Көк аспанның төрінде,

Алаулаған күн қандай?!

Бұлбұлдары сайраған,

Бұйраланған бақ қандай?!

Теректері жайнаған,

Жасыл бантик таққандай.

Самал желмен таранған,

Қызғалдақты қыр

 қандай?!

Жер бетіне сан алуан,

Жалау өсіп тұғандай.

Иә, көрген жанның көзі тоймас табиғатымызды, сылдырлап аққан мөлдір бұлақ пен өзен-көлдерімізді, түгін тартсаң майы шығатын көк майса жайлауымызды, шыңдары көк аспанмен таласқан, ақ бұлттардан ары асқан тауларымызды бір өлеңнің көлеміне сыйғызу мүмкін емес шығар, сірә. Десек те, осыншама байлық пен сұлулықты көзбен көріп, сезінуге не жетсін?! Ол үшін Шелек өңірінде орналасқан Шелек орман шаруашылығына барсаңыз жеткілікті. Өткен аптада орман шаруашылығының басшысы Бекболат Алтаевпен кездесіп, мекеме жұмысының мән-жайымен, орманды қорғау мен күтіп-баптау шараларымен жақынырақ таныстық.

Тұқымбақтағы қызу жұмыс

Алдымен орман шаруашылығының тарихына тоқталды Бекболат Мұхаметжанұлы. Айтуынша, Шелек орман шаруашылығы болып 1948 жылы құрылған. Алғашқы директоры О.Саурықов 1954 жылға дейін басқарған. Түрлі жылдары мекеменің аты бірнеше рет ауысып, бірақ, негізгі бағыты өзгермеген: табиғатты түрлі апаттардан қорғау, күтіп-баптау.

– Қазіргі таңда орман шаруа-шылығының көлемі 104 417 гектарды құрайды. Ұжымда 80 адам еңбек етеді. Шелек, Табанқарағай, Жиделі және Іле болып 4 орманшылыққа бөлінген. Шека-рамыз Талғар, Кеген, Ұйғыр аудандарымен шектеседі. Негізгі міндетіміз – орманды қорғау және қорын молықтыру. Бұл бағытта орман тұқымбағына (питомник) көшеттер отырғызып, жылына орманды алқаптың көлемін 12 гектарға ұлғайтудамыз. Мемлекет басшысының тапсырмасына сәйкес биылдан бастап жыл сайын 54 гектарға көшеттер отырғызамыз – дейді мекеме директоры.

Қазіргі таңда тұқымбақтың жұмысы қызу. Себебі, осы кезеңде таудан тұқым жинау науқаны басталады. Әр ағаш тұқымының пісіп-жетілу мерзімі әртүрлі болғандықтан бұл процесс қысқа дейін жалғасады. Жиналған тұқым тазаланып, кептіріледі. Сәуір-мамыр айларында тұқымдарды тауға апарып көмеді. 45 күн бейімделген тұқым тұқымбаққа отырғызылады. Бірнеше жыл күтіп-бапталып, орман аумағын ұлғайтуға жөнелтіледі. Тұқым өсірудің қыр-сырымен бөліскен Бекболат Алтаев тұқымбаққа арнайы апарып, жұмыс барысын көрсетті. Шелек ауылынан 4 шақырым қашықтықта ор-наласқан тұқымбақ түрлі өсімдікпен жайқалып тұр. Тұқымбақ меңгерушісі Ақтоты Абдуманапованың айтуынша, мұнда қарағаш, өрік, алма, талшын (каштан), боз арша (туя), сәнағаш (катальпа), қарағай, Қырым қарағайы мен қайың ағаштарының және гүлдің бірнеше түрі өсіріледі. Бірнеше жыл өсіп-жетілген көшеттер орманшылыққа жөнелтіліп, орнына жаңа тұқымдар себіледі.

Жануарларға жайлы мекен

Шелек орман шаруашылығының аумағы ауқымды болғандықтан мұндағы аң-құстардың түрі де сан алуан. Бұл жерді марал, таутеке, жайран, сілеусін, қасқыр, қабан, борсық, суыр секілді басқа да аң-құстар мекен етеді. «Қызыл кітапқа» енген аққу, ителгі, бірқазан, лашын құстары ерекше қорғалады. Орманшылық Көлсай көлдері мен Іле-Алатау мемлекеттік ұлттық табиғи паркімен шектескендіктен «Қызыл кітапқа» енген қар барысы  да орманшылықты мекендейді және осы алқаппен жүріп өтеді. Сондықтан, оларды браконьерлерден қорғау – әрбір орманшының басты міндеті. Сонымен қатар, белгілі уақыттарда марал мен тауешкілер көрші аудандағы орман шаруашылығанан, Іленің арғы бетіндегі Алтын-Емел қорығынан, Қырғыз республикасынан Шелек орманшылығының аумағына өтеді. Осындай миграция кезінде аңдардың қауіпсіздігі толықтай қамтамасыз етіледі.

Бекболат Мұхаметжанұлының сөзіне сүйенсек, браконьерлермен күрес қарқынды жүргізілуде. Соның нәтижесінде соңғы бірнеше жылда аталған факті тіркелмеген. Орманшылар арнайы мекеменің қызметкерлерімен бірлесе жануарларды қырағылықпен күзетуде. Оның үстіне, аң аулау комитетінің бұйрығымен 5 жылға аң аулауға мораторий жарияланған, маусым кезінде де рұқсат жоқ. Осыған байланысты, жануарлар саны айтарлықтай артып келеді. Десек те, орман шаруашылығының сыртында жеке меншік аңшылық шаруашылықтары жұмыс істейді. Ауданымызда осы бағытта қызмет ететін 3 жеке шаруашылықта аң аулауға рұқсат етілген. Олар шаруашылық ішінде био-техникалық шараларын, санақ жұмыстарын жүргізіп, мониторинг жасап отырады.

Тілсіз жаумен күрес жүйелі жүргізілуде

Табиғаттың басты жауы – өрт. Айтып келмейтін апаттың алдын алу мақсатында орман шаруашылығында кешенді жұмыстар атқарылуда. Жыл сайын шаруашылық жерін жалға алатын кәсіпкерлер мен шаруа қожалықтары арасында өртке қарсы техникалардың жағдайы тексеріліп, қауіпсіздік шаралары пысықталады. Жылына екі рет өртке қарсы оқу-жаттығу ұйымдастырылады. Екі  өрт сөндіру станциясында 14 адам жұмыс істейді. Екі су бүркетін трактор мен екі өрт сөндіру көлігі бар. Осылай деген Бекболат Алтаев өрт сөндіру станцияларының бірін көрсетті. Төтенше жағдайға сақадай сай техника, заман талабына сай құрал-жабдықтар, тіпті, жанар жағармайға дейін артығымен сақталуда. Директордың сөзінше, өрт сөндіруге қолданылатын құралдар жыл сайын жаңартылып, материалдық-техникалық база толықтырылады.

Апат айтып келмейді. Материалдық база қанша мықты болса да тілсіз жаудың қайдан және қашан шығатынын ешкім болжай алмайды. Сондықтан, өртке қауіпті маусым кезінде қызметкерлер күндіз-түні оқыс жағдайға дайын жүреді. Ағымдағы жылдың сәуір айында өрт оқиғасы тіркелді. Қапшағай су қоймасына қарасты кішкентай аралдар жанып, желдің лебімен қызыл жалын Шелек орман шаруашылығына өтіп кеткен. Тұтанған аумақ батпақты, қалың қамысты болғандықтан, өрт сөндірушілер от ошағына жақындай алмай, отты бақылауға алу қиынға соққан. Орман қызметкерлері, өрт сөндіру станциясы, төтенше жағдайлар бөлімі, «Қазавиа» қызметкерлері мен округтерден жиналған еріктілер бригадасы бірлесіп, тілсіз жауды бір тәулікте ауыздықтаған. Оқыс жағдайға 20 бірлік техника мен 60-тан астам адам жұмылдырылған. Өкінішке қарай, қызыл жалын 800 гектарға жуық жерді шарпыған. Негізінен, қамысты алқаптар. Қазіргі таңда істі Қапшағай қалалық полиция басқармасы қолға алып, өрттің шығу себептерін анықтауда.

Шелек орман шаруашылығына жасаған сапарымыз барысында табиғатты қорғау жұмыстарының қыр-сырымен жақынырақ танысып, өңірдің бар сұлулығын бойына жиып, көпшіліктің көңілін жаулаған мекенді көрдік. Жазда төрт түліктің құтты мекені болған, туристердің сүйікті орнына айналған Асы жайлауы да Шелек орман шаруашылығы қызметкерлерінің қорғауында. Ауданымыздың осындай баға жетпес байлықтарын күзеткен ұжымға сәттілік тілеп, кері қайттық.

С.НҰРАДИН.

ҚР Ұлттық ұланның Қаракемер ауылында орналасқан 6654 әскери бөлімінде 2 қараша – бөлімнің құрылған күніне орай салтанатты іс-шара өтті.

Салтанатты жиынға бөлім әскерилерінен бөлек, аудан басшылығы, Еңбекшіқазақ, Талғар аудандарының ішкі істер бөлімдері мен аудандық төтенше жағдайлар бөлімінен, Қаракемер кәсіптік колледжінен қонақтар, сондай-ақ аталған әскери бөлімде кезінде қызмет еткен ардагер әскерилер қатысты. 6654 әскери бөлімінің командирі, подполковник Жандос Қасымов бөлімнің тарихына тоқталып, әскерилердің ерлігі жайында баяндады. Әскери қызметте ерік-жігерімен, ерекше еңбегімен көзге түскен әскерилерді «Ұлттық ұланның үздігі» төсбелгісімен, мерекелік төсбелгілермен және грамоталармен марапаттады. Сондай-ақ Еңбекшіқазақ, Талғар аудандарында қоғамдық тәртіп пен қауіпсіздікті сақтауға атсалысып жүрген 6654 әскери бөлімінің сарбаздары мен командирлері АІІБ-нің арнайы марапаттарына ие болды. Жиын соңында «Генерал» музыкалық аспаптар тобы патриоттық әндермен концерттік бағдарлама ұсынып, әскерилердің рухын көтерді.

Құралай МҰРАТҚЫЗЫ

Ұлттық ұланға қарасты еліміздің түпкір-түпкіріндегі барлық әскери бөлімдерді білікті мамандармен және үйретілген иісшіл иттермен қамтып отырған – Қаракемер ауылында орналасқан 6654 әскери бөлімі екенін біреу білсе, біреу білмес. Іргетасы сонау 1962 жылы қаланған бұл әскери бөлімге Жауынгерлік Ту 2 қарашада тапсырылған екен. Сондықтан бөлімнің ресми «туған күні» саналатын атаулы күнге орай 6654 әскери бөліміне арнайы барып, ол жақтың тыныс-тіршілігімен таныстық.

Алғашқыда оқу дивизионы болып құрылған бөлімге еліміз Тәуелсіздік алғаннан кейін 1993 жылы полк мәртебесі берілген екен. Ал 2017 жылы Ұлттық ұланның оқу бригадасы дәрежесіне көтерілген әскери бөлім осы уақытқа дейін бактериологиялық, радиациялық, химиялық арнайы бөлімдердің командирлерін және түзеу мекемелеріне қажетті мамандарды даярлап келген. Бүгінде мұнда жиырма шақты әскери мамандық түрлері бойынша білікті мамандар дайындалады. Олар: түрлі бөлімше командирлерінен бастап, байланыс мамандары, кинологтар, қару-жарақ жөндеушілері, саперлер, бронды тасымал көлігінің механик-жүргізушілері, қала тыныштығын күзететін, ішкі істер қызметіне көмекші патрульдеу бөлімшелерінің сержанттары, аспаздар сынды тағы басқа да кіші әскери қызметтер. «Аталған мамандықтар бойынша жылына төрт мәрте курсант қабылдаймыз. Еліміздің әр түпкірінен келген Ұлттық ұлан сарбаздары мен келісім-шарт бойынша қызмет етіп жүрген әскерилер мұнда екі ай білім алып, таңдаған мамандықтарының қыр-сырын үйренеді. Ал оқу аяқталған соң белгілі бір кіші әскери қызметті меңгергені туралы куәліктерін қолдарына алып, бірден қызметтеріне кіріседі. Яғни Ұлттық ұланның құрамындағы әскери бөлімдердің біріне дайын маман болып жұмысқа орналасады. Бүгінге дейін біздің әскери бөлімде бірнеше мыңдаған әскери білім алып, Отан алдындағы борышын абыроймен атқарып, әскери салада қызмет етіп жүр», – «ҚР Ұлттық ұланның 6654 әскери бөлімі» РММ командирі, подполковник Жандос Қасымов. 

59 жылдан бері әскери маман даярлап келе жатқан бөлімнің материалдық-техникалық базасы заманға сай толық жабдықталған. 6654 әскери бөлімінің құрамына кіретін Заречный кентінде орналасқан 5574 оқу-әскери бөлімі – арнайы мақсаттағы дайындық орталығы болып есептеледі. Орталық 2018 жылдан бастап халықаралық деңгейге ауысқан. Мемлекет тарапынан қомақты қаржы бөлініп, жаңа оқу ғимараттары, 500 адамға арналған әскери казарма, медицина орталықтары мен спорт кешені, цифрландырылған жаттығу алаңдары ашылған. Аталған оқу-әскери бөлімі – Ұлттық ұланның ең үлкен оқу орталығы. Мұндағы мультимедиялық жаттығу орнында қауіпсіздік мәселесі алдыңғы орында. Айталық, брондалған техниканың қыр-сырын сарбазға полигонда үйрету барысында түрлі оқыс оқиғалар орын алуы мүмкін. Ал мультимедиялық брондалған техника бір орында тұрса да, сарбаз оның тілін түсініп, толықтай сезіне алады. Яғни полигондағы шынайы техника болмағанымен, оқу-жаттығу жұмыстарын жүргізуге таптырмас дүние. Олай деуге себеп – жалғыз қауіпсіздік емес, онымен қоса аталған техникалармен жаттығу жанармай мен оқ-дәріні үнемдеуге де көп көмек.

Кіші әскери мамандармен қатар мұнда иісшіл иттердің де үйретілетінін сөз басында айттық. 6654 әскери бөліміндегі кинология орталығында бүкіл Ұлттық ұланға қажетті қызметтік иттер есірткі іздестіру, жарылғыш заттарды іздестіру, қарауылдау, күзету сынды машықтарды үйреніп, жыл сайын елдің түпкір-түпкіріне әскери қызметке аттанады.

Әскери қызмет демекші, соңғы жылдары Отан алдындағы борышын өтеуден қашатындардың қатары көбейгенін баршамыз білеміз. Осы орайда бөлім командирінің тәрбие және әлеуметтік-құқықтық жұмыстар жөніндегі орынбасары, подполковник Жандос Көлбаевты сөзге тарттық. «Бұл мәселенің себебі көп. Мысалы, біреудің денсаулығы жарамайды, енді біреу отбасылық жағдайына байланысты сарбаз қатарына қосыла алмайды. Сондай-ақ саналы түрде әскерден қашып, сан сылтау табатындар да бар. Меніңше, әр азамат, әр еркек кіндікті Отанын қорғауға әркез дайын болуы керек. Осы орайда бозбалалардың, жас ұрпақтың әскерге деген қызығушылығын арттыру мақсатында аудан мектептерімен үнемі бірлескен жұмыстар жүргізіп, әскери бөлімге экскурсия жасап, түрлі жарыстар ұйымдастырып отырамыз. Балаларды әскери өмірмен таныстырамыз. Мысалы, менің қазір әскери қызметте жүруіме бала күнімде ағамның әскерден келгендегі бет-бейнесі мен мінез-құлқы әсер етті. Ауыл мектебінің артында топ болып үйілген балаларға ағам белтемірге қалай тартылу керек екенін көрсеткенде бәріміздің аузымыз ашылып қалды. Ағам шыңдалған, шымыр денелі, қозғалысы ширақ, шаршауды білмейтіндей көрінді. Мен сонда «Әскер деген осындай күшті болады екен ғой. Мен де сарбаз боламын» деп шештім. Айтпағым, мектеп жасындағы бала еліктегіш келеді. Оған не нәрсе сәл әсер етсе, жас шыбықтай соған қарай иіле кетеді. Сондықтан мектеп жасындағы балалармен жұмыс жүргізудің орны бөлек», – дейді Жандос Жамалұлы.

Әрине, біз де бұл оймен толықтай келісеміз. Сондықтан әскери өмірді өскелең ұрпаққа таныстырып, патриоттық тәрбие беруге өз тарапымыздан атсалысуға, яғни осынау тақырыптарды көтеріп, жиі материал дайындауға уәде береміз.

Құралай МҰРАТҚЫЗЫ

Мемлекет қазынасынан жыл сайын қомақты қаржы бөлініп, қоғамның әлсіз топтарына әлеуметтік көмек көрсетіледі. Осы орайда «Әлсіз топқа кімдер жатады?», «Әлеуметтік көмек деген не?», «Оның қандай түрлері бар?» деген сияқты сұрақтар тізбегі тізіле жөнеледі. Ал бұл сұрақтардың жауабын білу үшін Еңбекшіқазақ аудандық жұмыспен қамту және әлеуметтік бағдарламалар бөлімінің басшысы Қалдыкүл Айсинамен сұхбат жүргіздік.

– Қалдыкүл Оспанәліқызы, кәсіби мерекелеріңіз – әлеуметтік қорғау жүйесі қызметкерлері күні құтты болсын! Қызметтеріңізге табыс тілей отырып, жалпы, әлеуметтік қорғау жүйесінің жұмысымен таныссақ деп едім.

– Құттықтауыңызға көп рақмет! Еліміздің Ата заңында «Қазақстан Республикасы өзін демократиялық, зайырлы, құқықтық және әлеуметтік мемлекет ретінде орнықтырады, оның ең қымбат қазынасы – адам және оның өмірі, құқықтары мен бостандықтары» делінген. Мұнда айтылған әр сөз біздің қызметімізге тікелей қатысты. Яғни елдің ең негізгі құжаты – Конституцияда мемлекет азаматтардың әлеуметтік құқықтарын қорғауға міндетті екені айтылған. Ол – азаматтың өмір сүруге, әлеуметтік қамсыздандырылуға, жұмыссыздықтан қорғалуға, медициналық және басқа да әлеуметтік көмектерге деген құқығы. Әлеуметтік қорғау жүйесі осы аталғандармен айналысады. Яғни әлеуметтік қорғау дегеніміз – халықты жасына қарай, сондай-ақ денсаулығынан, асыраушысынан немесе еңбек ету қабілетінен, жұмысынан айырылуына және экономикалық белсенділік көрсете алмайтын тағы басқа да заңды негіздерге байланысты өмірлік қажетті игіліктерге мүмкіндігі болмағандықтан оларға белгілі бір жақсы тұрмыс деңгейін қамтамасыз ету үшін жасалатын жүйелі жұмыс.

– Әлеуметтік қорғауға алынған әлеуметтік әлсіз топқа кімнің жататыны белгілі болды. Ал оларға бүгінде қандай көмек көрсетіліп жатыр?

– Аудандық жұмыспен қамту және әлеуметтік бағдарламалар бөлімі арқы-лы 2021 жылдың 01 қазанындағы көрсеткіш бойынша отбасының жан басына шаққандағы орташа айлық табыстары кедейлік шегінен төмен тұрған 3605 отбасына 997,0 млн. теңге атаулы әлеуметтік көмек төленді. Бұл отбасылардың жалпы құрамында 18 599 адам бар. 3605 отбасының 1295-і – көпбалалы отбасылар.

Атаулы әлеуметтік көмек алушы отбасыларының бір жастан алты жасқа дейінгі 4077 баласына жыл басынан бері барлығы 36 116 дана 177,2 млн теңгенің кепілдендірілген әлеуметтік пакеттер жиынтығы мен тұрмыстық химиялық тауарлар жиынтығы берілді.

Атаулы әлеуметтік көмек алушы отбасыларының білім беру ұйымдарында оқитын 6 жастан 18 жасқа дейінгі балаларына арналған кепілдік берілген бір реттік топтамаға құрамында барлығы 3832 бала бар 1859 отбасына 105,6 млн. теңге, аз қамтылған отбасыларының мектепке дейінгі ұйымдарда тәрбиеленіп жатқан 834 балаға жалпы сомасы 71,6 млн теңге төленді.

Ауылдық жерде жұмыс істейтін білім беру саласының 133 қызметкеріне, денсаулық сақтау саласының қызметкерлері мен әлеуметтік қамсыздандыру мамандарына отын сатып алуға 1,8 млн. теңге біржолғы әлеуметтік көмек төленді.

Естелік күндер қарсаңында Ауған соғысының 189 ардагері мен қаза болғандардың 2 отбасына, Чернобыль апатынан зардап шеккен 70 жанға, Тәжікстан-Ауғанстан учаскесінде Тәуелсіз Мемлекеттер Достастығының шекарасын қорғауды күшейту жөніндегі мемлекетаралық шарттар мен келісімдерге сәйкес міндеттерін орындаған 45 әскери қызметшіге, Ирактағы және Таулы Карабахтағы халықаралық бітімгершілік операцияға қатысқан 10 әскери қызметшінің әрқайсына 50 мың теңгеден біржолғы әлеуметтік көмек төленді. 9 мамыр Жеңістің 76 жылдығына орай 5 ҰОС-ң қатысушысы мен мүгедектеріне әрқайсына 1 млн. теңгеден 5 млн. теңге, бұрынғы КСРО-ны қорғау, әскери қызметтің өзге де міндеттерін басқа кезеңде атқару кезінде жаралануы, контузия алуы, мертігуі салдарынан немесе майданда болуына байланысты мүгедек болған әскери бір қызметшіге 1 млн. теңге, бұрынғы КСРО-ның мемлекеттік қауіпсіздік органдарының және ішкі істер органдарының басшысы және қатардағы құрамның 30 адамына 100 мың теңгеден, ҰОС-қа қатысып, қайтыс болғандардың 21 жесіріне 30 мың теңгеден, бұрынғы КСРО кезінде тылдағы мінсіз еңбегі үшін орден және медальмен марапатталған және 22 маусым 1941-1945 жылдар аралығында тылда кемінде алты ай еңбек еткен бұрынғы КСРО-ның орден және медалімен марапатталмаған 990 тыл еңбеккерінің әрқайсысына 30 мың теңгеден біржолғы әлеуметтік көмек берілді.

– Біржолғы көмек демекші, өрттен зардап шеккен отбасыларына да көмек көрсетіледі ғой?

– Иә, Еңбекшіқазақ аудандық мәслихатының 2018 жылғы 23 ақпандағы «Еңбек-шіқазақ ауданының әлеуметтік көмек көрсетудің, оның мөлшерлерін белгілеудің және мұқтаж азаматтардың жекелеген санаттарының тізбесін айқындаудың қағидаларын бекіту туралы» 24-9 шешімінің талабына сәйкес «табиғи зілзаланың немесе өрттің салдарынан азаматқа, отбасына не оның мүлкіне зиян келтірілгенде отбасының өтініш берген айдың алдындағы тоқсанның жан басына шаққандағы орташа айлық табысы облыс бойынша ең төменгі күнкөріс деңгейіне бір еселік қатынас шектен аспайтын біржолғы әлеуметтік көмек көрсетіледі. Бүгінгі күнге өмірлік қиын жағдай туындаған, өрт салдарынан мүлкіне зиян келтірілгені туралы өтініш білдірген 2 отбасына әрқайсына 583 400 теңгеден 1,2 млн. теңге біржолғы әлеуметтік көмек төленді.

– Ауданда мүмкіндігі шектеулі қанша азамат бар? Оларға қандай көмек көрсетіліп жатыр?

– Бүгінгі күнде ауданда мүмкіндігі шектеулі 6466 азамат бар. Әлеуметтік қолдауды аса қажет ететін адамдарды қолдау мақсатында жеке оңалту бағдарламасы бойынша 978 ортопедиялық құралға 587 өтініш түсіп, бүгінде 549-ы мұқтаж жандарға жеткізілді. Сондай-ақ 104 сурдотехникалық құралға 62 өтініш түссе, оның 81-і табысталды. 124 тифлотехникалық құралға 45 өтініш берілсе, оның 99-ы алынды. 193 қоларбаға өтініш болса, тапсырыс беру үшін порталға оның 172-сі жіберілді. Оның 130-ы мұқтаж жандарға жетті. Сонымен қатар 8 электроқоларба берілді. 669 мүгедектен гигиеналық құралдар алуға өтініш қабылданып, 649-ына 72,4 млн. теңгенің тазалық құралы, 622 мүгедекке 17,0 млн. теңгенің көмекші құралдары берілді. Бұдан бөлек, мүмкіндігі шектеулі жандарға жеке көмекші қызметін көрсететін 385 қызметкерге жалпы сомасы 244,6 млн. теңге  және ымдау тілі қызметін көрсететін 4 маманға барлығы 8,6 млн. теңге төленді.

– Мүмкіндігі шектеулі жандардың санаторлық-курорттық пансионаттарда ем алуы қарастырылған ба?

– Әрине, бүгінде республикалық санаторлық-курорттық пансионаттарда ем алуға 897 мүгедектен өтініш қабылданып, 382 жолдама берілді.

– Ауданда мүмкіндігі шектеулі жандардың жұмыспен қамтылу деңгейі қандай?

– Ауданда мүмкіндігі шектеулі 165 адам орталыққа жұмыс іздеуші ретінде жүгінген. Олардың 63-і квота бойынша тұрақты жұмысқа жіберілді. Ал 52 азамат қоғамдық жұмысқа жұмылдырылса, 3 азамат әлеуметтік жұмыс орнына, 2 азамат жастар тәжрибесіне жіберілді, 4 азамат квотадан тыс тұрақты жұмыспен қамтылды.

– Аудандағы жалпы жұмыссыздық деңгейі қандай? Жыл басынан бері неше адам жұмыспен қамтылды?

– Аудандағы жұмыссыздық деңгейі 4,6 пайызды құрайды. Ал жыл басынан бері 4262 жұмыс орны құрылды, бұл пайыздық көрсеткіште 95,8 %. Осы 4262 жұмыс орнының 2619-ы – тұрақты жұмыс, ал 1755-і – уақытша жұмыс орны. 

– Жұмыссыздар қандай бағдарламалар негізінде жұмысқа орналаса алады?

– Жұмыссыздар «Еңбек» нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған мемлекеттік бағдарламасы аясында жұмысқа орналаса алады. Жыл басынан бері 2395 жұмыссыз тіркелген, оның ішінде қоғамдық жұмыспен 1475 адам, әлеуметтік жұмыспен 137 адам, жастар тәжрибесімен 884 адам қамтылды.

Сұхбаттасқан

Құралай МҰРАТҚЫЗЫ.