«Есік» мемлекеттік тарихи-мәдени қорық-мұражайында Астана күні, Ұлттық домбыра күні және Ж.Жабаевтың туылғанына 175 жыл толуына орай «Ұлы дала мұрасы - музыкалық аспаптар» атты көрме ашылды. Аталған көрме Ықылас атындағы халық музыкалық аспаптар музейінің құнды жәдігерлер топтамасынан құралды. Көрмеде Ж.Жабаев, Ш.Құдайберді, К.Әзірбаев сынды қайталанбас тұлғалардың ұстаған домбыраларымен қатар, жетіген, шертер, адырна, дауылпаз сынды аспаптар көрермен назарына ұсынылады.
Көрменің ашылуына аудандық «Еңбекшіқазақ» газетінің бас редакторы Х.Ахметжанов, мұражай директоры Гүлмира Мухтарова, Ықылас атындағы халық музыкалық аспаптар музейінің директоры Рүстем Қайратұлы, Қаракемер мәдениет үйінің директоры А.Мамырбекова мен өнер иелері және мұражай қызметкерлері қатысты. Аудандық «Еңбекшіқазақ» газетінің бас редакторы Х. Ахметжанов пен Ықылас атындағы халық музыкалық аспаптар музейінің директоры Рүстем Қайратұлы сан алуан сазға бөленген салтанатты шараның тұсауын кесті. Тәуелсіздік жылдарынан бері өңірлік баспасөздің тізгінін ұстап, талай тарихи оқиғаның куәсі болған Хайролла Қасымұлы мұражайдың өткенінен сыр толғап, ұжымның алдағы жұмысына сәт сапар тіледі. Ал Рүстем Қайратұлы Ықылас атындағы халық музыкалық аспаптар музейінде сақталған ең құнды жәдігерлердің көрмеге қойылғанын, олардың аса терең мәдени және тарихи құнға ие екенін тілге тиек етті. Сары дала төсінде тұлпарының тұяғымен тарих жазып, қос ішекке тіл бітіріп, ғажайып күй қалдырған бабалар өнеріне табынбасқа не шара. Көрмеге қойылған әр музыка аспабында алтын саусақтардың табы жатқандай. Сондықтан да әр жәдігер көзімізге оттай басыла береді. Соның бірі – күй атасы Құрманғазы домбырасының көшірмесі.
Ықылас атындағы халық музыкалық аспаптар музейінің ғылыми қызметкері Э.Айдарханованың айтуынша, дәулескер күйшінің домбырасы Ресейдің Астрахан облысы Алтынжар ауылындағы «Құрманғазы атындағы мәдени орталық» қорында сақталған. Ал батыс қазақстандық шебер Едіге Нәбиев түпнұсқа негізінде домбыраның көшірмесін жасап халық музыкалық аспаптар музейіне табыстапты. Бізше ғасырлардан жеткен үн әр жүрекке күй болып тұнатындай.Тәуелсіздігіміздің символына айналған Алтын адам бейнесі – еңсесі биік елдігіміз бен дұшпанына дес бермес ерлігіміздің ескірмес естелігі, һәм ескерткіші іспеттес. Ал алтынмен апталған сауытқа көз жүгірткен кез келген жан мәдениетіміз бен өркениетіміздің өзегі тереңнен тарайтынын түсінері анық. Бұл ретте «Есік» мемлекеттік тарихи-мәдени қорық-мұражайының директоры Гүлмира Мухтарова: «Бұл көрме ғасырлар бойы ұрпақтан-ұрпаққа мирас болып келе жатқан мәдени мұрамыз, асыл қазынамызға айналған музыкалық аспаптар рухани мәдениетіміздің мәйегіне айналғанын көрсетеді. Ай бойы жалғасын табатын көрмені тамашалағандар таңғажайып музыкалық мұрамыздан тағылым алып қайтады. Біздің қасиетті топырақта ұлт руханятына серпін беретін игі жобалардың көптеп қолға алынуына тілектеспін», – дейді. Табиғаттың тілі, уақыттың үні болған музыкалық аспаптарымыздың ғажап сарыны жүрегіміздің қағысымен, қанымыздың ағысымен бірге тулай бермек.
Ерзат АСЫЛ
