Қазақстан Республикасының Президенті Қасым-Жомарт Кемелұлы Тоқаевтың биылғы Қазақстан халқына арнаған «Сындарлы қоғамдық диалог – Қазақстанның тұрақтылығы мен өркендеуінің негізі» атты Қазақстан халқына Жолдауының ең бастысы – қоғамдық диалог орнату болып табылады. Демек, халықпен байланыс орнату, қоғам үніне құлақ асатын мемлекет құру – ортақ мақсат.

Әрине, болашақтың бағыт-бағдарын айқындап берген бұл Жолдауда сыбайлас жемқорлықпен күрес қарқын алды. Бұл бағытта аудандық қазынашылық басқармасы тарапынан оңды жұмыстар қолға алынып отыр. Айталық, қазынашылық ұйымдарын цифрландыру жұмыстары үкімет тарапынан бекітілген «Цифрлық Қазақстан» мемлекеттік бағдарламасы негізінде «Ашық бюджет» қазынашылық комитетінің ақпараттық панелі жүйелі түрде жұмыс істеуде. Сонымен қатар аудандық басқарма қызметі цифрландыруға көшті. Атап айтқанда мемлекеттік мекемелерден қызметтер, жұмыстар өнім берушілерге «Қазынашылық-клиент» ақпараттық жүйесі арқылы қолма-қолсыз есеп айырысу үрдісінде жүргізіледі. Қазіргі таңда «Қазынашылық-клиент» ақпараттық жүйесі арқылы онлайн режимде аудандық мемлекеттік және коммуналдық мекемелер тарапынан қолма-қолсыз есеп айрысу бойынша ай сайын 1500-ге жуық төлемдер өткізіледі. Осыған қарамастан, қаржылық құжаттарды өңдеу уақыты жыл сайын қысқарған. Мысалы, бұрын төлемге берілген шотты өңдеуге, егер оны қатесін түзеу үшін қайтарылатынын есептегенде, орташа алған 3-4 күн кеткен болса, «Қазынашылық-клиент» ақпараттық жүйесі енгізілгеннен бері бұл уақыт 6 сағатқа дейін қысқарды.

Жоғарыда аталған негіздемелер Президент Жолдаулары аясында іске асырылып келеді. Бүгінгі жасап жатқан жұмысымызға, қазіргі іске асырып жатқан жобаларымызға жаңа тағы да бір серпін беретініне көзіміз жетіп отыр.

Н.ҚЫРҒЫЗБАЕВА,

Еңбекшіқазақ аудандық 

қазынашылық басқармасының бас маманы-бас қазынашысы.

Қазақстан азаматтардың өз-өзіне қол жұмсау рейтінгісінде әлемде алдыңғы қатарда тұр. Тығырықтан шығар жолды суи-цидтен іздейтіндердің арасында жастар мен жасөспірімдер жетіп-артылады. Осындай қайғылы оқиғалардың алдын алып, оны болдырмау үшін не істеу керек? Баламыздың күнделікті тыныс-тіршілігін бақылап отырмыз ба?

Күйбең тіршіліктің қамымен жүріп, күнделікті өмірде бауыр еті баламызға бір сәт те болса көңіл бөлуге уақыт таппай кететініміз жасырын емес. Оның қайда жүргендігі, қандай достармен араласып, бос уақытында немен айналысатындығынан ата-аналардың басым көпшілігі бейхабар. Осыны айтып дабыл қаққан психологтар көбіне моральдық, психологиялық көмекке зәру болған балалар өзіне қол жұмсайтындығын алға тартады. Жақында ғана ауданымызда болған «Nur Otan» партиясы жанындағы балалардың құқығын қорғау жөніндегі кеңестің мүшесі Мансия Исказина осылай деген еді.

– Бүгінде Алматы облысы өз-өзіне қол салатын жасөс-пірімдерден көш бастап тұр. Ағымдағы жылдың 8 айында 18 оқиға тіркелген. Бұл – өте үлкен көрсеткіш. Олардың суицидке баруының негізгі себебі,  ата-ана мен бала арасын-дағы кикілжің және жауапсыз махаббат. Оған қоса, қыз балалардың ерте бала көтеруі де жиі кездеседі. Бұрындары 16 жастағы қыздар екіқабат болса жағамызды ұстаушы едік. Қазіргі таңда 13 жастағы балалар жыныстық қатынаспен айналысып, бала көтеріп жүр. Сондай-ақ, кәмелеттік жасқа толмағандардың және оларға жасалатын қылмыс көрсеткіші де артып келеді – деген еді Мансия Аяпбергенқызы.

Статистикалық мәліметтерге сүйенсек, Қазақстан суицидтен әлем рейтингісінде 2017 жылы 5 орыннан бір-ақ шыққан. Ал балалар арасындағы суицид көрсеткіші жағынан былтыр 7 орынға тұрақтадық. Бұл қорқынышты статистиканы Денсаулық сақтау министрлігі де растаған. 2018 жылы елімізде 5 пен 17 жас аралығындағы 130-дан астам бала өз-өзіне қол салып, өмірмен ерте қош айтысқан. Ал 294 жасөспірім суицид жасауға талпынған. Қазақстандағы адамдарға психологиялық көмек көрсететін дағдарыс орталығының мәліметтеріне сүйенсек, күніне желіге келіп түсетін 70-80 қоңыраудың 15-17-сі суицидпен байланысты.

Бұл жағымсыз көрсет-кіштерді төмендету үшін елімізде республикалық деңгейде түрлі ауқымды жұмыстар атқарылуда. Балалар мен жасөспірімдерге арналған тәулік бойы қызмет көрсететін арнайы телефон желісі іске қосылды. Десек те, психолог мамандар балалармен жұмысты тікелей, уақытында жасау керектігін айтады. Сөзіне сүйенсек, балаға кішкентай кезінде көрсетілген қорлық, зорлық әрекеттері басында білінбей, өсе келе ашыла бастайды. Оның психикасы бұзылып, өзіне қол салуға ұзақ уақыттар бойы дайындалуы мүмкін. Дер кезінде осының алдын алу керек.

Ал балаларға зорлық-зомбылық мектеп қабырғасында көрсетілуі мүмкін. Әлімжеттікке шыдай алмаған қаншама оқушының ажал құшқанын көріп, естіп жүрміз. Осы проблеманы көтергенде тағы бір қордаланған мәселенің беті ашылады. Алысқа бармай-ақ, ауданымыздың өзінде жасөспірімдермен тікелей жұмыс жүргізетін ювеналдық полицияға қарасты мектеп инспекторлары тапшы. 84 мектепке – 20 инспектор. Демек, әр инспекторға 4 мектептен келеді. Оның ішінде мың, 2 мың бала оқитын оқу ордалары бар.

Жалпы, мемлекет қанша-ма қаражат бөліп, түрлі бағдар-ламалар қабылдағанымен суицидке түбегейлі тосқауыл бола алмайды. Баланың тәрбиесі, көңіл-күйі ата-ана тарапынан қатаң бақылауда болуы керек. Психологиялық көмекті психологтар емес, отбасы, ошақ қасында анасы жасау керек. Бала мен ата-ана арасында ашық диалог орнағанда ғана қордаланған мәселе оң шешімін табады.

С.НҰРАДИН.

Шағын және орта кәсіпкерлік тұрақты экономиканың негізгі тірегі екендігіне дау жоқ. Сондықтан, аграрлы ауданымыз осы саланың дамуына баса назар аударуда. Жеңілдетілген несие, қайтарымсыз субсидия мен гранттар... Ал мемлекет қол ұшын беріп отырған кәсіпкерлік дегенде көз алдымызға өндіріс орындары, сауда-саттық нысандары мен мал шаруашылығы келеді. Алайда, қарқынды бизнесімен қуатты мемлекет құруға тамшыдай болса үлесін қосып отырған бүгінгі кейіпкеріміз мүлдем басқа жолды таңдаған. Білім саласы мен бизнесті ұштастырған «Еркемай» оқу орталығының директоры Салтанат Бердібаева кәсіпкер атанып қана қоймай, ауданымыздың білім сапасын көтеру жолында еңбек етуде.

Оқу орталығына арнайы барған бізді Салтанат Әділжанқызы қарсы алып, өзінің кәсібімен, оқу жүйесімен таныстырды.

– 2017 жылы мен Есік қаласындағы Абылай хан атындағы орта мектепке бастауыш сынып мұғалімі болып жұмысқа орналастым. Білім саласында қызмет ете жүріп, барлық баланың қабылдауы, сабақты түсінуі әртүрлі екендігіне көз жеткіздім. Шыны керек, кейбір мектептерімізде бір сыныпта 30-ға жуық оқушы отырады. Оның ішінде үлгерімі жақсы, орташа мен нашар бала бар. Бөлінген 40 минуттың ішінде олардың әрқайсына жеке түсіндіру мүмкін емес. Сондықтан, жалпы өтілген сабақты барлығы бірдей ұға бермейді. Осыны ескеріп, 2017 жылы қараша айында әріптестерім Арай Назарханова, Альфия Досмағанбетовамен бірігіп «Еркемай» оқу орта-лығының негізін қаладық – дейді Салтанат Әділжанқызы. Айтуынша, басында үлгерімі төмен оқушылармен жұмыс жүргізе бастаған. Кейіннен, өздері ұстаздарға арналған «Мега жады», «Жылдам оқу» сынды курстарға қатысып, балалардың оқуға деген зейінін қалай арттыру керектігін үйрететін қосымша оқуларға ақылы түрде қатысқан. Сол жылы-ақ, ұстаздар ізденісі өз жемісін бере бастаған. Оқушылар аз уақыттың ішінде үлгерімі жақсарып, жоғары нәтиже көрсете бастаған.

– 2018 жылдан бастап оқу орталығының жұмысына білек сыбана кірісіп, ұлғайтуды қолға алдық. Бастауыштан бөлек, ағылшын тілі, орыс тілі, менталды арифметика, жылдам оқу сынды қосымша үйірмелер аштық. Осыдан екі ай бұрын музыка, фортепиано сабақтарын аштық,– деген Салтанат алдағы уақытта ораторлық курстарды іске қосуды жоспарлап отыр.

Оқу орталығының ерекшеліктерінің бірі – балаға бағдарламаны оңай әрі жылдам әдіспен жеткізеді. Бұл жерде ұстаздар орыс ғалымы, мектептен қуылған оқушыларға білім беріп, жоғарғы оқу орнына түсірген Шаталовтың методикасын қолданады. Сыныптағы оқушылардың саны 4-5-тен аспайды. Балалардың аздығы әр оқушымен жеке жұмыс жасауға септігін тигізеді. Алдымен білім алушының сабақты қалай қабылдайтындығына, оның психологиясына баса мән беріледі. Салтанат Бердібаеваның айтуынша, кей бала сабақты естігеннен тез ұғады. Кейбірі, көрген нәрсесін есте сақтайды. Ал кейбір оқушылар өзінің қолымен ұстап, жасаған дүниесін тез түсінеді. Осының барлығы зерттеліп, зерделенгеннен кейін ғана, оларға тапсырма беріліп, тақырыптар түсіндіріледі.

Осы тұста, оқу орталығына келген баланың білім сапасы жақсарады дегенге кім кепіл деген орынды сұрақ туындауы мүмкін. Бұл сауалға оқу орталығының директоры жауап берді:

– Әрине, әрбір ата-ана баласын ақылы оқуға берген соң, одан нәтиже күтеді. Осы сенімді ақтау мақсатында біз ата-аналарға ұсыныс жасаймыз. Егер балаларының білімі алғашқы 3 айдың ішінде екі есеге артпаса, төленген 3 айдың ақшасын толығымен қайтарып береміз. Себебі, бізге ақша емес, оқушылардың білім сапасы маңызды. Сондықтан, аптасына 3 рет келген бала, бір айда 12 сабақ өтеді. Ал оның оң нәтиже көрсетуіне 2 айдың өзі жеткілікті. Аллаға шүкір, қазіргі уақытта ешкімнен шағым түскен жоқ, ақшаларын да қайтарып беруге еш негіз болмады, – дейді Салтанат Бердібаева.

Бүгінде 100-ге жуық оқушыны білім нәрімен сусындатып отырған «Еркемай» оқу орталығында 8 мұғалім еңбек етеді. Олардың ішінде студенттер де бар. Алайда барлығына қойылар талап өте жоғары. Жұмысқа қабылданатын ұстаздардың барлығы тәжірибеден өтіп, өзін көрсетуі тиіс. Осылайша, аудан оқушыларын сапалы білім нәрімен сусындатып жүрген оқу орталығы мемлекеттің назарынан тыс қалмады. Жақында Салтанат Бердібаева «Атамекен» кәсіпкерлік палатасында «Бастау бизнес» жобасы аясында 1 ай бойы білімін жетілдіріп, кәсіпкерліктің қыр-сырын меңгерген. «Жас кәсіпкер» жобасы аясында өзінің бизнес жоспарын ұсынып, 505 мың теңге көлемінде қайтарымсыз грантқа ие болған. Аталған қаржы оқу орталығының материалдық базасын нығайтуға жұмсалатын болады.

– «Білекке сенген заманда ешкімге есе бермедік, білімге сенген заманда қапы қалып жүрмелік» – деген Абылай ханның сөзі қазіргі таңда өзекті болып отыр. Жаугершілік заманда ата-бабамыз жерімізді ақ білектің күшімен, ақ найзаның ұшымен қорғап қалды. Ал бүгінгі заманның соғысы бөлек. Өзгелермен бәсекеге түсу үшін ең алдымен білім керек. Білікті адамның іргетасы бастауышта қаланады. Мектеп табалдырығын аттаған оқушы сабақты жақсы түсініп, жан-жақты дамыса болашағына алаңдаудың еш қажеті жоқ. Біз осы бағытта жұмыс жасап жатымыз – дейді Салтанат Әділжанқызы.

С.НҰРАДИН.

Қысқа мерзімде қазақ елі әлем мойындаған мемлекеттер қатарына енді. Еліміздің саяси өмірі жаңартылып, түбегейлі өзгерістер жасалды. Мемлекеттіліктің барлық институттары құрылып, экономикамыз нарықтық жолға түсті. Халықтың әл-ауқаты жаңа деңгейге көтерілді, әлеуметтік салада тың асуларды бағындырдық. Мемлекеттік шекарамыз айқындалып, елдің тұтастығы, жердің бүтіндігі қамтамасыз етілді. Елбасының көрегендігі мен ерік-жігерінің нәтижесінде Қазақстан әлемде тұңғыш рет ядролық қарудан бас тартты. Семей сынақ полигонын жабуы бүкіл дүниежүзінің назарын өзіне еріксіз аударды. Осы бір батыл қадамның нәтижесінде мемлекет тәуелсіздігінің қауіпсіздігіне әлемнің іргелі мемлекеттері кепілдік берді.  Бастысы, ата-бабаларымыздың ғасырлар бойғы ұлы арманы мен мақсаты орындалды. Сәл тарихқа сапарлайық...

Тәуелсіздіктің көк байрағын өз қолымен көтеріп, аз уақытта әлемге танытқан Көшбасшымыздың бұл ерлігіне өзге түгіл өзіміз де таңдана қараймыз. Тарихтың қилы бір кезеңдерінде елге Нұрсұлтан Назарбаевтай Көшбасшының табылуын  халқымыздың бағы деп те түсінеміз. 1991 жылы 1 желтоқсанда қазақстандықтар өздерінің Тұңғыш Президентін сайлап, сенім артты,  ел тәуелсіздігін аманат  етті. Жауапкершілік жүгін арқалатты, Халық өздері таңдаған Елбасының не істеу керектігін білетіндігіне, елді адастырмайтынына, тура жолға бастайтынына сенді. Зор сенімге елдің ұлы да селкеу түсірмеді.

Бәрі де есімізде. Сол жылдың, яғни 1991-дің  10 желтоқсанында Нұрсұлтан Әбішұлының Президент қызметіне кірісу және ант беру салтанаты ежелгі халықтық дәстүр мен қазіргі өркениет үлгілерінің айшықталған жағдайында өтті. Президент ата-дәстүр бойынша ақ киіздің үстіне көтеріліп, қолын Конституцияға қойып, ант берді. Ел ағалары Дмитрий Снегин, Құдыс Қожамияров, Эдуард Айрих, Ыбырайымжан Қожахметов Сарай төрінде бүкіл халық қолдаған Елбасыға ерекше сән-салтанатта шапан жапты. Президенттік айырым белгілерін тапсырды. Жасы тоқсаннан асқан халық ақыны Шәкір Әбенов бата берсе, көрнекті жазушы, публицист, Жоғарғы Кеңес депутаты Әбіш Кекілбаев ақжарма тілегін арнады.

Ант беру рәсімінен кейін тебірене сөйлеген Елбасы Нұрсұлтан Назарбаев:

– Бүгінгі күн – қазақ елінің шежіресіне мәңгі енетін күн. Тарихтың талай бұралаң белесінен өтіп, бұл күнге де жетіп отырмыз. Бәрін де көрген халықпыз, бәріне көнген халықпыз. Ежелден еркіндікті аңсап, азаттықты көксеп келе жатқан еліміздің басына талай рет бақ та орнап, бағы да тайып, сағы да сынған, қилы кезең, зар заманға да талай ұшыраған. Айқайлап жүріп, ашаршылыққа ұрынып, ұрандап жүріп ұлт мүддесін ұмытқанымыз да ақиқат. Шүкір, кештеу болса да ес жиып, еңсе көтеріп, егеменді елдің туын да тіге бастадық. Қазақ Республикасының Президентін бүкіл халық сайлағаны – осы жолдағы ең биік белестің бірі. Елдің қамын ойлайды, намысын жібермейді деп бір ауыздан сенім артқандарыңыз үшін шын жүректен алғысымды айтамын. Елім үшін, халқым үшін, Қазақстаным үшін тарихтың қай сынағына да тәуекел деп бас тігуге дайынмын. Бұл жолда ең алдымен дана халқыма, дархан еліме, ата-бабамның әруағына сүйенемін, – деп тебірене ағынан жарылды.

Тарихтың сол бір бұлтарысты кезеңінде қазақстандықтар өз Көшбасшысын дұрыс таңдай білді. Өздері сенім артқан дана ұлдары дара жолға бастады. Халқы қостады. Бүгінде сол тарихи шешімге шүкіршілік айтады. Себебі, өркениетке сап түзеді қазақ дейтін байтағы.

Президентке бүкіл халық атынан өкілдік берілгеннен кейін 16 желтоқсанда «Қазақстан Республикасының мемлекеттік тәуелсіздігі туралы Заң» қабылданды. Екі күнге талқылауға созылған бұл Заңның төңірегінде де  дау-дамай болмай қалған жоқ. Қазақ елінің өз бетімен тәуелсіз мемлекет бола алатындығына күмән келтірушілер де табылды. Көреалмастан сындырғысы келді сағыңды. Іріткішілдер бостан боп жүрген халық шаңырақ көтере алмайды деп те қағынды. Қайтерсіз...

Сол сәттен еліміздің тар жол, тайғақ кешулі қасиетті сапары, азаттықтың арпалысқа толы ақ жолы басталып еді. Елбасы өзінің туған халқына деген сеніммен тәуекел деп тәуелсіз елдің іргетасын қалауды, оны нығайтуды қолға алды.

Елбасы өзіне сенім артқан халқына қиын жылдардың өзінде орындалуы мүмкін болмайтын мәселеге байланысты ешқандай уәде бермеді. Халқының алдындағы беделі сонысымен де арта түсті. Егер уәде берсе, орындады. Бойындағы туа біткен қасиеті және өмірлік тәжірибемен бекіген төзімшілдігі, сабырлығы, ұстамдылығы бар Тұңғыш Президентіміз бүкіл қазақстандықтарды өзінің айналасына топтастыра алатын саясаткер және дара тұлға екендігін танытты. Арада бір ақиқатты айтайық, Н.Назарбаевтың Ұлт Көшбасшысы екендігін  Парламент қабылдаған Конституциялық Заңнан бұрын-ақ халықтың өзі мойындап та қойған болатын.

Елбасының «Қазақстан жолы» кітабының ағылшынша нұсқасының алғы сөзінде Англияның 1979-1990 жылдары үкіметін басқарған және  кезінде «Темір Леди» атанған Маргарет Тэтчер де тәуелсіздіктің алғашқы жылдарындағы Қазақстанның Көшбасшылық рөл атқарғандығын мойындады. Соған оң баға беріп:

– Мемлекеттердің іргесін салған негізін қалаушылар әрдайым дерлік қалыпқа сыймайтын тұлғалар болып келеді. Ал Нұрсұлтан Назарбаевты толық мәнінде осы санатқа жатқызуға болады. Мұндай көшбасшылар өздеріне қатысты түрлі үйлесімдегі қауырт сүйсініс секілді даңғаза сынды да туындатуы мүмкін. Мәселенің мұндай мәнісі олардың мемлекеттің аса маңызды сәттерінде оның басшылығында тұруымен, осылайша оларға дейін болғандарға немесе олардан кейін келетіндерге қарағанда әлдеқайда танымал тұлға болуымен байланысты.

Президент Назарбаев Қазақстанды бүгінгі шыққан биігіне жеткізу үшін батылдық пен сақтықтың үйлесімін пайдаланды. Коммунизм бұғауларын быт-шыт қылған ел өзінің ерекше қазақы қасиеттерін сақтап қалды. Президент Назарбаев экономика мен қоғамның ашықтығына, яғни оның кейбір көршілері қасарыса бас тартқан нақ сондай нәрселерге ұмтылды, ол сөйтіп Қазақстан үшін халықаралық ұйымдарда айтарлықтай беделге  қол жеткізді, – деп жазған еді.

Нұрсұлтан Назарбаев тәуелсіздіктің бетбұрысты кезеңдерінде Мемлекет басшысы ретінде әсіресе экономикалық және саяси дамудың үлгілерін талдау мәселесіндегі біліксіздікке қатаң қарсы тұра білді. Ешкімнің ойына келмеген және де бәріне бірдей жаға бермейтін, бірақ өміршең маңызы бар шешімдерді батыл қабылдап жатты. Елбасының өз кезінде: – Кейде адамдарды еркінен тыс қазір барғысы келмейтін, бірақ объективті түрде баруға тиіс жаққа жетелеуге тура келді, – деп айтқанын осы күндері еске ала отырып, яғни, билік үшін күрестегі батылдық пен билік басындағы батылдықтың екеуі екі басқа екендігін өз ісімен дәлелдей білгендігі еріксіз сүйсіндіреді.

Елбасы тәуелсіздіктің алғашқы кезеңінен бастап ұлтаралық келісімді, ел бірлігін мемлекет саясатының басты қағидаты ретінде белгіледі. Ұзақ жылдар бойы өз жерінде қағажу көрген қазақ ұлтының  дамуы мен орыс және басқа да этностық топтардың құқықтарын сақтау саясаты ұлтаралық қарым-қатынастың тепе-теңдігін орнықтырды.

Қазақстан Республикасының Тұңғыш Президенті тәуелсіз ел мүддесі үшін және оның өркенді жолмен дамуына қажетті деген небір өте ауыр реформаларды тиімді жүргізе білді. Тіпті, қажет болған жағдайда төтенше шаралар қолдануға да барды. Елбасының мұндай ұстанымы  мен әрекетіне қарсы шыққандар да табылды. Әркім өзінше тон пішті. Салғырт, атүсті ойлап, саясатты сынады. Бірақ, Елбасы өзіне сенім артқан халқына сенді. Істеп жатқан ісінің бас сарапшысы деп тек халқын ғана таныды.

Қазір тәуелсіз қазақ елінің тарихы жасалды. Бірақ оны қазақ елінің көреген Көшбасшысы бола алған Нұрсұлтан Назарбаевтың 1991 жылы бүкіл халықтық сайлаудан кейін қолға алған басшылық қызметінсіз көзге елестету мүмкін емес. Өйткені, бұл тарихта тәуелсіз еліміздің іргетасын қалап, керегесін керіп, оның әрбір уығын шаншып, шаңырағын көтерген, бар-жоғын түгендеп, оны әлем елдері мойындаған мемлекетке айналдырған, онымен санасуға мәжбүр еткен Қазақстан Республикасының Президенті, оның Көшбасшысы Нұрсұлтан Назарбаевтың  қолтаңбасы, қабылдаған тарихи шешімдері, ұстанған саясаты, өзіндік дара жолы жатыр.

Батыстық саясаткерлер мен қайраткерлер де Қазақстанның бүгінгі табыс-тарын оның Тұңғыш Президенті Нұрсұлтан Назарбаевпен байланыстырады. Солардың бірі ағылшын публицисі, саяси еңбектерімен белгілі Дж.Айткен мырза «Назарбаев және Қазақстанның қалыптасып дамуы» деген еңбегінде Қазақстанды әлемдік қауымдастықпен таныстырудың, оның жетістіктерін жеткізудің кілті Назарбаев тұлғасында екендігін мойындайды және аталған кітабын осы бағытта жазады.

Елбасы биыл тағы да өзінің көрегендігін танытты. Конституция шеңберінде өз өкілеттігін тоқтатып, келесі буынға ел алдында табыс етті. Телеарналар арқылы ресми өкілеттігін тоқтату туралы шешімін айтқанда тебіренбеген жан қалмады. Сол сәтте ҚР Тұңғыш Президенті Елбасының еңбегін ел бағалады. Әлем елдерінде орын алып жатқан таққа талас бізді де сілкінтер ме деген күдік қарашаны алаңдатты. Әйткенмен, Елбасының көрегендігі нәтижесінде, саяси науқан заң шеңберінде салмақты өтті.

Түйін. Түмен ойдың да түйіні бар. Қазақ елін Ұлы дала төсінде түлеткен, көгорай белдей көктетіп, ен даласын гүл еткен Елбасы жайлы, оның тәуелсіздік жолындағы толағай еңбектері жайлы том-том кітап жазуға, түнді түнге жалғап айтуға болады. Дегенмен, аз сөз алтын. Әрі елін сүйген Елбасының ерен еңбегін жылдар жылжыған сайын ақиқат есебінде тарих алдымызға тартып отыр. Ұғынған жанға Тәуелсіздіктен ұлы ұғым бар ма? Ал сол ұлы ұғымды ту етіп, ұлтты ұлы мұратқа ұйыстырған Ұлдың еңбегін бағалай білу – әрбіріміздің міндетіміз.

Қайнар ЖҰМАҒОЖА.