаншама. Өйткені жол – халық қажет ететін тауар тасымалының тамыры. Өркениет ағысының өзені. Бүгінде әлемдік нарықтың айналысы теңіз жиегіндегі порттардың экономикасына тебін берумен бірге құрлықтағы күре жолдың да маңызын күн санап арттырып келеді. «Жол жағалаған жоғын табады» демекші жақында жол жиегіне ірге тепкен, ауданымыздың батысындағы Бәйтерек ауылдық  округінің  бүгінгі тыныс-тіршілігімен танысып  қайтқан едік.
Бүгінде Алматы мен ауданымызды жалғайтын күре жол Бәйтерек  ауылдық округ экономикасының күре тамырына айналған. Ертелі-кеш толас таппайтын көлік керуені  жол бойын жағалай мекендеген  бәйтеректіктердің тіршілік қамына тыңнан серпін беруде. Дамылсыз жөңкіген  жүргіншілерге қызмет көрсететін  сауда нысандары мен дәмханалар бұл округте  шағын-орта  бизнестің  қарқынды дамып келе жатқандығын аңғартады.  Осыған орай  ауылдық округтің  тұрақты тұрғын  саны да  артуда. Округ әкімі аппаратының мәліметіне қарағанда, өткен жылы Бәйтерекке қоныстанғандар  саны17893 болса, биыл бұл көрсеткіш 18245-ке  жеткен. Өткен жылы округтің салық түсімі 111 млн. 600 мың теңгені құраса, биыл салық түсімі 124 млн  564 мыңға жетеді деп жоспарлануда. Осыған сәйкес өткен жылы округ бюджеті 37 млн 652 мың теңгені құраса, биыл бюджетке 94 млн 947 мың теңге қарастырылған. Еліміздің  әр аймағына өң берген «Өңірлерді дамыту-2020» бағдарламасы бәйтеректіктердің де баяшат өміріне өз шапағатын шашыпты. Биыл  бағдарлама шеңберінде Бәйтерек ауылдық округіне 15 млн теңге бөлінген. Аталған қаржы Қойшыбек  ауылындағы су құбырын жөндеуге жұмсалыпты.

– Тұрғындарды сапалы ауыз сумен қамдау округіміздегі ең өзекті мәселелердің бірі. Біз бұл түйінді кезең-кезеңімен қолға алып шешуге тырыстық. Екі жыл бұрын Бәйтерек ауылындағы, былтыр Алға ауылындағы, ал биыл Қойшыбек ауылындағы суға сусаған жұртшылықтың  қиындығын шештік, – дейді округ әкімі Айбек Нұрланов.

Округ басшысының айтуынша, ауылдағы тазалық пен абаттандыру жұмыстары да күн тәртібінен түскен емес. Биыл бюджеттен көшелерді жөндеуге 10 млн. теңге  бөлінген. Бұл бағытта Садов атындағы көшеге, Талғар тұйық көшесіне, Строительный көшесіне, Алға ауылындағы  Нүрпейісов атындағы көшеге асфальт төселген. Биыл бюджеттен санитарлық тазалыққа 2 млн. 700 мың теңге, ал жарықтандыруға 5 млн. 600 мың теңге қарастырылған. Қазір орталық көшелерді жарықтандыру жұмысы қолға алынған. Ал қалған көшелерді  жарықтандыру  алдағы уақытта  өз шешімін таппақ.

Қазір ауылдық округтегі өнеркәсіптік нысандар өңірдің экономикалық әлеуетін арттыруда. Бүгінде округте тас өңдейтін  және асфальт жасайтын «Кентас» ЖШС, «Асфальтобетон» ЖШС,«АДСК» ЖШС, «Альфа Пласт» ЖШС сынды кәсіпорындар 450-ден  астам адамды жұмыспен қамтып  отыр. Әкімдік мамандары өңірге ірге тепкен кей компаниялардың ауылды абаттандыру мен санитарлық тазалықты сақтауға өзіндік көмек көрсетіп келе жатқандығын айтады. Осы ретте, «АДСК» ЖШС-ның  техникалық маманы Ерлан Рсақов: «Кәсіпорнымызда 90-ға жуық адам жұмыс істейді. Бізде өндіріс  желілері автоматтандырылған. Осыған сай күніне 1000 тонна асфальт  өңдеуге қауқарымыз жетеді. Біз тек пайда  табуды ғана емес, өзіміз  қоныстанған  Бәйтерек ауылдық округінің гүлденіп-көркеюіне үлес қосқымыз келеді. Осы мақсатта ауылды абаттандыру мен санитарлық тазалықты  сақтауға тегін техникалық көмек көрсетіп келеміз», – дейді.

Округ аумағында осыған дейін ескірген әлеуметтік нысандар  күрделі жөндеуден өтіп, қайта жаңғырған болатын. Бұл игі шара биыл да жалғасын тапқан. Бәйтеректегі «Жұлдыз» балабақшасының ағымдағы жөндеу жұмыстарына бюджеттен 42 млн. теңге бөлінген. Қазір  қарастырылған қаржыға сай балабақша қайта жөнделді.

Қазір де ауыл шаруашылығы Бәйтерек ауылдық округінің тірегі саналады. Өйткені ырысты мекеннің климаттық жағдайы мал өсіруге де, егін шарушылығымен айналысуға да бап келеді. Сондықтан округ тұрғындары арасында мал шаруашылығын кәсіп еткендер мен қара жерден рыздығын іздейтіндер көп. Айталық, округтегі ірі қара саны былтыр 2019 бас болса, биыл 2559-ға, ал ұсақ мал басы өткен жылы 2676 болса, биыл 3500-ге жеткен. Округтегі мал саны алда тағы артуы мүмкін. Өйткені мұндағы  шаруалардың ет пен сүт өнімдерін алып мегаполистің базарына жөнелтуге мүмкіндігі  жеткілікті. Оның үстіне алдағы уақытта округ аумағында сүт пен ет өнімдерін өңдейтін жаңа кәсіпорындар бой көтермек. Құтты мекеннің құнарлы топырағы түйір дәннің көктеуіне көп қуат беретіні тағы бар. Ағымдағы жылы округ көлемінде 3900 гектардан астам жерге арпа, жүгері, соя, түрлі көкөністер егілген. Төккен терін еккен дәннен табатын шаруалар биылғы қуаңшылықтың салдарынан түрлі дақыл түсімінің аз болғандығын айтады.

– Биылғы төтенше жағдай еліміздің көктемгі егіс науқанына өзіндік қиындық тудырды. Алайда біздің округ республикалық маңызы бар жасыл дәліздің бойында болғандықтан шаруаларды  жанармаймен, техникалық жабдықтармен қамту қиын болмады. Оның үстіне әкімдік тарапынан шаруа қожалықтарына барынша қолдау білдірілді. Биыл егіс өнімдеріне су тапшылығы қатты сезілді. Сондықтан алда су ұңғымаларын көбейтуді қолға алмақпыз, – дейді округ  әкімінің  орынбасыр Дулат Қасымшалов.

Қазіргі індет жағдайына байланысты округтегі барлық мемлекеттік мекемелер, мектептер, балабақшалар, сауда орталықтары, кәсіпорындар мен қызмет көрсету нысандары санитарлық талапқа сай жұмыс жүргізу тәртібіне  көшкен. Округ әкімі аппараты мәліметіне сүйенсек, қазір санитарлық талапты сақтау мәселесі қатаң қадағаланады. Ал санитарлық талапқа сай жұмыс жүргізбеген кей сауда орындары мен дәмханаларға ескерту жасалып, кейбіріне айыппұл салынған. Әсіресе, мектептердегі кезекші сыныптардың санитарлық тәртібі қатаң қаралуда. Бұл ретте, әл-Фараби атындағы орта мектеп директорының міндетін атқарушы Гүлмира Нұрбаеваның сөзіне қарағанда, қазір мектептегі кезекші сыныпқа келетін оқушылар түгел дерлік дезинфекцияланып, дене температурасы өлшенгеннен кейін ғана сыныпқа кіргізіледі. Ал сынып кабинеттерінде де санитарлық талаптар үнемі тексеріледі. Өсер ұрпақтың  өзегіне руханияттың уызын құятын «Рухани жаңғыру» бағдарламасы мектеп қабырғасында өз жалғасын табуда. Ұлт санасына жаңа бұрылыс сыйлаған бұл бағдарлама аясында аталған орта мектепте «Жүз кітап және жүз ән» атты игі жоба  үш жылдан бері қолға алынып келеді. Биыл аталған жобада ұлы Абайдың 175 жылдық мерейтойына орай ақынның әндері мен қара сөзін жаттауға басымдық беріліпті. Гүльмира Нұрбаеваның айтуына қарағанда өзге этнос өкілдері Абай әндерін айтуға аса қызығушылық танытқан. Мұндай рухани  бірлік  елдімекеннің ертеңгі жарасымдылығына жол салмақ.

Статистикалық деректерге үңілер болсақ, округте 27 ұлт пен ұлыс өкілі өмір сүруде. Мұндағы тұрғындардың 44,3% қазақ, 43.3% орыс, ал қалған 11,9% өзге ұлт өкілдерін құрайды. Бәйтерек  көпэтносты  округ болғандықтан әр этнос өкілдері  тығыз тұратын жерлерде шиеленіс ошағының алдын алу мақсатында түсіндірме жұмыстары жүргізіледі. Сонымен қоса әр этнос белсенділерімен өңірдің тұрақты дамуына мүмкіндік  беретін түрлі мәселелер талқыға салынады  екен. Осы түсіністіктің арқасында  этносаралық қақтығыстарға жол берілмей келеді. Бүгінде округте Бәйтерек ауылдық мешіті, Қойшыбек ауылдық мешіті, Алға ауылдық мешіті, «Әулие Алексей қауымы» жергілікті православиялық діни бірлестігі, «Өмір бұлағы» христиандық Інжілдік шіркеуі жергілікті діни бірлестігі, «Хоба куәгерлерінің мәсіхшілік қауымы» жергілікті діни бірлестігі сынды 6 діни бірлестік бар. Бүгінде  аталған діни бірлестіктер  аудандық, облыстық іс-шараларға үнемі қатысып, округтің  дамуына өз үлестерін қосуда.

Бәйтерек ауылдық округ топырағында түтін түтеткендерді саясына алған мәуелі бәйтеректей бұтағын кеңге жайып, тамырын тереңге тартып келеді. Өңір жұртшылығын жыл сайын артып келе жатқан экономикалық және демографиялық өсім қуантады. Әрине, халық бар жерде қажетсіну бар. Қоғамдасқан өмірде қордаланған мәселелердің болатыны шындық. Осындай шешімін күткен түйткілдің түйініне округ басшысы арнайы тоқталды.

– Қазір округіміздегі Қойшыбек ауылына жаңа мектеп пен дәрігерлік амбулатория салу жоспары күн тәртібінде тұр. Өйткені Қойшыбек ауылындағы ескі балабақша мектепке өзгертілген. Қазір онда оқитын оқушылардың саны  тым көп. Сондықтан балалардың қалыпты оқуына  ескі мектептің мүмкіндігі жетпей отыр. Сонымен бірге округ орталығына өрттен қорғайтын арнайы бөлім салуды да жоспарлап отырмыз  – дейді округ әкімі Айбек Нұрланов.

Шығыс халықтарында «Байығың келсе жол сал», – дейтін дана сөз бар. Жол жиегіндегі жұрттың жоғы табылып, ондағы ел бақуатты өмір сүрсін деген тілектеміз.

Ерзат АСЫЛ

XXI ғасыр – технологияның дамуы мен ақпарат-тандыру ғасыры. Заман талабына сай әр мұғалім өз білімін жетілдіріп, педагогикалық технологияларды  күнделікті сабақтарына пайдаланса, әр сабағы тиімді де  нәтижелі болмақ. Сондықтан, қазіргі білім беру жүйесінің ең негізгі мақсаты – болашақ ұрпақты бәсекеге қабілетті тұлға етіп  дайындау. Мектеп осы жаңашылдықты енгізетін негізгі орта. Ал мұғалім – оның жүрегі.

Биылғы оқу жылының білім саласында түрлі өзгерістердің болуымен ерекшеленуде. Атап айтсақ, еліміздегі  төтенше жағдайға байланыс-ты  білім беру қашықтан жүзеге асырылуда. Осы орайда, ұстаздардың білімін жетілдірілуі де онлай жүзеге асуда. Жақында «Өрлеу» БАҰО АҚ Алматы қаласы бойынша филиалы ПҚБАИ Жаңартылған білім беру мазмұны шеңберінде «География» және «Жаратылыстану» пәні бойынша ZOOM бағдарламасымен қашықтан 2 апталық сабақ оқыдық. Курсты тренер Лаззат Адыбаева жүргізді. Лаззат Дүнгенбайқызы өзінің терең білімі мен оқу-әдістемелік шеберлігін ұштастыра отырып, курсқа қатысқан мұғалімдерге бағдарлама аясында жан-жақты талдап, түсіндірді. Курс барысында жаңартылған білім мазмұны негізінде оқушылардың ерекшеліктерін ескере отырып, СМАРТ форматта қысқамерзімді жоспар жасауды үйрендік. Курстың ең басты ерекшелігі – бұрынғы білімнің жаңа біліммен  ұштастыра  берілуі. Тәжірибесі мол тренеріміздің арқасында теориялық білімімізді практикалық тұрғыда жүзеге асыра алдық. Бірге қатысқан әріптестеріміздің іс-тәжірибелерімен танысып, ой-пікірлерімізді талқылап, сабақ берудің  жаңа тиімді әдіс-тәсілдерін пайдалануды үйрендік.

Бегзат ДИГАЙ,

Д.Қонаев атындағы орта  мектептің

география пәнінің мұғалімі

Бүгін аудандық мәслихат депутаты Гүлсара Егенбаева «Есік Сәулет» ЖШС-нің ұжымымен кездесіп, Президент Қ.Тоқаевтың «Жаңа жағдайдағы Қазақстан: іс-қимыл кезеңі» атты Жолдауын түсіндірді.

– Елбасы Н.Назарбаевтың салиқалы саясатының арқасында 30 жылда ел экономикасының іргетасы берік қаланып, әлем сахнасынан ойып тұрып орнымызды алдық. Әлемнің алпауыттары санасатын мемлекетке айналдық, абырой-беделге ие болдық. Алдағы уақытта да осындай жүйелі жұмыстарды жалғастырып, жаңа реформаларды жүзеге асыруымыз керек. Сонда ғана қазіргідей дағдарыс жағдайында экономикамыз тұраламай, халықтың әлеуеті арта түспек. Осындай жетістіктерге жету жолдары Мемлекет басшысы Қ.Тоқаевтың Жолдауында айтылған – деген Гүлсара Қалиқызы Жолдаудағы іс-қимыл жоспарына тоқталып өтті. Сөз кезегін алған  «Есік Сәулет» ЖШС-нің директоры Ерік Абитов ел ертеңінің айқын бағдары болатын маңызды құжатты талқылай келе барлық реформаның негізгі элементі – цифрландыру мәселесіне тоқталды.

– Президент тапсырмасымен осы жылдың соңына дейін 250-ден астам тұрғыны бар барлық ауылдар сапалы интернет желісімен қамтамасыз етіледі. Бұл барлық салалар үшін аса маңызды. Әсіресе, оқушылардың сапалы білім алуына, азаматтардың мемлекеттік қызметке үйден шықпай-ақ жылдым қол жеткізуіне жол ашады. Осылайша, адамдар өз уақытын үнемдеп қана қоймай, қоғам індеті – жемқорлықтың белең алмауына септігін тигізеді – деді Ерік Абитов.

Жиын барысында қатысушылар Мемлекет басшысының Жолдауы бойынша өздерінің ой-пікірлерін ортаға салды.

С.НҰРАДИН

Қасым-Жомарт Тоқаев Солтүстік экономикалық ынтымақтастық – 2020 Халықаралық форумында бейне үндеу жасады. «COVID-19-дан кейінгі жаһандық өзгерістер және солтүстік экономикалық ынтымақтастықтың келешегі» тақырыбындағы шара бүгін Сеул қаласында басталды. Бұл туралы ресми Ақорда хабарлады.

Мемлекет басшысы Қасым-Жомарт Тоқаев Президент Мун Чжэ Ин бастамашы болған және соңғы үш жылдың ішінде өзінің өзектілігі мен өміршеңдігін дәлелдеген «Жаңа Солтүстік саясат» стратегиясын жоғары бағалап, Оңтүстік Корея басшысының өркендеген, өзара байланысы мығым және тұрақты Еуразия құру көреген идеясын құптады.

Қазақстан Президентінің пікірінше, қазіргідей әлем коронавирус пандемиясының теңдессіз тегеуріндеріне тап болған кезде саяси жігер мен экономикалық сана синергиясы ерекше мәнге ие.

Қасым-Жомарт Тоқаев Қазақстан мен Оңтүстік Корея арасындағы стратегиялық ынтымақтастықтың ортақ құндылықтарға, өзара қолдау мен тығыз байланыстарға негізделгенін айта келе, елімізде өмір сүріп жатқан, достықтың «алтын көпірі» саналатын жүз мың корей қауымдастығының екі ел арасындағы қарым-қатынасқа қосқан үлесін атап өтті.

– Кореяның Қазақстан экономикасына жасаған инвестициясы 7 миллиард доллардан асты. Жаһандық тұрақсыздыққа қарамастан, екіжақты тауар айналымы артты. Орталық Азияның барлық бес елінің ортақ жалпы ішкі өнімнің 70 пайызы Қазақстанның үлесіне тиесілі. Корей мемлекеті жетекші инвесторлардың арасындағы 10-орынға ие. Бұл ретте, өзара тиімді ынтымақтастықты одан ары жалғастырудың әлі де пайдаланылмаған үлкен әлеуеті бар, – деді Мемлекет басшысы.

Қазақстан Президенті 2019 жылдың сәуір айында Мун Чжэ Иннің елімізге жасаған тарихи сапары екіжақты өзара іс-қимылдың жаңа белесін ашты деп санайды. Сапар аясында қол қойылған «Самал жел» бағдарламасы қазақ-корей экономикалық, сауда және мәдени жан-жақты байланыстарды жандандыруға бағытталған.

Сонымен қатар Қасым-Жомарт Тоқаев «Самал жел» бағдарламасы мен «Жаңа Солтүстік саясат» стратегиясы «Цифрлы Қазақстан», «Нұрлы жол» секілді ұлттық бағдарламаларда белгіленген стратегиялық міндеттерге сәйкес келетінін айтты.

Мемлекет басшысы әлемдегі ұзаққа созылған мұнай дәуірінің аяқталып келе жатқанын айтып, Қазақстан үшін әртараптандырылған және тұрақты экономика құрудың ерекше маңызды екенін атап өтті.

– Осыған байланысты мен Жаңа экономикалық бағыттың бастамашысы болдым. Бұл бағыт құрылымдық реформалармен ғана емес, сондай-ақ барынша қарқынды әрі мықты мемлекет құрумен байланысты. Қазақстан корей инвесторлары үшін арнайы әзірленген құралдарды ұсынуға әзір. Бұл ретте, салық және кеден артықшылықтары, жобаларды қоса қаржыландыру, экспортты қолдаудың ішінара кепілдіктері мен тетіктерін айтуға болады, –  деді Президент.

Мемлекет басшысы ағылшын құқығы бойынша қызмет көрсететін «Астана» халықаралық қаржы орталығының әлеуетін де сөз етті. Президент бұл орталықтың шетелдік бизнеске арналған экожүйесінің бірегейлігін ерекше атап өтті.

Сөз соңында Қасым-Жомарт Тоқаев форум қатысушыларына жұмыстың табысты, ал Оңтүстік Корея Президенті мен Үкіметінің игі бастамаларының сәтті болуына тілектестік білдірді.