Алматы қаласының №7 қалалық клиникалық ауруханасы емханасының дәрігер-эпидемиологы Айдана Дарбекова коронавирус инфекциясының өсуіне не себеп болуы мүмкін екенін түсіндіріп, вирустың алдын алуға көмектесетін ақыл-кеңесін айтты.

– Коронавирус кенеттен пайда болғандай дәл солай жоғалып кетуі мүмкін бе?

– Шамасы, COVID-19 вирусы келесі жылы да мүлдем жойылмайды және ЖРВИ тудыратын микроағзалардың үлкен тобындағы вирустардың біріне айналады. Аурудың өршуі әр адамның жеке ерекшеліктеріне байланысты. Инфекция ауруындағы микроағзалардың қарсыласу факторларынан және аурудың түрлі дәрежесінен бөлек, қоздырғыштың вируленттілігі және оның адам ағзасына түсетін мөлшері маңызды. Бұл барлық жұқпалы ауруларға, соның ішінде COVID-19-ға да қатысты.

– Коронавирус пен тұмау қатар келіп қалса, күшейе түсе ме?

– Мұндай гипотезалар бар, бірақ аурудың мұндай расталған жағдайлары болған жоқ. Себебі, бағымызға қарай тұмау эпидемиясы әлі болған жоқ. Коронавирус пен тұмау вирусының ықтимал «қабаттасып келуін» болдырмау үшін халықты алдын ала вакцинациялау жүргізілді. Бұл әсіресе ең осал санаттарға қатысты. Тұмау вирусы мен COVID-19 бір аймақта жұмыс істейтін пневмотропты инфекциялардың екі қоздырғышы деп нақты айта аламыз. Егер біреуі қабынуға ықпал етсе, екіншісі жою үшін жұмыс істей алмайды. Олар бір-бірін күшейтеді.

Тұмау вирусы жылына екі рет – күздің аяғында және ерте көктемде, суық және ылғалды болған кезде белсенді түрде жүреді. Бұл екі кезең эпидемиялық болып саналады. Эпидемия аралық кезеңде ол жасырын инфекция түрінде сақталады.

– Ылғал деңгейі СOVID-19-дың берілу қарқынына қалай әсер етуі мүмкін?

– Ғимараттардағы, пәтерлердегі және басқа бөлмелердегі микроклимат, дәлірек айтқанда, ауаның салыстырмалы ылғалдылығы әсер етеді. Біз өміріміздің көп бөлігін үй-жайларда, бір-бірімізге жақын жерде өткіземіз. Адамның иммундық жүйесінің қоздырғыштарға жауап беру қабілеті құрғақ ауада басылады.

Салыстырмалы ылғалдылығы 40-тан 60 пайызға дейінгі ортада адамдар вирустарды басқаларға беру қабілетінің төмендігін көрсетті. Сонымен қатар салыстырмалы ылғалдылығы жоғары бөлмеде респираторлы вирустың таралуына қолайлы жағдай жасалды және беткі қабаттарға орнады.

Тұрғындар беткі қабаттарды дезинфекциялаудың және жеке гигиенаның маңыздылығын, сондай-ақ коронавирус жұқтырған адаммен тығыз байланыс арқылы берілетінін ұмытпауы керек. Үйлердегі салыстырмалы ылғалдылықты 50 пайыз деңгейінде сақтау ұсынылады.

– Коронавирус пандемиясы кезінде қандай өнімдер қауіпті?

– Суық тию мен вирус инфекциялары кезінде иммунитет өте маңызды, сондықтан оны сақтау үшін дұрыс тамақтану керек. Тамаққа дәрумендер мен минералдары бар көкөністер мен аскөкті қосыңыз.

Дегенмен, қолданыстан мүлде шығарып тастайтын өнімдер бар. Бұл санатқа тағамдық құндылығының болмауына байланысты консервілер кіреді. Қант қан тамырларының қабырғаларына теріс әсер етеді, сондықтан оны да қолданбаған дұрыс. Қуырылған тағамдар мен фаст-фудты тұтынуды азайту керек.

– Карантин шараларын сақтаумен қатар, коронавирустан қорғанудың белгілі бір ережелері бар ма?

– Бүгінгі таңда пандемияны карантин шаралары мен әлеуметтік арақашықтық қана жеңе алмайды. Тамақтану режимі де назар аударатын жалғыз нәрсе емес. Жалпы, респираторлық инфекциялардың алдын алу үшін күйзелістен аулақ болу керек, көбірек қозғалып, таза ауамен тыныстаған жөн. Мүмкіндігінше барлық сақтық шараларын және иммунитетті сақтау қажет. Біздің денсаулығымыз өз қолымызда.

– Сұхбатыңызға рақмет!

Дереккөз

ҚР Премьер-Министрі Асқар Мамин ҚР аумағында коронавирус инфекциясының таралуына жол бермеу жөніндегі ведомствоаралық комиссияның (ВАК) селекторлық отырысын өткізді. Санитарлық-эпидемиологиялық ахуал туралы денсаулық сақтау министрі А. Цой, дәрі-дәрмектерге баға саясатын мониторингтеу жұмысы туралы Бәсекелестікті қорғау және дамыту агенттігінің төрағасы С. Жұманғарин, карантиндік шаралардың сақталуын бақылау туралы ішкі істер министрі Е. Тұрғымбаев, өңірлердегі жағдай туралы Атырау облысының әкімі М. Досмұхамбетов, Павлодар облысының әкімі Ә. Сқақов, Қостанай облысының әкімі А. Мұхамбетов баяндады. ҚР-да коронавирус инфекциясының таралуы бақыланатын деңгейде тұр.

Коронавирус инфекциясымен жаңадан сырқаттанғандардың тәуліктік өсімі 0,4%-ды, репродуктивтік көрсеткіші 0,9-ды құрайды. Инфекциялық төсек орындарының толымдылығы – 28%, реанимациялық төсек орындарының толымдылығы – 20%. 5 өңір жоғары және орташа тәуекел аймақтарында орналасқан, атап айтсақ: Атырау, Қостанай, Павлодар, Солтүстік Қазақстан және Ақмола облыстары. Келесі жылғы қаңтар-ақпан айларында ЖРВИ мен тұмаудың өсуі аясында коронавирус инфекциясымен сырқаттану деңгейінің арту қаупі бар.
Осыған байланысты ВАК бірқатар шешім қабылдады: 2020 жылғы 25 желтоқсаннан бастап 2021 жылғы 5 қаңтарға дейін ойын-сауық, спорттық және басқа да бұқаралық іс-шараларды, оның ішінде жаңа жылдық ертеңгіліктер мен мерекелік корпоративтерді өткізуге тыйым салынады. Эпидемиологиялық жағдай тұрақталғанға дейін «Теңіз» кен орнында шектеу шаралары күшейтіледі. Бөлшек сауда желісінде антиковидті дәрілік заттардың бағасын орта есеппен 24%-ға төмендету бойынша шаралар қабылдау. Сонымен қатар білім беру сапасын қамтамасыз ету мақсатында, Білім және ғылым министрлігінің ұсынысы бойынша, сондай-ақ қоғамның пікірін ескере отырып, келесі шешімдер қабылданды:  оқу жылының III тоқсанынан бастап бітіруші сыныптар үшін (9,11,12 сыныптар) санитарлық-эпидемиологиялық талаптарды сақтай отырып, аралас оқыту (пәндердің 70%-ын – дәстүрлі форматта, 30%-ын – қашықтан) қарастырылсын; оқу жылының III тоқсанынан бастап мектеп оқушыларының біліміндегі олқылықтардың орнын толтыру мақсатында сабақтан тыс уақытта 5 адамнан аспайтын топтарда жеке консультация ұйымдастырылсын; II семестрден бастап колледждер мен жоғары оқу орындарының бірінші курс студенттерін аралас оқыту қайта басталсын.  Үкімет басшысы әкімдерге өңірдегі эпидемиологиялық жағдайға байланысты жағдайды тұрақтандыру мақсатында қажетті шектеу шараларын қабылдауды тапсырды. Премьер-Министр әкімдердің назарын қоғамдық орындарды, мектептер мен балабақшаларды сапалы санитарлық өңдеу, сондай-ақ егу пункттерін вакцинациялауға дайындау қажеттігіне аударды. Ішкі істер министрлігіне әкімдіктермен бірлесіп, мереке алдындағы және мереке күндері санитарлық-эпидемиологиялық талаптарды сақтауды қамтамасыз ету тапсырылды.

Дереккөз

Еліміздің тәуелсіздігі – ата-бабамыздың асқақ арманынан туындаған, бүгінгі ұрпақ қол жеткізген ұлы жеңіс. Міне, ежелден еркіндік аңсаған азат халқымыз тәуелсіздіктің жиырма тоғыз жылдығына табалдырық аттады. Тәуелсіздік! Қасиетті де құдіретті осы бір ұғымның тереңіне зер салып, ой жіберейік.

Тәуелсіздік атты бұл тәтті сөздің тұңғиығында ата-бабамыздың ғасырлар бойғы асыл арманы, азаттық жолында құрбан болған талай-талай боздақтардың ұрпаққа қалдырған аманаты жатыр. Қазақ ұлтының бүгінге дейінгі қат-қабат тарихының басты мазмұны – азаттық үшін күрес. Тәуелсіздік – ұлттық тілдің, дәстүрдің, салт-сананың мызғымас тірегі, күші, алтын діңгегі, халықтың бақ жұлдызы. Тәуелсіздік – арман! Жер бетінде қанша ұлт болса, сонша арман бар. Сол арманға біздің қазақ халқы жетті. Қазақ халқы қиын-қыстау кезеңдерде салғырттыққа салынбай, елі үшін, елінің келешегі, бостандығы үшін бастарын бәйгеге тікті. Олардың арманы қазақ халқының азаттығы, тәуелсіздігі еді. Сол үшін қандай қауіп-қатер болса да, жасымады. Сөйтіп, жерімізді аман-есен қорғап, бізге аманат етіп тапсырды. Міне, бүгінгі таңда ата-бабаларымыз аңсаған бостандыққа қол жеткізіп, тәуелсіз ел атанғанымызға 29 жыл болды.

Мұхтар Шаханов:

Желтоқсанда шындық жырын шырқаймын деп шарқ ұрдың,

Желтоқсанда егеменді ел болсақ деп талпындың, – деп жырлағандай,

еліміздің өрімдей ұл-қыздары 1986 жылы алаңға шықты. Тарихта алтын әріптермен жазылған Желтоқсан оқиғасы кеңестік империяның шаңырағын шайқалтты. Мұз құрсанған желтоқсан ызғарын еріткен жастық жалын иелері сол күні тәуелсіздік жолында мерт болған арыстарымыздың аңсаған арманын ту етіп, халқымыздың намысын кеудесін тосып қорғады. Тәуелсіздік деген қасиетті ұғым – тек қазақтарға ғана емес, қазақ жерін мекендеген, оған кіндік қаны тамып, бірге қайнап-бітіскен, туған топырағым деп егілген басқа ұлттар мен ұлыстардың да ортақ игілігі. Ғасырлар бойы аңсатып жеткен азаттықпен, тәуелсіздікпен келген халық рухының асқақтығы мәңгілік болғай! Көк туымыз көкте желбіреп, тұғырымыз биік болсын!

 Майгүл Сатымбай, 

Н.Островский атындағы орта мектептің қазақ тілі мен әдебиеті пәні мұғалімі

Әлемдік сарапшылар спортты ел дамуындағы ең маңызды көрсеткіштердің бірі ретінде бағалайды. Өйткені спорт – халық  денсаулығының  кепілі. Бүгінде ауданымызда спорттың дамуына мол мүмкіндіктер жасалуда. Дей тұрғанмен, өңірде кенжелеп қалған спорт түрлері де жоқ емес. «Түлеуі мен түрленуіне түрлі факторлар кедергі болған  спорт түрлерін дамытудың қандай ұтымды жолдары бар?» деген сауал төңірегінде спорт сарапшыларымен ой бөліскен едік.

Елбасы Н.Ә.Назарбаев өзінің «Қазақстан 2050» стратегиялық бағдарламасында халықты саламатты өмір салтына ынталандыруды басым бағыттың бірі ретінде атап көрсеткен болатын. Қазіргі таңда ауданымызда бұқаралық спорт жарыстарын ұйымдастыруға, тұрғындардың  қалаған спорт түрімен  айналысуға мүмкіндік беретін  395 спорттық нысан жұмыс істейді.

Аудандық дене шынықтыру және спорт бөлімінің ақпаратына негізделсек, бүгінде өңір  тұрғындары тегін спорттық секцияларға бара алады. Атап айтқанда, баскетболдан, волейболдан, футболдан, гандболдан, үстел теннисінен, регби, сол секілді 85-ке жуық секция өз жұмысын атқарып келеді. Сонымен қоса дзюдодан, бокстан, самбодан, еркін күрестен, гір спорты, семсемсерлесуден, дартс, жеңіл атлетикадан, шахмат, дойбыдан – 40-қа  жуық секцияның  қызығушыларға есігі айқара ашық. Қазақша күрес, көкпар, тоғызқұмалақ, теңге ілу, асық ату сынды  ұлттық спорт түрлерінен – 40-қа жуық секция өңір спортының дамуына үлес қосып келеді.

Жоғарыдағы секциялар аудан спортын алға сүйреуге өзіндік серпін беруде. Дегенмен, ауданымызда кері кеткен немесе кенжелеп қалған спорт түрлері де жоқ емес. Спорт бөлімінің мәліметіне қарағанда, ауданымызда гандбол, жүзу, қысқы спорт ойындардың дамуы тежеліп отыр. Бұл ретте,  бөлім басшысы Ерболат Сарабеков: «Ауданымызда қысқы спорт түрлеріне және жүзу спортына арналған ғимараттар мен алаңдар жоқ. Арнайы орындармен, жабдықтармен қамтылмаған. Осыған байланысты, алдағы уақытта бассейндер мен қысқы спорт түрлеріне арналған спорттық  базаларға бюджеттен сұраныс қарастырылады. Әсіресе, гандболдан жаттықтырушылар құрамы жетіспейді. 300 мыңнан астам тұрғын өмір сүретін ауданда небәрі 6 гандбол жаттықтырушы бар. Сол себепті алдағы уақытта басқа аумақтардан гандбол жаттықтырушыларын тарту жұмыстарын қолға аламыз. Өйткені гандбол мен жүзу түріне сұраныс көп. Аталған спорт түрлеріне жастардың қызығушылығы аса жоғары. Бірақ біз бапкерлердің аздығы мен  бассейндердің жоқтығынан  жұрт сұранысына жауап бере  алмай отырмыз», – дейді.

Дене шынықтыру және спорт бөлімінің дерегінше, облысымызда гандбол спорты қарқынды дамып келеді. Әсіресе, іргелес жатқан Іле ауданының гандбол командасы халықаралық деңгейде де жеңіс тұғырынан көріне бастаған. Бүгінгі таңда Алматы облысының Алакөл, Панфилов, Райымбек, Қарасай, Еңбекшіқазақ, Талғар және Қарасай аудандарында гандболдан бөлімшелер ашылған. Ол гандбол филиалдары жалпы білім беретін мектептердің базасында жұмыс істеп келеді. Ауданымызда да жасөспірімдердің гандбол спортына қызығушылығы арта түсуде. Өйткені қол добы спорты нағыз тер төгіп, шеберлікті паш ететін олимпиадалық спорт ойыны. Бөлім мамандары  көршілес ауданның көрнекті  нәтижесі бізге де әсер  ететіндігін, қазір олардың үздік тәжірибесін үйреніп жатқандығын айтады.

Шыны керек, ауданымызда қысқы спорт түрлерінің де тұралап тұрған жайы бар. Сарапшылар базаның жоқтығы, бапкердің тапшылығы және ке-ректі ресурстардың жетіспеушілігі аталмыш спорттың аяғына тұсау салып отырғанын растайды. Десе де, қысқы спорт  әлеуетінің артуына мұрындық болатын қажеттіліктер де керек. Талай байрақты бәсекеде ел намысын қорғаған спорт саңлағы, КСРО спорт шебері Алпыс Ермағанбетов қысқы спорттың тамырына қан жүгірту үшін оны бұқаралық спорт түріне айналдыру қажет деп санайды. Спорт шеберінің сөзінше, қысқы спорты дамыған Канада, Ресей сияқты елдерде қысқы ойындар бұқаралық спорт ретінде қаралады. Аталған елдерде миллиондаған адам қысқы ойындарға әуестенеді. Мысалы, бізде бокс бұқаралық спорт түріне айналған. Сондықтан екінің бірі бокс залына барады. Сол мыңдаған әуесқой арасынан жүздеген үздік боксшы жетіліп шығады. Сондықтан да Қазақстан әлемдік әуесқой бокста ең мықты елдердің бірі саналады. Спорт шебері ауданымыздағы мектептер мен мекемелерде қысқы спортты насихаттау қажеттігін, сонымен бірге аудан көлемінде қысқы спорттан түрлі жарыстар жиі өткізілуі керек екендігін тіліне тиек етті. Өйткені  чемпионатта шеберлік шыңдалып, жүлдеге таласта жүйріктер сараланбақ. Бұл ретте Алпыс Ермағанбетов: «Қай-қай саланы дамыту үшін ең бастысы мықты база керек. Сосын барып нәтиже сұрауға болады. Қысқы спортты қолға алу үшін жүйелі жұмыстар жасалуы тиіс. Ең әуелі әр ауылдық округтен шағын болса да, мұз айдындарын салған жөн. Сосын аудан орталығынан қысы-жазы жұмыс жасайтын мұз сарайы болған дұрыс. Сонда қыс бойы өз ауылдарында коньки теуіп шыныққан балалар қар еріген соң аудан орталығында жаттығуын жалғастыра алады. Ең бастысы, қысқы спортты мектеп қабырғасынан бастап қолға алу қажет. Ол үшін мектептерде қысқы спортқа бағытталған оқу бағдарламасы әзірленіп, белгілі деңгейде базалық мүмкіндіктер жасалуы тиіс. Яғни, дене тәрбиесі пәні мұғалімдерін курстан өткізіп, қысқы спортты дамытуға мүмкіндік туғызу керек. Кезінде балаларды талай жарысқа апардық. Сонда байқағаным, балалар өздері айналысып көрмеген спорт түрлеріне қызығады. Баланың сол мінезін пайдаланып, қысқы спорт түрін дамытқанымыз дұрыс. Өйткені бұрын шаңғы теуіп көрмеген бала аса қызығушылықпен тез меңгеріп алады. Сондай-ақ осы спорт түрімен  айналысатындардың шеберлігін шыңдау мәселесі де назардан тыс қалмауы керек. Мен 60-тан асқан ша-ғымда шаңғышылардың чемпионатына қатысып, республикалық спорт шебері атанған талай жасты жолда қалдырдым. Бұл біздегі қысқы спорт шеберлерінің қай деңгейде екендігін көрсетеді. Сондықтан жоғары деңгейдегі спортшыларды тәрбиелеу үшін оқу орындарында іргелі теориялық және тәжірибелік әдістемелер жасалуы шарт. Қысқы спорт  түрлерін дамыту үшін нәтиже де аса маңызды. Қазір бізде облыстық чемпионатта топ жарып жүрген шаңғышылар бар. Бұл біздің ауданда қысқы спорт шеберлерінің жетіліп келе жатқанын көрсетеді. Егер олар республикалық және халықаралық жарыстарда  топ жарса, біздің өңірде қысқы спорттың дамуына  жаңа мүмкіндіктер туады», –  дейді.

Кей ауыл тұрғындары балаларды қысқы спортқа қызықтыру үшін әдемі етіп мұз қалашықтар салу керектігін, қазір қыстың уақытында балалар сыртқа шығып ойнамай, үйде смартфон мен компьютердің алдында отыратындығын айтады. Олардың сөзінше, егер ауданымызда бала қызығатындай сырғанақтар мен мұздан жасалған түрлі мүсіндер қойса, бала біткен сол маңнан табылады.

Қанатын кеңге жая алмаған спорт түрлерінің бойына қан жүгірту үшін жас спорт шеберлері мен мамандарды дайындаудың да  маңызы зор. Ол үшін болашақ спорт шеберлерін оқытуға мүмкіндіктер қарастырылуы тиіс. Осы ретте, ауданымыздағы №2 балалар мен жасөспірімдер спорт мектебі директорының міндетін атқарушы Мубарак Маметов: «Кенжелеп қалаған спорт түрлеріне серпін беру үшін оларды өнімді оқытуды қолға алу керек. Бізде гандбол, жүзуді оқыту бағдарламасына енгізу қиындық туғызып отыр. Өйткені аталған спорт түрін оқытуға базалық негізіміз  жоқ. Оның үстіне маман тапшылығы тағы бар. Себебі, біздегі төмен жалақыға жас мамандар жұмыс істегісі келмейді. Сондықтан жас мамандарды ауыл спортын дамытуға шақыратын кешенді бағдарлама керек», – дейді. Кей спорт мамандары: «Ауылға баратын спорт мамандарына жолақысын беру, пәтермен қамтамасыз ету, дұрыс еңбекақы төлеу секілді шараларды жүзеге асыру керек.  Кеңес заманында осы мәселе жақсы жолға қойылған еді. Соны жандандырған жөн. Өйткені жас маманды ынталандыру керек», – дейді. Ал аудандық дене шынықтыру және спорт бөлімі өңір спортын өркендетуге жас мамандарды шақыруға құлшыныс жасап жатқандығын, ағымдағы жылы «Дипломмен ауылға» бағдарламасы арқылы жас мамандардың жұмысқа алынғанын айтады. Олар бұл үдеріс алда жалғасын табатынын, десе де, осы мәселе жергілікті әкімдік тарапынан қолдауға мұқтаж  екенін  де жасырмайды.

Адамды ұтқыр шешімге, ұтымды ойға тәрбиелейтін спорт түрінің бірі – шахмат. Қазір қазақ елінде әлемдік белестерді бағындырған үздік шахмат шеберлері бар. Олардың халықаралық додаларда жеңіс тұғырында салтанат құруы шахматқа құмар әр жеткіншектің көкірегіне арман ұялататыны шындық. Бірақ сол шахматқұмар жалынды жастың шеберлігін шыңдауға жағдайдың жар бермейтіні тағы бар. Бұл сөзімізді шахмат шеберлерінің өзі растайды. №1 аудандық балалар мен жасөспірімдер спорт мектебінің шахмат шебері Диларам Ходжаниязованың айтуынша, қазір көптеген мектепте шахмат үйірмесін ұйымдастыратын кабинеттер жоқтың қасы. Сонымен қоса шахмат үйретуге арналған  кұрал-жабдықтар мен арнайы бапкерлер жетіспейді. Бұл жайт мектептердегі шахмат үйірмелерін ұйымдастыруға мүмкіндік бермей отыр. Бұл ретте Диларам Ходжаниязова: «Шахмат ақыл-парасаттың толысуына жол ашатын ойын. Ол тіпті жасөспірімдерді рухани дағдарыстан құтқарады. Ғалымдар шахмат арқылы суицидтің алдын алуға болатындығын айтады. Қазір елімізде өз-өзіне қол салатын оқушылардың қатары көбейіп барады. Сондықтан да мектептерде шахмат үйірмесін ұйымдастырудың маңызы зор. Алайда,  кей мектептер шахмат үйірмесін ұйымдастыруға селқос қарайды. Жақында №1 Рахат орта мектебінде шахмат үйі ашылды. Онда шахмат үйретуге жақсы жағдай жасалған. Сондықтан өзге  мектеп ұжымдары да   шахмат үйірмелерін ұйымдастыруға көңіл  бөлуі қажет», – дейді.

Белгілі спорт шебері Елмұрат Қайыпжанов аудан көлемінде қысқы спорт түрлерінің тым кенжелеп қалғандығын айтады. Оның сөзінше, спорттың бұл түрін дамытудың маңызы зор. Өйткені аталған спорт түрлерінің дамуына мүмкіндік берілсе, ауданымыздың спорттық әлеуетін арттырумен бірге қысқы туризмнің аяқ алысына да серпін беруге болады. Оның сөзінше, аудан аумағында қысқы спорт пен туризмді дамытудың мүмкіндіктері жеткілікті. Спорт шебері кенжелеп қалған спорт түрлерін дамытуды тек бюджет қаржысына сүйеніп шешу қиындық тудыратындығын, тұралап қалған спорт түрінің бойына қан жүгіртуге қаржылық әлеуеті бар азаматтардың демеушілік  жасауы керек екендігін айтады. Спорт саңлағының айтуына қарағанда, дамыған елдерде спортты бизнес ретінде қолға алып, оның әлеуеттенуіне арнайы жұмыс істейтін компаниялар  бар. Ол кез келген спортқа мүмкіндік жасаумен бірге өздері де пайда табады. Сондықтан да бізге де нарықтық сұранысқа сай спорт түрлерін дамытудың жолын іздеген жөн. Ал аудандық спорт бөлімі қазірге кенжелеп қалған спорт түрлерін дамытуға қаржы салғысы келетін кәсіпкерлердің  жоқ екендігін айтады.

ТҮЙІН:

Біз сөз етіп отырған спорт түрлеріне байланысты базаны жаңарту, әлемдік жарыстарға шығу, мәселесі ең өзекті. Осы түйінді  аудан басшылығы мен кәсіпкерлер басты назарға алып, жүйелі жұмыстар жасалса, қазірге тұралап қалған  спорттан да олжа  аларымыз хақ.

                                               Ерзат АСЫЛ