Экономист Болат Жәмішев әлеуметтік медициналық сақтандыру қоры» КЕАҚ Директорлар кеңесінің төрағасы болып сайланды.

Қордың Алматы қалалық филиалының мәліметінше, бұған дейін кеңеске Денсаулық сақтау министрі Елжан Біртанов жетекшілік етіп келген болатын. Болат Жәмішев әр жылдары ҚР Қаржы ұйымдарын реттеу және қадағалау агенттігі төрағасы, ҚР Қаржы министрі, ҚР Өңірлік даму министрі, «Қазақстанның даму Банкі» АҚ Басқарма төрағасы қызметтерін атқарған.

Сондай-ақ, МСҚ Директорлар кеңесінің құрамына жаңа мүшелер енді. Атап айтқанда, экономист Жақсыбек Күлекеев пен «Атамекен» ҰКП басқарма төрағасының орынбасары, қаржыгер Юлия Якупбаева Қордың тәуелсіз директорлары болып сайланды. Қазіргі уақытта кеңеске тәуелсіз директорлар - Ораз Жандосов, Гинтарас Кацявичюс, Жақсыбек Күлекеев, Юлия Якупбаева, Болат Бәбенов, сондай-ақ кеңес мүшелері - Елжан Біртанов, Берік Шолпанқұлов және Айбатыр Жұмағұлов енген.

Дүйім жұртты дүрбелеңге салған коронавирустың таралуына байланысты, ел Президенті Қасым – Жомарт Тоқаев Үкіметке және облыстар мен республикалық маңызы бар қалалардың әкімдеріне карантин кезінде халықтың коммуналдық төлемдерін төмендету бойынша іс-шаралар қабылдауды тапсырған болатын.

Осыған орай, Республикалық Төтенше жағдай штабы отырысында аталған тапсырма талқыланып 2020 жылғы 18 сәуірде Индустрия және инфрақұрылымдық даму министрінің №212 бұйрығымен «Төтенше жағдай кезеңінде коммуналдық қызметтердің шығындарын өтеу қағидалары» бекітілді.

Алматы облысы бойынша 248 395 азамат коммуналдық қызметтердің шығынын өтеп алушылардың санатында бар.

Коммуналдық қызметті тұтынушының атында аталған қызмет түрін тұтынатынын растайтын есепшот болған кезде коммуналдық қызметтер бойынша шығындарды өтеледі. Айта кетерлігі, үкімет тарапынан берілген көмекті алу үшін арнайы санатқа жататын жеке тұлғалар өтініш жазуы керек.

Комсуналдық қызметтің шығындарын өтеп алуға құқығы бар адамдардың санаты:

1) 1, 2 және 3 топтағы мүгедектер;

2) Ұлы Отан соғысының мүгедектері мен қатысушылары және Ұлы Отан соғысының мүгедектері мен қатысушыларына теңестірілген тұлғалар;

3) мүгедек балаларды тәрбиелеушi отбасылар;

4) көпбалалы отбасылар;

5) ең төмен және аз зейнетақы алатын зейнеткерлер;

6) мемлекеттiк немесе қоғамдық мiндеттерiн, әскери қызметiн орындау кезiнде, ғарыш кеңістігіне ұшуды дайындау немесе жүзеге асыру кезінде, адам өмiрiн құтқару кезiнде, құқық тәртiбiн қорғау кезiнде қаза тапқан (қайтыс болған) адамдардың отбасылары;

7) атаулы әлеуметтік көмек алатын азаматтар, оның ішінде жалғыз басты зейнеткерлер жатады.

Осы санаттағы азаматтардың бір айлық коммуналдық шығындарын шамамен оң бес мың теңге деп алғанда екі айға 7,5 млрд.теңге қаражат республикалық бюджеттен қарастырылған.

Облыс аумағында халыққа коммуналдық қызметті түрлі меншіктегі 138 мекеме көрсетеді, оның ішінде:

- Электр қуатын беру – 2;

- Газ беру – 9;

- Су және кәріз – 33;

- Жылу беру – 17;

- Лифт қызметі – 2;

- Қалдықтарды шығару – 75.

Коммуналдық қызметтер бойынша қаражатты өтеу үшін тұтынушы жеке сәйкестендіру нөмірін, әлеуметтік мәртебесін және есепшотының деректерін көрсете отырып, ақпараттық жүйе арқылы, ол болмаған жағдайда call-орталық (жергілікті әкім аппаратының жұмыс телефонына хабарласып біле аласыздар) арқылы өтінім береді.

Өтінім алған күннен бастап бес жұмыс күнінен кешіктірмей тұтынушының есепшотына қаражат аударылады.

Анар САБЫРОВА

Қазақстанда коронавирус инфекциясын жұқтырған тағы 30 адам тіркелді, деп хабарлайды coronavirus2020.kz.

Оның ішінде Нұр-Сұлтан қаласында – 8, Алматы қаласында – 2, Қостанай облысында – 7, Маңғыстау обылсында – 2, Павлодар облысында – 3, Жамбыл облысында – 6, Батыс Қазақстан облысында – 2 адам бар.

Осы сағатта Нұр-Сұлтан қаласы бойынша 401 адам, Алматы қаласында – 680 адам, Қарағанды облысында - 101 адам, Ақмола облысында - 83 адам, Атырау облысында - 82 адам, Жамбыл облысында - 76 адам, Шымкент қаласында - 103 адам, Шығыс Қазақстан облысында - 11 адам, Алматы облысында - 55 адам, Ақтөбе облысында - 27 адам, Солтүстік Қазақстан облысында - 30 адам, Павлодар облысында - 37 адам, Маңғыстау облысында - 16 адам, Қызылорда облысында - 151 адам, Батыс Қазақстан облысында - 72 адам, Түркістан облысында - 66 адам, Қостанай облысында - 34 адам, жалпы 2025 науқас тіркелді.

Қытайдың əйгілі данасы Конфуцийдің өте ақылды бір шəкірті бар екен. Ол ақылды əрі алғыр болғаны сонша, оған данышпан деген оқымыстылар мен ғұламалардың өзі қайран қалатын болса керек. Бірақ, осынша ақыл мен білімі бола тұра əлі күнге Конфуцийға шəкірт болып жүргеніне басқалар таң қалысып жүреді. «Əрине, Конфуций қытайдың ең дана да данышпан тұлғасы екені рас, деседе шəкірті одан қалыса қоймайды. Ақылы мен амалы бір басына жеткілікті бола тұра жай шəкірт ретінде дəріс алып жүргені несі екен?», – деп баршасы бас қатырады. Күндердің күнінде бір адам Конфуцийге шəкіртінің де өзі секілді ақылды да дана екенін, ол жағынан ұстазынан қалыспайтынын айта келіп, сонша ақылды бола тұрып сізден не үйреніп жүргеніне таң қаламыз дейді. Сонда Конфуций дана: «Ол ақылды болғанымен өте жалқау. Ал жалқаулықтың ақыл мен білімді қор қылатынын түсінбейді. Сондықтан ол осы шындыққа көзі жеткенше менің шəкіртім болып қала береді», – деген екен.

Иə, бұл оқиғадан қоғам мен адам өміріндегі еңбектің рөлі орасан екенін түсінеміз. «Адамады адам еткен – еңбек» деген Маркстың да атақты сөзі бар. Бұл сөздің астарында үлкен шындық жатқаны анық. Адамның тарихтағы талай таң қаларлық жаңалықтары мен өнертабыстарының ар жағында үлкен даналық пен орасан еңбек жатқан болатын. Егер адам баласы еңбек ете білмегенде осындай дамыған қоғамға қол жеткізуі де неғайбыл. Сондықтан еңбектің орнын алмастыра алатын құндылық жоқ. Өзіміз өмір сүріп жатқан мемлекеттің экономикалық, əлеуметтік, саяси дамуы да қарапайым еңбек адамдарының арқасы екені талассыз. Өйткені осы бір қарапайым адамдардың тынымсыз еңбегінің нəтижесінде ел экономикасы мен қазынасына қаншама байлық құйылып жатқан жақсы білеміз. Ал ол байлықтың халықтың игілігіне жарап жатқаны тағы шындық. Бұл жағынан мемлекет ең алдымен қарапайым еңбек адамдарына қарыздар. Осындай қарапайым да тынымсыз еңбегімен ел жадында сақталып, халықтың құрметіне бөленген адамның бірі – Алтынбике Бертаева.

А.Бертаева 1920 жылдың 27 қаңтарында Алматы облысы, Шелек ауданы, Өрнекті колхозында дүние есігін ашқан. Əкесі Бертай мен анасы Əнəпия да қарапайым еңбек адамдары болған. Екінші дүниежүзілік соғыс басталып, дүниені дүр сілкіндірген қаралы күндер А.Бертаеваны да айналып өткен жоқ. Осы соғыста күйеуі Мұхамеджан Брест қамалын қорғау кезінде ерлікпен қаза болады. Сонымен бірге сұм соғыс екі ағасы Изман мен Дүйсенбайды да ажал құрығына іліндіреді. Осындай қатал сындар мен қайғылы күндерден Алтынбике анамыздың сағы сынып, рухы түскен емес. Керісінше бар ауыртпалықты қайыспай көтеріп, еңбекке ерте араласты. 1939 жылдан 1963 жылға дейін «Калинин» колхозында колхозшы, ал 1963 жылдан зейнетке шыққанша совхоз болы қайта құрылған «Қаратұрық» совхозында темекі өсіруші, звено жетекшісі болып қызымет етті. Осылайша өмірінің 45 жылы еңбекке арнап елдің алғысы мен құрметіне бөленді. Тек халықтың құрметіне бөленіп қана қоймай, мемлекеттің де марапаттауларынан құр қалған жоқ. 1963 жылы есімі Республикалық Құрмет «Алтын кітабына» жазылса, 1966 жылдың 30 сəуірінде КСРО жоғарғы Кеңесі Президимуының Жарлығы бойынша А.Бертаеваға Социалистік Еңбек Ері құрметті атағы берілді. Мұндай атақ ол кезде де екінің бірінің маңдайына жазыла бермейтін мəртебе болатын. Ең қызығы бұл жоғары атақты алғанда апамыз не бары 46 жаста ғана еді. Сонымен бірге, Кеңес Одағының жоғары марапаты саналатын «Ленин» ордені мен «Орақ пен Балға» алтын жұлдызын да иеленді.

Ал 1963 жылы Қазақ КСР Жоғарғы Кеңесінің VІ шақырылымының жəне 1967 жылы VІІ шақырылымының депутаты болып екі мəрте сайланды. Жоғарғы Кеңестің заң жобалау комиссиясының да мүшесі болған.

Ерінбей еңбек етуді өзінің өмірлік миссиясы санаған əрі сол еңбегінің арқасында барлық құрмет пен даңққа, абырой мен бақытқа кенелген апамыздың өткізген өмірі кімді де болсын бей-жай қалдырмасы анық. Қаншама атақ пен абыройы болса да тасымаған, тек еңбекпен көзін ашып, ғұмырын еңбекпен байланыстырған, алайда осы бір қарапайым ғана қоңыр тіршілігін дүниенің барша сəнсалтанатынан артық қойған апамыздың өнегесі баршамыз үшін үлгі болғандай. Осындай ақ адал еңбегімен елінің есінде қалған аяулы апамыз 2008 жылы 15 қыркүйекте тоқсанға қараған шағында бақиға аттанды. Десе де артында жақсы атақ пен асқақ абыройы, үлгі мен өнегесі, жас ұрпақты адалдыққа бастайтын мəнге толы өмір белестері қалды.

КСРО ыдырап, қазақ елі тəуелсіздік алғаннан кейінде апамыздың атқарған қызметтері атаусыз қалып көрген жоқ. Елімізге сіңірген ерен еңбегі мен халық шаруашылығын дамытуға қосқан үлесін жоғары бағалаудың нəтижесінде Қазақстан Республикасы Үкіметінің 2016 жылдың 28 желтоқсанындағы №883 қаулысы негізінде Достық ауылындағы Қаратұрық орта мектебіне А.Бертаеваның құрметті есімі берілді.

Бұл мектеп жалпы 300 орынға арналған үлкен білім ордаларының бірі. Десе де бүгінде 611 оқушы білім алуда. Білім сапасы жағынан 57 пайыздық көрсеткішке жетіп, аудан бойынша алдыңғы орындардан көрініп келеді. Осындай үлкен жетістікке жетіп, білім додасында алға озуы үшін 69 мұғалім аянбай қызмет етіп жатқан жайы бар. Мектептегі оқушылардың білімділігі мен ұстаздарының біліктілігін А.Бертаеваға арналған шарада байқап қайтты. Олай деуіміздің себебі көрсеткен өнерлері мен дайындығынан барлығы менмұндалап тұрды. Əсіресе А.Бертаеваның өмір жолы негізінде дайындаған көрністерін ауыл тұрғындарының көңілінен шықты. Алтынбике апамыздың еңбекке араласуы, тұрғындарды ұйымдастыруы, іске асырған шаруалары жəне соның арқасында жеткен табыстары мен көрген құрметтері турасында көрсетілген сəттерінде апамызбен бірге еңбек етіп, көзін көрген аталарымыз бен апаларымыздың өткен күндері естеріне түсіп, барынша тебіренгені байқалды. Əрине, өзге емес А.Бертаева секілді қарапайым еңбек адамының өмірін өнеге етуі жас шəкірттер үшін өте қажетті құндылық. Бүгінгі жеңіл ақша табудың жолына түсіп, айдаладағы сағым қуған кейбіреулердің апамыздың өнегелі өмірінен үлгі алса қандай тамаша болар еді дейсің кейде.

Иə, еңбектің бейнетке толы екені рас. Бірақ сол бейнеттің зейнетінің рахаты мен лəззаты қандай болатынын айтуға тіл жетпейтіні тағы шындық. Қиындықтан мойымай, бейнеттен қажымай, тек болашағынан үміт күтетін, еңбекті ерлік деп бағалайтын ұрпақ тəрбиелеуге А.Бертаева секілді адамдары үлгі ете білсек қана жұлдызымыз оңынан тумақ. Бұл туралы С.Көбеевтың: «...Еңбек тəрбиесіне баса назар аудару керек. Еңбекке тəрбиелемей тұрып, балаға дұрыс тəрбие бердім, – деп айту екіталай», – деген əдемі сөзі бар. Сондықтан А.Бертаеваның үлгісі жадымыздан ешқашан өшпек емес.

Нұрсерік ТІЛЕУҚАБЫЛ