АТАУЛЫ КҮНДЕР

Достық құшақтың халықаралық күні

Бұл жаңа мерекенің дәстүрі бойынша танымайтын адамды да достық құшағына алуға болады. Мереке батыс еуропалық студент жастардан бастау алады. Қазақстан Республикасы Қарулы Күштерінің инженерлік әскер күні Тәуелсіз Қазақстанда инженерлік әскер Қарулы Күштер құрылғаннан бері бар. Инженерлік әскер жасақтарының сарбаздары еліміз аумағында да, шетелде де түрлі оқу-жаттығу жиындарына қатысып келеді.

ЕСТЕ ҚАЛАР ОҚИҒАЛАР

1932 жылы «Казахстанская правда» газетінің алғашқы нөмірі жарық көрді. «Казахстанская правда» газетінің бұрынғы атауы «Известия Киргизского края» болған, оның алғашқы нөмірі 1920 жылы 1 қаңтарда шықты. Ол бейсенбі сайын шығатын апталық газет болды. 1932 жылғы 20 қаңтарда Қазрайком III Пленумының қаулысымен «Советская степь» «Казахстанская правда» болып өзгертілді. 1932 жылғы 21 қаңтардан бастап алғашқы нөмірі шыға бастады.

1992 жылы Гурьев облысы мен Гурьев қаласы (1640 жылы негізі қаланған) Атырау облысы және Атырау қаласы болып өзгертілді. Облыс аумағы 113,5 мың шаршы км. Облыс құрамына бір қала мен жеті аудан кіреді. 1995 жылы Қазақстанда «Іскер әйелдер қауымдастығы» республикалық қоғамдық бірлестігі құрылды. Бірлестік іскер әйелдердің қызмет саласын мен әлеуметтік бағыттылығынан тыс іскер әйелдердің жоғары мәртебесі мен имиджін қалыптастыру, іскер әйелдерді шоғырландыру, сондай-ақ әйелдер мен отбасы құқықтары мен мүдделерін қорғау мақсатында құрылды.

1997 жылы Алматыдағы Магнитогорск көшесі актер, КСРО-ның халық әртісі Ыдырыс Ноғайбаевтың атына өзгертілді.

2009 жылы Республиканың елордасында қаланың 10 жылдық мерейтойына арналған «Астана» энциклопедиясының тұсаукесер рәсімі өтті. Одан қаланың тарихы, экономикасы, тұрғындар құрамы, мәдениеті, бiлiмі, ғылымы, көрікті жерлері, тарихи және мәдени мұрасы, қала құрылысы, сонымен бiрге сирек кездесетiн ғимараттар, сәулеттiк ансамбльдері туралы танысып білуге болады. Энциклопедияда ғылым мен бiлiм, өнер саласындағы белгiлi қайраткерлердің өмiрдеректері бар. Энциклопедия 20000 данамен қазақ және орыс тілінде шығарылған.

2013 жылы ҚР Президенті Нұрсұлтан Назарбаевтың Жарлығымен Астана қаласы мен Ақмола облысының шекаралары өзгерді. Осылайша Астана қаласы жерлерінің жалпы алаңы 17,1 гектар бөлігі Ақмола облысының Целиноград ауданының шекарасына және Ақмола облысы Целиноград ауданы жерлерінің жалпы алаңы 17,1 гектар бөлігі Астана қаласының шекарасына қосылды.

2014 жылы Нью-Йоркте БҰҰ жанындағы тұрақты өкілдер Қазақстаннан Қайрат Әбдірахманов пен Тринидад және Тобагодан Родней Чарлз екі мемлекет арасындағы дипломатиялық қатынастарды белгілеу туралы бірлескен құжатқа қол қойды. Тринидад және Тобаго - Кариб теңізінің оңтүстігінде орналасқан арал мемлекет, онда 1,3 миллионнан астам адам тұрады. Негізгі экономикалық секторлары - мұнай, табиғи газ өндіру және өңдеу.

2014 жылы Дүниежүзілік тхэквонодо федерациясының президенті Чунгвон Чо Нұрсұлтан Назарбаевқа құрметті тоғызыншы дан (WTF) мен белдік және кимано тарту етті. Мемлекет басшысы бұл киманоны тхэквондодан жоғары атақ алатын қазақстандық спортшыға сыйлайтынын атап өтті.

2016 жылы Түркі халықтарының бүкіләлемдік конгресі әл-Фараби атындағы Қазақ Ұлттық университетіне «Түркі елдерінің үздік жоғары оқу орны» атағын берді.

2017 жылы отандасымыз Кирилл Герасименко Қазақстан Республикасы тарихында ITTF World Tour жарыстарының ақтық кезеңіне өтіп, үстел теннисінен әлемдік тур чемпионы атанған тұңғыш спортшы болды. 21 жасқа дейінгі топта Астана қаласы әкімдігінің Мамандандырылған жоғары спорттық шеберлік мектебінің өкілі Кирилл Герасименко ақтық сында 3:2 есебімен француз Аккузу Каннан басым түсті.

2019 жылы Өскеменде Ольга Рыпакова сыйлығына жеңіл атлетикадан халықаралық турнир өтті. Михаил Литвин жеңіске жетіп, Қазақстанның жаңа жоғары жетістігін орнатты. Спортшы 400 метрге жүгіруден бірінші орын алды. Оның уақыты – 46.26 болып, Қазақстанның жаңа рекорды орнатылды.

Дереккөз: www.inform.kz/kz

– Еріктілер тобын құруға не түрткі болды?

– Мектеп бітіретін кезде ютуб желісінен Ардақ Назаровтың: «Егер шынымен лидер болсаң, достарыңды жина да, жетімдер үйіне, қарттар үйіне барып, көмектес. Жақсылық жаса!» деген сөздерін естідім. Бұл бірауыз сөз маған қатты әсер етті. Дәл сол уақытта жақсылық жасауға кірісіп кетпесем де, үнемі ойымда жүрді. Күзде оқуға түстім. Алматы – мүмкіндіктер қаласы ғой. Бірінші кезекте «Жақсылықта жарысайық» еріктілер тобына қосылдым. Сонда жүріп, қайырымдылық жұмыстарына белсене араластым. Жалпы, қайырымдылық шараларын ұйымдастырудың қыр-сырын жан-жақты меңгеруге тырыстым. Жәрмеңке қалай өткізіледі, шынымен мұқтаж жандардың жай-күйі қалай тексеріледі, кімге қалай көмектесуге болады, топ мүшелерімен жұмыс жасау, тағысын тағы. Мендегі мақсат – мұны зерттеп-біліп, Есікке алып келу болды. Айналасындағыларға көмек қолын созатын, бойына жақсы әдет қалыптастырған, өздерін дамытуға құштар жастардың керемет ортасын өз қаламда қалыптастыруды ойладым. Осы ойымды достарым мен таныстарыма, жан-жағымдағылардың бәріне үнемі айтып жүрдім. Осылайша, 2019 жылы 9 сәуірде «Иманды жастар» еріктілер тобын құрдық. Топтағы қыздардың жетекшісі – Динара Сейілханова, ал мен ­– ұлдардың жетекшісімін.

– Топтың атына тоқталып өтсеңіз...

– Мәшһүр Жүсіп атамыз «Ер жігіттің бойында бес қасиет болады: біріншісі – имандылық, екіншісі – сабыр, үшіншісі – ақыл, төртіншісі – тәубе мен шүкір, бесіншісі – көркем мінез» деген екен. Егер жүрегіңде иманың болса, өтірік айтпайсың, біреудің ақысын жемейсің, көптеген зиянды әдеттерден аулақ боласың, тек жақсылыққа ұмтыласың ғой. Сол себепті біз топтың атын «Иманды жастар» деп атауды жөн көрдік.

– Топтарыңыздың ең бірінші жасаған қайырымдылық шарасы қандай болды?

– 30 бала асырап алған Нұрым аға мен Роза апайдың үйіне бардық. Сол кісілердің балаларына шағын концерт қойып, сыйлық жасадық, дастархан жайдық. Балалармен ойнап, көңілдерін көтердік. 30 шақты ерікті келген болатын, сол жерде бір-бірімізбен танысып, керемет кездесу болды. Одан кейін еріктілер жиналып, Есік қаласының орталығындағы мешітке тазалық жұмыстарын жүргіздік. Ауызашар ұйымдастырып, қадір түнінде мешіттерде интеллектуалдық ойындар өткіздік. Сол күні жәрмеңке жасап, одан түскен қаражатқа үш отбасына азық-түлік алдық. Осылай қайырымдылық шаралары бірінен соң бірі жалғасып кете берді.

– Қаражатты қайдан аласыздар?

– Негізінен, жәрмеңке өткіземіз. Және топтағы еріктілер айына 500-1000 теңгеден өзіміз жинаймыз. Тобымызда 14-23 жас аралығындағы жастар. Мектеп оқушылары, көбі – студенттер. Сондықтан ақша бәрінде бірдей бола бермейді. Сондай-ақ 10 мың, 30 мың теңгені бірден беретін қайырымды жандар да бар.

– Ондай жомарт жандар көп пе?

– Аллаға шүкір, бар. Бірақ көп емес.

– Ал өздеріңіздің жағдайы жақсы азаматтардан, мықты кәсіпкерлерден қайырымдылыққа қаржы сұраған кездеріңіз болды ма?

– Болды, бір-екі рет. Бірақ бізді көп ешкім танымайтындықтан, сене бермейді ғой. Қазір ақырындап танылып келе жатқандықтан, жаңа жобаларды қолға алмақпыз. Жоспарымыз көп. Ауданымыздағы кәсіпкерлермен бірлесе жұмыс істеуді ойластырып отырмыз. Әлеуметтік желілерде оларға жарнама жасап, қайырымдылыққа тартқымыз келеді. Арман-мақсатымыз көп.

– Ауданымызда көмекке мұқтаж жандар көп пе?

– Көп. Азық-түлік, баспана, көбі дәрі-дәрмекке мұқтаж. Науқас жандарға операцияға ақша жинадық.

– Нақты мысал келтірсеңіз...

– «Атрезия хоан» диагнозы қойылған кішкентай қыздың еміне қаражат жинап, «Үміт күткен періште» деген атпен қайырымдылық кешін ұйымдастырдық. Жәрмеңке өткіздік. Бас-аяғын қосқанда 1 млн. теңгеге жуық ақша жиналды. Бұл – әзірше біз ұйымдастырған ауқымды шара.

– Жиналған қаржы – халықтікі. Яғни қайырымды жандардың жинап бергені. Осы орайда сіздер халыққа қандай да бір есеп бересіздер ме?

– Әрине. Ақшаны халықтың көзінше мұқтаж адамға тапсырамыз. Сондай-ақ инстаграм әлеуметтік желісіндегі парақшамызда (@imandy.zhastar) үнемі есеп беріп отырамыз. Жақында «Жүз игі іс» атты шара ұйымдастырдық. Тобымызды 5 топқа бөліп, әрқайсысына жетекші тағайындадық та, әр топ бір айда, кемінде, он игі іс жасауы керек деген тапсырма қойдық. Бұл жобамыз өте керемет өтті. Әр топ бір-бірімен жарысып, игі істер атқарды. Жақсылық жасап жарыстық. Мұнда мәселе ақшада емес. Көмектессем деген ниет болса, жеткілікті. Жоба барысында әркім қолынан келгенінше көмегің тигізуге тырысты. Біріміз жол жиегінде қар тазалап жүрген жандарға көмектессек, енді біріміз күннің суығында далада жұмыс істейтіндерге ыстық шайы мен бауырсағын апарып қуанттық. Алматыдағы «Ықылас» қайырымдылық қорымен бірігіп, Алматы орталық мешітінде және Есік қаласында жәрмеңке өткізіп, одан түскен қаржыға 20 отбасына азық-түлік алдық. Жағдайы төмен жандардың үйіне көмір түсіріп бергендер де болды. Кедей отбасынан шыққан балаларға Алматыны аралатып, ойын-сауық орталығына апарған топ та бар. Қарттардың үй-жайын тазалап көмектескен еріктілер де болды. Мұның бәрі – қайырымдылық. Қайырымдылықтың үлкен-кішісі болмайды. Осы жобадан кейін тобымызбен жиналып, атқарған істеріміздің есебін бірге тыңдап-көріп, топ мүшелерін марапаттадық. Алдағы уақытта да осы жобаны жалғастырамыз деп шештік. Қазіргі уақытта Есік орталық мешітінің жанынан салынып жатқан әйелдер медресесінің құрылысына қаржы жинап жатырмыз. Осы орайда жәрмеңке өткізіп, оны ары қарай жалғастыруды қайырымдылық қорлары, еріктілер топтары мен кәсіпкерлерге эстафета ретінде жолдап отырмыз. Осылайша олар да медресенің салынуына өз үлестерін қосады.

– Еріктілер тобын құру оңай ма?

– Сырттан оңай болып көрінер, бірақ қиындығы да жоқ емес. Қайырымдылық шараларын ұйымдастыру кезіндегі ары-бері шапқылау былай тұрсын, топтың ауызбіршілікте, ұйымдасып жұмыс істеуі үшін де бәріміздің күш салуымыз керек. Өйткені топтағы жүз баланың жүз түрлі мінезі бар. Кейде бір-бірін түсінбей қалатын кездер де болады. Балалардың отбасында, сабағында немесе өз араларында қандай да бір қиындық туындап жатады. Соны өршітіп жібермей, қадағалап отыру – топ жетекшілерінің міндеті. Кейде «Осының бәрінің керегі не маған? Несіне жүгіріп жүрмін?» деп ойлап, бәрін тастап кеткім келеді. Бірақ қайырымдылық шарасын өткізіп, мұқтаж жанның қуанышын көргенде екіншісіне қалай кірісіп кеткеніңді байқамай қаласың. Алғысын айтып, арқаңнан қаққанда тағы біреуге қалай көмектессем деп тұрасың. Бұл әсерді өз бойыңнан өткізіп көру керек. Әйтпесе, менің сондай керемет сезіммен айтып отырғаным сізге әсер етпеуі де мүмкін. Ол күйді жақсылық жасағандар ғана түсінеді.

– Арман-мақсаттарыңыз қандай?

– Жасым да кіші, тәжірибем де аз, көргенім де шамалы. Бәрі уақытпен келеді ғой. Алда үлкен жобаларды қолға алсам деймін, үлкен қайырымдылық қорын құруды, мешіт, медресе салуды, барлық адам тегін кіретін спорт кешендерін ашуды армандаймын. Мақсат етемін. Өзіміздің кеңсемізді ашып, теолог, психолог мамандарды жұмысқа алғым келеді. Өйткені қазір ажырасулар көп. Соның салдарынан жетім мен жесір көп. Психологтар, теологтар ерлі-зайыптылардың екі жаққа кетуінен қандай қиындықтардың туындайтынын түсіндірсе. Алдына келген адамға рухани азық беріп, жігерлендірсе. Олардың құр жатпай, өздерін қолға алуларына түрткі болар еді. Рухани бай адам сынып кетпейді. Қалай да тырмысады ғой. Сондай-ақ «Бере бер, тағы да бер» деуден ұялмайтын адамдар бар. Біздің мамандар сондай өтірік мұқтаж болатын жандармен жұмыс істесе деймін. «Балық берме, қармақ бер» дегендей, мамандарымыз адамдардың жан дүниесін түсініп, оларға жол сілтесе. Ауданымыздағы кәсіпкерлермен байланыста болып, мұқтаж жандарға жұмыс орындарын тауып берсек. Менде мұндай мақсат көп.

– Мақсаттарыңызға жетіңіз!

Сұқбаттасқан

Құралай МҰРАТҚЫЗЫ

Биыл – қазақ халқының ұлы ақыны, ағартушысы ­– Абай Құнанбайұлының 175 жылдығы. Сонымен қатар «Волонтер жылы» деп белгіленді. Еріктілер қатарында 7 жылдан бері жұмыс істеп жүргендіктен, жастарды осынау үлкен іс-шараға атсалысуға шақырамын.

Еңбекшіқазақ ауданы – Алматы облысындағы ең ірі аудандардың бірі. Бүгінде, жалпы, аудан бойынша 65 781 жас тіркелген екен. «Жұмыла көтерген жүк жеңіл» демекші, әрқайсымыз қолғабыс жасап, қолымыздан келгенінше мерейтойдың мәнді-мағыналы, үлкен дәрежеде өтуіне атсалысатын болсақ, оның өзімізге де пайдасы мол. Еріктілер қатарында мұндай шараларға қатысып, ұйымдастырушылықпен айналысуда рухани мол байлық аламыз. Ортамыз кеңейіп, өрісіміз артады. Әрі осындай үлкен істің бір жағында жүрудің өзі қай-қайсымызға мол тәжірибе болады.

«Болашақ жастардың қолында» дейміз. Болашақты жасайтын – өзіміз. Ендеше, жарқын болашақ үшін аянып қалмаңыз.

Қ. Ю. ТЮЛЮПОВ,

Жетісу заң колледжінің  ЖАС ОТАН ЖҚ төрағасы

Қоғамдық мониторинг аясында мемлекеттік қызмет көрсету бағытында орталық органдардың рейтингі жасалды.

«Қоғамдық мониторинг қорытындысы бойынша мемлекеттік қызмет көрсету бағытында орталық органдардың рейтингі жасалды. Оларда Ұлттық қауіпсіздік комитеті, Индустрия және инфрақұрылымдық даму министрілігі (орташа балл 4,99 және 4,95 сәйкесінше) көшбасшы болып отыр. Рейтингте Цифрлық даму, қорғаныс және аэроғарыш өнеркәсібі министрлігі, Энергетика министрлігі, Ұлттық банк, Қорғаныс министрлігі, Ұлттық экономика министрлігі жоғары позицияларда», - делінген Мемлекеттік қызмет істері жөніндегі агенттіктігі мәліметінде.

Агенттік мәліметінше, негізінен азаматтардың наразылығы кері байланыс сапасына, мемлекеттік қызмет мерзіміне, сондай-ақ қызмет көрсетуші қызметкерлер құзіреті мен жеделдігінің жетіспеушілігіне байланысты болды. «Мониторинг қорытындысы бойынша мемлекеттік қызмет көрсету тәртібін жақсарту, соның ішінде оларды жеңілдету, құжаттар тізімі мен мерзімін қысқарту, бизнес-процестерді автоматтандыру және оңтайландыру үшін ұсынымдар пысықталды. Тұрғындардың мемлекеттік қызмет көрсету сапасы бойынша қанағаттануы деңгейі 74,8 пайыз (бес балдық баған бойынша орташа баға 4,73 балды құрады) болса, бұл өткен жылғыдан 2,4 пайызға жоғары», - делінген хабарламада.

Мамандардың пікірінше, тұрғындарға қызмет көрсетумен байланысты «Азаматтарға арналған үкімет» мемлекеттік корпорациясы мен мемлекеттік органдар жұмысын оңтайландыру жөніндегі жұмыстарды жалғастыру қажет. Бұл жерде Мемлекеттік корпорация филиалдары мен мемлекеттік органдар арасындағы сапалы өзара байланыс та маңызды. «Өкілетті мемлекеттік органдарға қатысты айтар болсақ, онда электрондық мемлекеттік қызмет көрсету «бір терезе» қағидатына толық сәйкес келуі және әкімшіліктік кедергілерге жол бермеуі тиіс. Мысалы, электрондық өтініш берудің кейбір жағдайларында қызмет алушының құжаттарды жеткізіп беру, көрсетілетін қызмет қорытындысын алу және өзге де қызметтер үшін мемлекеттік органдарға жеке баруына тура келеді. Қызмет көрсетушілер бұл мәліметтерді мемлекеттік органдардың базасынан өздері сұратып алуы қажет. Бұл лицензияларды, рұқсаттамаларды, қорытындыларды, анықтамаларды және өзге де құжаттарды жинау мен берумен байланысты көптеген процестерді айтарлықтай жеделдетуге және жеңілдетуге мүмкіндік береді», - деп атап өтілген агенттік ұсынысында. Сонымен қатар, үйде берілетін мемлекеттік қызметтер тізімін кеңейту мүмкіндігін қарастыру қажеттігі айтылды. Сондай-ақ үйінде отырып қызмет алуға құқығы бар азаматтар категориясы тізімін кеңейту керек. Өйткені мүгедектерге ғана емес, сонымен қатар жасы бойынша зейнетке шыққандар, көпбалалы аналар үшін қызмет көрсету орындарына бару кейбір қиындықтарды тудырады. Бұдан бұрын хабарланғандай, Қазақстанда мемлекеттік қызмет көрсету сапасын мониторингілеу бойынша әлеуметтік зерттеулер жүргізу аяқталды. Ол Мемлекеттік қызмет істері жөніндегі агенттіктің мемлекеттік әлеуметтік тапсырысы аясында атқарылды. Қоғамдық мониторинг қорытындысы бойынша рейтингте ең жоғары баға алған мемлекеттік қызметтер анықталды.

Дереккөз:  https://www.inform.kz