Шелек тарихи-өлкетану мұражайында Ұлттық домбыра күніне арналған көрме ашылды.

Шелек тарихи-өлкетану мұражайында ұйымдастырылған көрме Елбасымыздың Ұлттық домбыра күнін бекіту туралы жарғысының халық арасында үлкен қолдау тапқанының көрінісі деп білеміз. Домбыра − өзіндік музыкалық сипаты бар, қазақ өмірінде маңызды орын алатын аспап. Алғаш эпикалық дәстүр шеңберінде жыр, толғау, термелерді сүйемелдеуге қолданылған домбыра кейін аспаптық шығарма – күй жанрының қалыптасуына ықпал еткен. 6000 жылдық тарихы бар домбыра бүгінде жеке әнді сүйемелдеуге, күй тартуға, халықтық-фольклорлық музыкада, классикалық шығармаларды орындауға қолданылатын, мүмкіндігі кең музыкалық аспап. Осы орайда Шелек тарихи-өлкетану мұражайында «Домбыра – бабадан қалған бағзы мұра» атты тақырыпта домбыра жасаушы, күйші Ақан Серікұлы Базаровтың өзі жасаған домбыраларын қойып, көрермендермен домбыра жасаудың қыр-сырымен бөлісті. Көрме барысында домбыра жасаушы Ақан Серікұлы домбыра жасаудың әртүрлі тәсілдерін айтты. Көрмеге барлығы 7 домбыра қойылды. Көрмені Ы.Алтынсарин атындағы орта мектеп оқушылары мен ауыл тұрғындары тамашалады. Көрме соңында музей залдары бойынша экскурсия жасалып, көрермендер залдарды тамашалады.

Ақан Серікұлы Шелек өңіріндегі Жаңашаруа ауылында дүниеге келген. Өнерге жастайынан құмар болған Ақан аға: «Әкем құрылысшы бола тұра, домбыра шертіп отыратын. Сонымен қатар,   қалдық ағаштардан аң-құстардың нобайын жасап, домбыра жасаумен шұғылданушы еді», – дейді.   Бабаларымыз  кез келген өнер түрін үлкен талғаммен аса жоғары бағалап отырған. Осыны көріп өскен бала Ақан 1999 жылы Қаскелең қаласындағы Мәдениет колледжіне оқуға түсіп, Шамалғандағы мектеп-гимназияда Еңбек пәнінің мұғалімі болып қызмет етеді. Оқу орнында ағаш жонудың түрлі тәсілдерін үйреніп, сандық, астау, тағы басқа да заттар жасай жүріп 2002 жылы Абай атындағы Қазақ ұлттық педагогикалық университетінің көркем сурет факультетінің сәндік қолданбалы өнер кафедрасын бітіреді. Ол жерде көп шәкірттер дайындаған, домбыраның хас шебері Тұрдығұлов Жолаушы Әбілғазұлынан сабақ алған.  «Дауысы күмбірлеген керемет домбыра жасау асқан талант пен сезімталдықты қажет ететін дүние екені сөзсіз. Қазір өзі де шәкірт тәрбиелеп отырған ұстаздың қолынан шыққан домбыраның жалпы саны 500-ге жуық. «Домбыра жасау екінің бірінің қолынан келе бермейді. Оның өзіндік құпиясы бар. Әр шебер өз құпиясын кез-келген адамға жайып салмайды. Алайда, ең басты құпиясы әрине, домбыраның ағашына байланысты. Ағашы қандай болса, үні де сондай әуезді болып келеді», – дейді шебер.

«Алдымен, аспапқа лайықты ағаш таңдалады. Ол әбден  кептіріледі. Содан соң домбыраның шанағын белгілі бір заңдылықтарға сәйкес орналастыру қажет. Бет тақтайының қаттылығы, қалыңдығы – бәрі есептеле-ді. Сәл қиыс кетсе, дыбыс дұрыс шықпауы мүмкін», – дейді А.Базаров. Кез-келген ағаштан шауып, домбыра істеуге болады. Бірақ оның барлығы домбырашылардың көңі-лінен шыға бермейді. Сондықтан, Ақан аға  әр жасаған домбырасын кәсіби домбырашыларға көрсетіп, ақыл-кеңесін алып отырады. «Менің басты ақылшым, домбырамның сыншысы – Жолаушы Тұрдығұлов. Әр жасаған домбырамды қашықта тұрғаныммен, шама келгенде іздеп барып, ұстазыма көрсетіп, ақыл-кеңесін тыңдаймын», – дейді.  Ағаштан түйін түйіп, жансызға жан бітірген Ақан шебердің шапқан домбыраларымен осы күні исі қазақ өнерін түсінетін азаматтар өнер көрсетіп жүр десек артық айтқандық емес. Домбыра жасайтын шебердің айтуынша соңғы жылдары ұлттық аспапқа деген сұраныстың артқаны байқалады. Республика көлемінде біршама жылдан бері бекітілген Ұлттық домбыра күні соның айғағы емес пе?!

Айтулы мерекеде біздің мақсатымыз – үн-түнсіз, дабырасыз еңбек етіп, оқушыларға ұлттық қолөнердің сырын үйретіп жүрген ұстаз туралы бір жылы сөз арнау еді. «Ағаштан түйін түйген» шебер ұстазға алдағы жұмыстарында тек сәттілік тілейміз! Біздің тілек киелі аспаптан шертілген күй мен төгілген әндерді талантты шәкірттер орындап, болашақ жас-тар ұлттық құндылығымызды қастерлей білсе деген ой. 

Нұргүл САБАҚАНОВА

Өткен аптада облыстық мәслихат хатшысы Жанболат Жөргенбаев жұмыс сапарымен ауданымызға келіп, бірқатар нысандарды аралады. Әкімдіктің мәжіліс залында мәслихат депутаттарымен кездесу өткізіп, күрмеуі қиын өзекті мәселелерді талқылады, халық қалаулыларының ұсыныстарын тыңдады.

Киелі Алтын адам жеріне арнайы ат басын бұрған Жанболат Әкебайұлы, Алматы облыстық мәслихатының экономика, бюджет, құқықтық тәртіп, сыбайлас жемқорлыққа қарсы күрес, депутаттық өкілеттіктер мен этика мәселелері бойынша тұрақты комиссияның төрағасы Асқар Сүлейменов аудандық мәслихат хатшысы Бекет Ахметов, «Nur Otan» партиясы филиалы төрағасының бірінші орынбасары Қуат Байғоджаев, облыстық мәслихат депутаты Ерік Абитов бастаған топпен ауданымыздағы ірі жобалардың құрылысымен танысты.

Есік қаласы және жақын орналасқан 8 елді мекенді ауызсумен қамтамасыз ететін Еңбек-шіқазақ топтық су құбырының құрылысына қаражат бөлініп, жұмыстар былтыр басталып кеткен. Жоба бойынша Бөлек, Әймен, Қарасай, Өрікті, Көктөбе, Қызылжар, Рахат, Қайназар ауылдарының тұрғындары келер жылдың мамыр айында сапалы тіршілік нәріне қол жеткізуі тиіс. Ол үшін бюджеттен 4 млрд теңгеден астам қаржы бөлінген. Бүгінгі күнде құрылыс-монтаж жұмыстарының 60 пайызы аяқталып, 39 шақырымына құбыр тартылған (жалпы ұзындығы 45 шақырым). Жоба бойынша осындай ақпараттарды жеткізген мердігер «Сапа Құрылыс 2007» ЖШС-нің өкіліне Жанболат Әкебайұлы құрылысты уақытында әрі сапалы аяқтау керектігін тапсырды.

Есік қаласының төменгі жағындағы құрылысы жүріп жатқан 60 пәтерлі қос тұрғын үйге де арнайы барды облыстық мәслихат хатшысы. Мұндағы әрбір көпқабатты үйді салуға бюджеттен 670 млн теңгеден астам қаржы бөлінген. Мердігер мекеме «Капстройгрупп-Т» ЖШС. Мекеме басшысының айтуынша, барлық жұмыстар ойдағыдай жүргізілуде, алайда, құрылыс материалдарының, әсіресе, цементтің қымбаттауына байланысты газоблок шығаратын зауыт өз жұмысын тоқтатқан. Алғашында келісім шарт жасасқан зауыт қабырға қалауға қажетті материалдарды жеткізу уақытын кейінге шегеріп келген. Осы мәселе құрылысты уақытында аяқтауға кедергі болуы мүмкін. Десек те, мердігер компанияның басшысы тығырықтан шығатын жолдарды қарастырып жатқанын жеткізді. Бүгінде құрылыс алаңында 62 адам еңбек етуде. Жыл соңында, Тәуелсіздік күніне орай 120 отбасы қоныс тойын тойлауы тиіс.

Аудан орталығында жүзеге асып жатқан осындай жобалардың барысымен танысқан Жанболат Жөргенбаев әкімдіктің мәжіліс залында VII шақырылым депутаттарымен кездесіп, өңірдегі мәселелерді талқылады. Алғашқы болып сөз кезегін алған Бекет Ахметов 2021 жылдың 6 айында атқарылған жұмыстардың негізгі бағыттарына тоқталып өтті. Ж.Жөргенбаев  өз кезегінде Алматы облыстық мәслихатының жұмысы, алдағы кезеңге арналған жос-парлар, «Nur Otan» партиясының «Өз-герістер жолы: Әр азаматқа лайықты өмір!» сайлауалды бағдарламасын орындау жөніндегі жол картасының іске асырылуы бойынша атқарылып жатқан кешенді жұмыстармен таныстырды. 2021 жылғы 1 шілдеден бастап қолданысқа енгізілген Қазақстан Республикасының 2020 жылғы 29 маусымдағы «Қазақстан Республикасының әкімшілік рәсімдік-процестік Кодексі» мен «Қазақстан Республикасының кейбір заңнамалық актілеріне аудандық, қалалық және ауылдық билік деңгейлерінің дербестігі мен жауапкершілігін кеңейту мәселелері бойынша өзгерістер мен толықтырулар енгізу туралы» Қазақстан Республикасының Заңындағы жаңалықтарға тоқталып, өз ойымен бөлісті.

Жиын барысында халық қалаулылары аудан аумағындағы проблемаларды айтып, оң шешімін табуға ықпал етуін сұрады Жанболат Әкебайұлынан. Айдар Алсейітов Шелек ауылындағы тозығы жеткен кәріз жүйесінің мәселесін көтеріп, оны жүргізу үшін 1,4 млрд теңге қаражат керектігін айтты. Сонымен қатар, Нұрлы ауылындағы дәрігерлік амбулатория мектеп ғимаратының бір бөлігін жалға алып, тұрғындардың саулығы жолында жұмыс жасауда, медициналық мекемеге жаңа ғимарат қажет.

Аудандық мәслихат депутаты Раимжан Ибдиминов шаруалардың базынасын айтып, суармалы су мәселесі  мен су жүретін каналдардың тозығы жеткендігін жеткізді. Тескенсу ауылындағы ескірген мектеп пен амбулаторияның жайын жеткізген Қияс  Ақберген ауыл жастарына спорт алаңы қажеттігін, су құбырының ескіргенін айтты.

– Егемендік алғалы Тескенсу ауылында бірде бір әлеуметтік нысанның бой көтермегенін ескере отырып, осы жылдар арасында Тескенсудан сайланған депутат ретінде, ауыл тұрғындарының аманатын орындау үшін жоғарыда айтылған мәселелердің шешілуіне ықпал етуіңізді сұраймын – деді Қияс Жапарбекұлы.

Бүгінде жұмысқа орналасқан жас мамандардың баспанаға қол жеткізуі – өзекті тақырып. Бұл бойынша ауыл жастарына «Дипломмен ауылға» бағдарламасы септігін тигізсе, Есік секілді шағын қалаларда жұмыс істейтін жас мамандар аталған бағдарламаға қатыса алмайды. Осылайша, жас мамандардың баспана мәселесін жеткізген Лейля Тункаева мәслихат хатшысына жастарға көмек берудің басқаша жолдарын қарастыру керектігін айтты.

Мәслихат депутаты Михаил Гусев Бәйтерек ауылдық округіндегі суармалы су мен ауызсу тапшылығына тоқталды.

Қойылған сұрақтар бойынша кездесуге қатысушылар пікір алмасып, талдау жасады. Алматы облыстық мәслихатының хатшысы Ж.Жөргенбаев сұрақтарға барынша жауап беріп, мәселелерді назарына алып, облыстық мәслихат деңгейінде қарастыру мақсатында күн тәртібіне енгізетінін жеткізді.

Сардарбек НҰРАДИН

 «Еңбекшіқазақ» газеті және mezet.kz үгіттік баспа материалдарын орналастыру үшін басылым алаңдарын береді.

Сайлауалды үгіт-насихат кандидаттарды тіркеу мерзімі аяқталғаннан, яғни, 2021 жылдың 14 шілдесінде сағат 18.00-де басталып, 2021 жылғы 24 шілдеде жергілікті уақыт бойынша ноль сағатта аяқталады.

Жазбаша өтініштер демалыс және мереке күндерін қоспағанда күн сайын Есік қаласы, Алматы көшесі, 112-үй, 2-қабат мекенжайында қабылданады.

Жарияланымдарда ақпараттың төленуі, материалдарды шығаруға жауапты тұлғалар, олардың қаржыландыру көзі туралы мәліметтер болуы керек. Баспалық материалдарды орналастыру кезегін жазбаша өтініштердің келіп түсу ретіне қарай редакция белгілейді.

Үгіттік материалдарды беру тәртібі

Газетке үгіттік баспа материалдары газет жарық көретін датаға 3 (үш) күнтізбелік күн қалғанға дейін модульдер немесе мақалалар түрінде тапсырылуға тиісті. Материалдарда конституциялық құрылысты күштеп өзгертуге, республиканың тұтастығын бұзуға, мемлекеттің қауіпсіздігін бүлдіруге, әлеуметтік, нәсілдік, ұлттық, діни, таптық және рулық алауыздық тудыруға, сондай-ақ, заңмен қарастырылмаған, тағы басқа да негіздерде әскерилендірілген құрылымдар құру идеялары көрініс берген жағдайда редакция үгіттік баспа материалдарын орналастырудан бас тартуға құқылы. Кандидаттардың абыройы мен қадір-қасиетіне немесе іскерлік беделіне нұқсан келтіретін ақпараттар болған жағдайда редакция үгіттік баспа материалдарын орналастырудан бас тартуға құқылы.

Газеттің басылым алаңдарын төлеудің тәртібі мен мөлшері

Үгіттік материалдарды орналастыруға арналған басылым алаңдарының бағасы:

- Мақалалар жарияланған беттерге модуль орналастырудың 1 шаршы см. үшін 200 теңге;

- Журналистік мақалалар жарияланған беттерге мақала орналастырудың 1 шаршы см. үшін 200 теңге.

Төлем газет берген есепшот негізінде сол есепшот берілген күннен басталатын 5 (бес) банк күні ішінде жүргізіледі. Төлем газеттің басылым алаңын беру жөніндегі тиісті келісімшартта немесе есепшотта көрсетілген серіктестіктің банктік реквизиттері арқылы төленеді.

Туындаған сұрақтар бойынша төмендегі мекенжайға немесе телефон нөмірлеріне хабарласуға болады:

Есік қаласы, Алматы көшесі, 112-үй, 2-қабат. 8 (72775) 4 09 00, 4 19 31.

Ағымдағы жылдың 5 шілдесінде облыстың бас мемлекеттік санитарлық дәрігерігінің №13 қаулысы шықты. Бас құжаттағы басты мәселелер «Jetisy Media» алаңында айтылды.

Әуелде ерікті түрде салынатын вакцина, қоғамдық иммунитетті қалыптастыру мақсатында ендігі жерде барлық тұрғындарға салынатын болады. Қаулы негізінде соңғы 3 ай ішінде тұрақты медициналық қарсы көрсетілімдері бар және covid-19-бен ауырып жазылған адамдардан басқасының барлығы да коронавирусқа қарсы вакцинаны алуға міндетті болып табылады. Мемлекет міндеттеген екпені алмаған жағдайда жұмысқа жіберуге шектеу енгізіледі.

Жаңа ереже бойынша, екпе алмаған ұйым қызметкерлері аптасына бір рет ПТР-тестілеуден өтуі қажет. Ескерте кетерлігі, аталған зертханалық талдау ақылы негізде жасалынады.

- «Ashyq» жобасына қатыспаған ойын-сауық орталықтары, сауда үйлері, боулинг клубтары мен бильярд бөлмелерінің қызметіне тыйым салынады. Банктердің, ХҚКО-ның, "Қазпошта" АҚ бөлімшесінің жұмыс кестесі сағат 9.00-ден 18.00-ге дейін. Қоғамдық тамақтану объектілері (үй-жайда) мейрамхана, кафе және кофехана типі бойынша 9-дан 20 сағатқа дейін, толымдылығы 50% - ға, бірақ 30 орыннан аспайтын жұмыс істеуге рұқсат етіледі»,-деп атап өтті Алматы облысы санитарлық-эпидемиологиялық бақылау департаменті басшысының орынбасары Асхат Чарапиев.

Айта кетейік, соңғы тәулікте тағы да 49 адам індет жұқтарғаны анықталды. Осылайша вирустың өсу қарқыны -0,2% құрап отыр. Бүгінгі таңда Алматы облысы сары аймақта орналасқан. Текелі қаласы әлі де қызыл аймақта, қалған аудан мен қалалар жасыл аймақта.

Вакцинациялауға келетін болсақ, облысқа барлығы 498 170 доза вакцина келіп түсті, оның ішінде 39 500 Hayat-vax, 422 670 Гам-Ковид-вак, 8000 Qaz-вак және 28 000 CoronaVac. 2 компонент 253 350, оның ішінде 39 500 Hayat-vax, Гам-Ковид-вак 177 850, Qaz-вак 8000 және 28 000 CoronaVac. Бірінші компонентпен барлығы – 396 622 адам, ал екіншісімен – 227 445егілді.