Еңбекшіқазақ ауданы әкім аппаратының АХАТ бөлімі, Сіздерге Қазақстан Республикасы Әділет министрлігінің Тіркеу қызметі және заң қызметін ұйымдастыру департаменті балалардың туу туралы куәліктерін беруге қатысты 18.11.2020 жылғы №1-9-/5562-И хатына сәйкес, келесіні хабарлайды:

«Қазақстан Республикасының кейбір заңнамалық актілеріне мемлекеттік қызметтер көрсету мәселелері бойынша өзгерістер мен толықтырулар енгізу туралы» Қазақстан Республикасының 2019 жылғы 25 қарашадағы Заңына сәйкес бала асырап алуды және әке болуды анықтауды мемлекеттік тіркеу туралы баптарды алып тастағанын хабарлайды.

Бала асырап алу және әке болуды анықтау оқиғалары мен фактілері тиісті өзгерістер, толықтырулар енгізу арқылы тууды мемлекеттік тіркеу туралы акт жазбасында көрсетеді.

Осылайша, жоғарыда аталған өтініштер келіп түскенде, тек туу туралы куәлік беріледі.

Сонымен қатар, «Азаматтық хал актілерін мемлекеттік тіркеу актісі кітаптарының нысандарын және осы кітаптардағы жаз-балардың негізінде берілетін куәліктердің нысандарын бекіту туралы» Қазақстан Республикасы Әділет министрінің 2015 жылғы 12 қаңтардағы № 9 бұйрығына өзгерістер мен толықтырулар енгізу туралы» Қазақстан Республикасы Әділет министрінің 2020 жылғы 28 сәуірдегі № 21 бұйрығына сәйкес, бала асырап алу және әке болуды анықтау акт жазбалары мен  куәліктердің нысандары алып тасталды.

Демек, аталған түрлер бойынша куәліктер қайта берілмейді. Растайтын құжат алу қажет болған жағдайда, бекітілген үлгіге сәйкес енгізілген өзгерістің негіздемесі көрсетілген  туу туралы анықтама беріледі.

Азаматтардың негізделген шағымдарын және әлеуметтік шиеленісті болдырмау мақсатында, тіркеуші органдар туу туралы анықтамаларды берген жағдайда, мұндай анықтамалардың туу туралы куәлікке тең екендігін және куәліктерге ақысыз айырбастау мүмкіндігі туралы ақпаратты назарларыңызға жеткізеді.          

Еңбекшіқазақ ауданы тұрғындарының назарына туу туралы, некеге отыру, некені бұзу,қайтыс болғандығы туралы куәлік алу және азаматтық хал атілеріне өзгеріс енгізу туралы мемлекеттік қызметтерді «электрондық үкіметтің» веб-порталы www.egov.kz арқылы бере алатындығы туралы хабардар етеміз.

Байланыс тел.:7-21-10.

   Г.К.Кульжабаева,

АХАТ бөлімінің басшысы

Қазақ халқы ұрпақ тәрбиесіне бей-жай қарамаған. «Ұяда не көрсе, ұшқанда соны іледі», − деп отбасындағы  қарым-қатынасқа ерекше көңіл бөледі. Тал шыбықтың басын қалай бұрсаң солай иілетіні сияқты жас жеткіншектің де діңгегінің берік болмағына ата-анасы берер тәлімінің орны бөлек. Соның ішінде, әжелер академиясының өнегелі болашақ қалыптастырудағы үлес салмағы зор екені анық. Оған әже мейіріне бөленіп өскен, бүгінде тұлға ретінде қалыптасып үлгерген жандардың өзі куә. Мәселен, кейіпкеріміз Әлім Әсел «Әжем менің адам болып қалыптасуыма айрықша ықпал етті» дейді. Әлім Әсел – Әл-Фараби атындағы Қазақ ұлттық университеті, журналистика факультетінде оқытушы. Болашақ БАҚ саласының мамандарын даярлауда өзіндік тәлімін беріп, тәжірибесімен бөлісіп отырған ұстаз.

«Әже тәрбиесі немере үшін ғана емес, келін және отбасының өзге де мүшелері үшін маңызды. Ол – ақылшы. Әкем мен анам бала күнімде өздері жұмыс істеп, қызметтерін атқару үшін әжеме апарып тастаған екен. Әжемнің қасында еркелеп өстім. Бақытты бал балалық шақтың иесі болдым», – деп сағынышын жеткізе сөйледі. Кейіпкеріміз «Қарты бар үйдің – қазынасы бар» дей келе, сол қазыналарды бағалай білуге шақырды. «Себебі, тап осы сәт қайталанып келмейтіні анық. Сол секілді, ақ жаулықтыларымыздың жанында өткен әрбір уақыттың қадірін білмек керек», − дейді Әлім Әсел.

«Әжеме ілесіп жүретінмін. Үлкендердің арасында болып, әңгімелерін тыңдап өстім. Осының пайдасын көп көрдім. Ақсақалдардың өмір тәжірбиесінен сабақ алдым. Батасына да ие болдым. Мен үшін мұның барлығы үлкен мектеп болды. Әрине, базарлықсыз әжені елестетуге бола ма? Той-томалақтан құрт, кәмпитін міндетті түрде ала келетін. Оған біз де әдеттенгенбіз. Соның барлығы үйден табылып тұрса да, әжем қалтасына салып алып келген алманың дәмі бөлек еді. Бала-шаға болып, таласа-тармаса бөлісетінбіз. Ұлмекен әжем қазақ фольклорына қанық. Мақал-мәтел жаттатып, аңыз-әфсаналарды құлағыма сіңіріп өсірді. Одан бөлек, бүгінгі қоғам көп елей бермейтін ырым-тыйымдардың өзі сайып келгенде бала психологиясына өте пайдалы болады. Әже тәрбиесіне берілген бала міне, осының бәрін алып жетілер еді», − дейді Ә.Әлім.

«Қайтыс боларының алдында әжемнің  көзі көрмей кетті. Бала көңілім соған қатты қапаланатын» − деп әңгімесін көзіне жас ала түйіндеді. Соңында «Қарияларымыздың жасы ұзақ болсын!» деп тілегін айта келе, Мұқағали Мақатаевтың өлеңімен тәмамдады:

Әже, сен бірге жүрсің меніменен,

Өліге мен өзіңді телімегем.

Ақ кимешек киген бір кемпір көрсем,

Ақ кимешек астынан сені көрем.

Өңі-түсі өзіңнен бір аумайды,

Немересін ертпесе жүре алмайды.

Таныс дауыс, таныс сөз, таныс мәсі,

Көзіме оттай басылып, алаулайды...

Ілия СҰЛТАН

жемқорлықты болдырмаудың негізгі бастауы – жастарды бала кезінен тәрбиелеу болып табылады. Жоғарыда аталған мәселелер бойын-ша біздің Ы.Алтынсарин атындағы орта мектеп – мектеп жанындағы интернатымен және Қызылқазақ бастауыш мектебімен коммуналдық мемлекеттік мекемесінде сыбайлас жемқорлыққа қарсы күрес жөніндегі тәрбиелік іс-шаралар жоспары бекітіліп жүйелі түрде жүргізілуде.

Жақында  аудан  әкімдігі мен  ішкі саясат бөлімінің ұйымдастырған  жемқорлыққа қарсы еркін форматтағы «Саналы ұрпақ» эссе байқауында мектебіміздің жас мамандары кітапханашы  Туйтебаева Айгерім І орын, бастауыш сынып мұғалімі Боранбаева Айгерім ІІІ орын иегерлері атанды. Мұнымен айтпағымыз мектеп ұжымы ішінде жемқорлыққа «төзбеушілік» ұғымын қалыптастыру. Мұндай іс-шаралар тек биылғы оқу жылында ғана емес, бірнеше жылдар бойы атқарылып келеді. Әрине, сыбайлас жемқорлыққа қарсы күресті  қалыптастыру жолында мектептің атқаратын рөлі, жауапкершілігі жоғары деп санаймыз. Яғни жас ұрпақтың ауыр жүгін көтеруде біз мұғалімдер аянбай тер төгуіміз қажет.

Лейла ИТЕМИРОВА,

мектеп директорының тәрбие ісі жөніндегі

орынбасары

Тұлғасы білім мен мейірімнен қаланған ұлағат иесі ұстаз болу – асқан жауапкершілік. Себебі, сары ауыз балапандай алдына келген баланың қанатын қатайтып, өмір айдынына бейімдеу – атанға артарлық жүк. Мұны қазіргі карантин жағдайында жақсы біліп отырмыз. Әлбетте, әр істің бір қайыры бар. Осынау ел басына төнген сын сағат бір-біріміздің қадірімізді ұғынуға, еңбегімізді бағалауға мүмкіндік берген сыңайлы. Мектеп – ұстаз – ата-ана... Арасындағы жіпсіз байланыс нәтижесі – тәрбиелі, білімді жас ұрпақ. Осы орайда Б.Майлин атындағы орта мектептің бастауыш сынып мұғалімі Гүлнұр Жұмаханова жайлы әңгіме болмақ.

Әрине, мұғалім көп. Әйткенмен, бала бойындағы қабілетті көре білу, әрбірімен жеке жұмыс жүргізу, тұлғалық қасиетін дамыту екінің бірінің қолынан келмейді. Ақиқатында, біліксіз маман, жауапсыз ата-ана бар, ал жаман оқушы жоқ. Осыны жіті ұғынған Гүлнұр Абдвалиқызы 30 жылға жуық шәкірт тәрбиелеумен айналысуда. Жуырда еңбегі еленіп, аудан әкімінің Құрмет грамотасымен марапатталды. Аудандық «Ұстаздар әулеті» байқауында үздық шығып, облысқа жолдама алды. Әке-шешесі осынау ұлы қызмет жолына ғұмырын арнаған ұстаздар әулетінен шыққан Гүлнұр Абдвалиқызы пайым-парасатымен оқушылары алдында абыройлы.

Бүгінгі жас буын – желкілдеп өскен жас шыбық іспетті. Оны қалай бұрсаң, тамыры солай бекиді. Біздің қуанатымыз – Гүлнұр Жұмаханова секілді білікті ұстаз қолында балапандарымыз тәрбиеленіп жатқандығы. Әрине, осындай ұстаздар саны еселеп өссе деген тілекпен

Б.Майлин атындағы

мектептің 3 «ә» сынып ата-аналары