Аудандық кәсіпкерлік бөлімінің басшысы Алмас Найзабеков: «Қазақстанда жеңіл өнеркәсіп – көп салалы өндірістің қатарына жатады. Атап айтсақ, оның негізгілері – тоқыма, тігін, мақта, мата, былғары тері илеу. Басты саласы – тігін өнеркәсібі. Экономикалық дағдарыстар орын алған өтпелі кезеңде бірқатар қиындықтар туғанына қарамастан тігін өнеркәсібі қарқынды дамуда» – дейді. «Мәселен, Қызылшарық ауылында орналасқан мектеп оқушыларының арнайы киімдерін тігетін «Шелек Болашақ» ЖШС көлемін кеңейту мақсатында Ават ауылында жаңа ғимарат салып, көшіруді жоспарлап отыр. Сонымен қатар, «Арай-2015» ЖШС-і халық шаруашылығының өзге салалары үшін арнайы қолданыстағы бұйым (арнайы сырт киім, ведомстволық киім) шығаруды қамтамасыз етуде. Есік қаласындағы «Тамара» тігін шеберханасы ұлттық киімдер тігумен айналысуда» – деп мәлімдеді Алмас Тынышбекұлы. Алайда, біз ол кісінің аузынан «Арлан 777» тігін фабрикасы жайлы бірде-бір ақпарат естімедік. Үш жетілік қайда кетті? Әлде тиісті дәрежеде қолдау таппаған соң, орнын ауыстыруға бел байлады ма? «Бүгін бар да ертең жоқтың» күйі ма деген жылтың ойдың да туғаны жасырын емес. Ендеше, ауданымыздағы жеңіл өнеркәсіптің жайы қандай, анықтап көрейік...

Білгенге, жайдары жаз – демалыс кезеңі. Мамыражай маусым мен тамылжыған тамыз арасындағы уақыт басқасы қайдам, мектеп оқушылары үшін есте қаларлық-тай өтуі тиіс. Себебі, бұл жайт мемлекет назарында. Арнайы қаражат та қарастырылған. Айталық, биылдың өзінде аудандағы 1-10 сыныптар аралығындағы 41075 оқушы толықтай жазғы сауықтырумен қамтылатын болады. Оған жалпыға бірдей міндетті оқу қорынан 51 млн теңге бөлінді. Бұдан өзге демеушілер тарапынан 20 млн 280 мың теңге, ата-аналардан 124 млн теңге және мектептердегі кәсіподақ ұйымдарынан 720 мың теңге игеру жоспарда. Сондай-ақ, аудан атқамінерлері де аз қамтылған, жетім, жартылай жетім балалардың демалысы жайлы өтуіне қолдау көрсетеді. Бұл – жыл сайынғы дәстүрге айналған үрдіс.