Өткен жылы облыс тұрғындарының 59%-іне, яғни 1,2 млн. адамның газға қосылуына мүмкіндігі туғызылды. Биылғы жылы тағы 23 елді мекенде осындай жағдай жасалып, көрсеткіш 61%-ке жетеді. Бұл туралы бүгін Нұр-Сұлтан қаласындағы Орталық коммуникациялар қызметі алаңында өткен брифинг кезінде Алматы облысының әкімі Амандық Баталов айтты, - деп хабарлайды Jetisy Media.
Өңір басшысының айтуынша, әзірге көгілдір отын жеткізілмеген бес аудан қалды: «Осы аудандарды газдандыру үшін «Талдықорған - Үшарал», «Шелек-Кеген» магистралды газ құбыры құрылысының жобалық-сметалық құжаттамасын аяқтаймыз. Құрылыс жұмыстары келесі жылдан басталады», - деді А. Баталов.
Сол сияқты спикер орталықтандырылған ауыз сумен қамту деңгейі республика бойынша алдыңғы қатарда екенін тілге тиек етті, яғни 98,3%, бұл 678 елді мекен қамтылды деген сөз. Биылғы жылы 7 ауылға су құбырын жүргізу есебінен бұл көрсеткіш 99,5% жеткізіледі, сол сияқты 11 ауылда ауыз су сапасы жақсартылады.
Баяндамашының сөзіне сүйенсек, жылдан жылға жол сапасы да жақсарып келеді, қазіргі кезде жақсы және қанағаттарлық жағдайдағы жергілікті маңыздағы жолдардың үлесі - 84%. Биылғы жылы 385 елді мекенде облыстық маңыздағы және ауылішілік 332 км жол жөнделеді, оған 33 млрд. теңге бөлінді.
Алматы облысының әкімі Амандық Баталовтың қолдауымен Талдықорғанда жерлесіміз, қазақстандық саясаткер Серікбай Нұрғисаевтың кітабының тұсаукесері өтті.
Салтанатты шараға облыс әкімінің орынбасары Ләззат Тұрлашов, мәдениет және зиялы қауым өкілдері қатысты.
"30 жыл Тәуелсіз елдің мемлекеттік қызметінде" атты шығармасы авторды Мемлекеттік қызметтің қыр-сырымен таныстырады, елдегі мемлекеттік қызметтің реформалары, Мемлекеттік қызмет саласындағы әлемнің озық елдерінің тәжірибесі, мемлекеттік қызметтегі жаңалықтар туралы әңгімелейді.
"Бұл кітап мен жазған екінші кітап. Біріншісі 10 жыл бұрын шыққан. Екеуі де мемлекеттік қызмет туралы болса да, бүгін мен бірінші шығарылымнан ерекшеленетін мүлдем басқа туындыны таныстырамын. 10 жыл ішінде мемлекеттік қызмет жүйесі өте өзгерді. Қазір жастардың уақыты, өзгеру уақыты. Егер жастар білікті мемлекеттік қызметші болғысы келсе, мансап құрғысы келсе немесе билік органдарының құрылымы туралы көбірек білгісі келсе — бұл кітап сіз үшін", - деді кітап авторы, "Парасат" және "Құрмет" ордендерінің иегері Серікбай Нұрғисаев.
Кітаптың өзі 500 данада шығарылды, сонымен қатар жақын арада интернетте еркін қол жетімді болатын электрондық нұсқа пайда болады.
Алматы облысында «Нұрлы жер» бағдарламасын жүзеге асыру жалғасуда, биылғы жылы 1 млн. шаршы метр тұрғын үй пайдалануға беріледі. Бұл туралы бүгін Орталық коммуникациялар қызметі алаңында өткен брифинг кезінде Алматы облысының әкімі Амандық Баталов айтты, - деп хабарлайды Алматы облысы әкімінің баспасөз қызметі.
Облыс басшысының сөзіне сүйенсек, «Жұмыспен қамту жол картасы» шеңберінде өңірге 105 млрд. теңге бөлінген, 20 мың жұмыс орнын құрған 1051 жоба жүзеге асырылды. Өткен жылы облыс бойынша 60 мың жұмыс орны ашылды.
Баяндамада айтылғандай, «Нұрлы жер» бағдарламасын жүзеге асыру жалғасуда, биылғы жылы 1 млн. шаршы метр тұрғын үй пайдалануға беру жоспарланған. 2603 пәтерлік 521 тұрғын үй салынып жатыр, соның 1212-сі көп балалы отбасыларға беріледі. Сонымен қатар жеңілдіктер қарастырылған «7-20-25», «Бақытты отбасы» және «Шаңырақ 5-10-20» бағдарламаларымен 1986 отбасы пәтерлі болады.
- Алматы облысында құрылыс саласында карантиндік шектеулерге қарамастан жұмыс қарқыны бәсеңдеген жоқ. Сол сияқты біз шағын және орта бизнес нысандарының жабылуы салдарынан орнынан босап қалған көптеген азаматты осы құрылыс саласында жұмыспен қамтыдық, - деді А. Баталов.
Алматы облысында шағын және орта бизнесте өндірілген өнім мен көрсетілген қызмет көлемі 11% өсіп, 1,8 трлн. теңгеге жетті. Сөйтіп, шағын және орта бизнестің жалпы ішкі өнімдегі үлесі 34% болып отыр. Бұл туралы бүгін Нұр-Сұлтан қаласында Президент жанындағы Орталық коммуникациялар қызметі алаңында журналистерге брифинг өткізген Алматы облысының әкімі Амандық Баталов айтты, - деп хабарлайды Алматы облысы әкімінің баспасөз қызметі.
Өңір әкімінің мәліметінше, облыста шағын және орта бизнес субъектілерінің саны 125 мың бірлікке, ал осы салада жұмыс істейтін адамдар саны 275 мың адамға жеткен. Өндірілген өнім мен көрсетілген қызмет көлемі 11% өсіп, ШОБ-тың жалпы ішкі өнімдегі үлесі 34% жетті. Оған Мемлекет басшысы Қасым-Жомарт Кемелұлы Тоқаевтың тапсырмасы бойынша қолға алынған салықтық жеңілдіктер, жалға алу төлемдерінен босату түріндегі шаралар оң ықпалын тигізген.
- Мысал ретінде айтсам, жылдың басында Талдықорған қаласында аз қамтылған және көп балалы аналарды жұмысқа тарту мақсатында тігін цехы ашылды. «Жетісу» ӘКК арқылы цехқа орын тауып, күрделі жөндеуден өткізіп, лизингіге құрал-жабдықтар сатып әпердік. Қазір бұл шағын фабрикада 17 әйел жұмыс істеп жатыр, соның 12-сі «Еңбек» бағдарламасымен оқыды. Мұндай мысалдар бізде аз емес, осындай ұсыныс-бастамаларды біз әрқашан қолдаймыз, - деді Амандық Баталов.
Биылғы жылы «Бизнестің жол картасы», «Еңбек» бағдарламалары мен «Жетісу» өңірлік қаржыландыру бағдарламасы аясында қаржыландыру көлемі 21 млрд. теңгеге дейін артқан.
Өңірде екі мыңға жуық субъектіге мемлекеттік қолдау көрсетіледі, 13 мың жұмыс орны құрылып, сақталады.
Сол сияқты облыс басшысы аймақта 430 нысанның «Ashyq» қосымшасымен жұмыс істейтінін атап өтті. Оның айтуынша, бұл сервисті тәулігіне орта есеппен 3 мың адам қолданады.
«Жалпы осы қабылданып жатқан шаралар кәсіпкерлердің бұрынғы жұмыс ырғағына көшуіне мүмкіндік береді деп сенеміз», - деді А.Баталов.
Алматы облысы әкімінің баспасөз қызметі
20-22 мамыр аралығында ауданымызда спорт ардагері Аманбек Саматов атындағы грек-рим күресінен 2006-2008 жылы туған жасөспірімдер арасындағы дәстүрлі ашық республикалық турнир өтті.Аталған додаға еліміздің әр өңірінен 270-тен астам балуан қатысып, 15 салмақ дәрежесінде боз кілемде бақтарын сынады.
Есік қаласындағы спорттық-сауықтыру кешенінде өткен күрес додасына Олимпиада чемпионы Юрий Мельниченко, халықаралық дәрежедегі төреші Ерік Жұмабеков, Қазақстан Республикасының еңбек сіңірген жаттықтырушысы Боранбек Қоңыратов сынды спорт саңлақтары құрметті қонақ ретінде қатысты.
Жарыс қатысушылары екі күн бойы өзара мықтыны анықтады. Соңғы ақтық кездесулер қызықты да тартысты өтті. Финалистер бар күшін салып бәстесті. Олар керемет әдістер мен жекпе-жектерді көрсетіп, грек-рим күресінің жанкүйерлерін сүйіндірді. Байрақты бәсекенің нәтижесі бойынша жалпыкомандалық есепте бірінші орынды жеті бірдей бас жүлдені қанжығалаған Алматы облысының бала балуандары иеленді. Екінші орынға тартысты өнер көрсеткен Жамбыл облысының балуандары жайғасып, үздік үштікті Түркістан облысының спортшылары түйіндеді. Аталған турнирге ауданымыздан 20 бала қатысып, Ислам Мерзаев (+80 кг) топ жарды. Ерасыл Фазыл (39 кг) үшінші орынды иеленді.
Ерзат АСЫЛ
Арманыңда, жаныңда жалын ән бар,
Жас талапкер, сөзіме көңіл аудар.
Бұрынғыдай күтпейді мектеп сені,
Бұрынғыдай соғылмас қоңыраулар.
Түлектердің көңілін толқытып, жүректеріне қимастық сезімін ұялатқан соңғы қоңырау мерекесі ауданымыздың барлық мектептерінде аталып өтті. 11 жыл бірге өскен құрбы-құрдастарымен, ата-анасындай болған ұстаздарымен қимай қоштасқан түлектер жаңа өмірдің шымылдығын ашты.
Осындай салтанатты мереке Шелек ауылындағы №1 гимназияда аталып өтті. Санитарлық талаптардың қатаң сақталуымен ұйымдастырылған салтанатты шараға округ әкімі Сәкен Абдихалиев, аудандық білім бөлімінің маманы Алма Ұзақбаева қатысып, үлкен өмірге қанат қаққан түлектерге сәт-сапар тіледі.
Жас түлектер осы күнге дейін талмай білім беріп, жетелеп-жеткізген ұстаздарына ризашылықтарын білдіріп, ән-жырын арнады. Сыныптастарына ақ тілектерін айтып, қоштасу вальсін биледі.
Гимназия директоры Ардақ Қырықбайдың айтуынша, бүгінде №1 гимназия білім саласы бойынша көш басында келеді. Былтырғы жылғы 44 түлектің 40-ы грант иегері атанған. Оның ішінде 2 алтын белгі иегері мен 18 үздік аттестат бар.
2020 жылдың қараша айында мектепке гимназия дәрежесі берілген болатын. Гимназия оқушылары биылғы оқу жылында үздік білім сапасын көрсетті. Яғни мектеп бойынша бітірген 658 оқушының, 184-і үздік, 251-і оқу екпіндісі атанып отыр. Биыл гимназияның мектеп бітіруші 29 түлегінің 3-еуі алтын белгіге, 1 түлек үздік аттестатқа үміткер. Ауданда оқу сапасы бойынша бірінші орында, 74,2% құрайды.
Айта кетейік, биылғы жылы ауданымыздағы 84 білім беру ордаларында 52 916 оқушы бар. 2 041 бала жас түлек атанып, алтын ұямен қоштасты.
Ілия СҰЛТАН
ҚР Тәуелсіздігіне 30 жыл толса, ҚР Қарулы Күштерінің құрылғанына 29 жыл болды. 1992 жылдан бері Отан қорғаушылар күнін мерекелеу ерекше мәнге ие. 2015 жылы ҚР Қарулы Күштерінің құрылғанына 20 жыл толуына байланысты талантымен танылған журналист марқұм Б.Құранбек Алматы қаласында өткен «Айтуға оңай» бағдарламасына шақырумен барған Әсет аға Еңбекшіқазақ ауданындағы әскери патриоттық тәрбиенің жоғары деңгейде екенін республикаға таныстырды. Сол жылы Әсет аға Қорғаныс министрі армия генералы М.Алтынбаевтың «ҚР Қарулы Күштеріне 20 жыл» мерекелік медалімен марапаталды.
2017 жылы Талдықорған қаласындағы Жетісу телеарнасының тілшілері Ащыбұлақ аулына келіп сыр-сұхбат алды. Шақырумен ҚР Қарулы Күштеріне 25 жыл толуына байланысты Талдықорған қаласында өткен әскери жиында Әсет ағаның іс-тәжірибесін, жеткен жетістігін Жетісу телеарнасы облысқа таратты. Өзі істеген А.Н.Бубенцов мектебінде бірінші болып, екі рет облыстық семинар жиын өткізді. 2013 жылыдан зейнеткер ағамыз медколеджде, Қазақстан мектебінде, аудан мектептерінде кейінгі жеті жылда ҚР танымал тұлғалармен 18 кездесу өткізіді. АӘД пәнінің жоғарғы санатты ұстазы запастағы капитан Әсет Көшербайұлы ағамызды аудан, облыс, республика ұстаздары жақсы таниды. ҚР Тәуелсіздік күніне байланысты Талдықорған қаласында өткен жиында ТМД елдеріне ортақ «Ұлы жеңіске 75 жыл» толуына байланысты Ресей Федерациясы Президенті атынан келген мерекелік медалімен бірге «Алғыс хатты» Әсет Көшербайұлына Алматы облысының Қорғаныс істер жөніндегі департаментінің бастығы полковник Талғат Даулетқанов табыстады. Алматы қаласындағы «Бейбітшілік Әлемі» Халықаралық Қазақ Творчестволық Бірлестігінің президенті «АБАЙ» орденін тақты. Өрлеу ОБЖИ-ның, Талдықорған қаласындағы облыстық ақсақалдар алқасының «Алғыс хаттарымен» де марапатталды. Еңбекшіқазақ ауданы әкімінің, «Нұр Отан» партиясы, аудандық қорғаныс істер бөлімінің, Отан қорғаушылар күні аудандық, облыстық кәсіподақтың бағалы сыйлықтарымен грамоталарымен марапаттады.
Аудан әкімі Әлібек Жақанбаевтың қабылдауында болған Әсет ағаны аудан басшысы балаларға әскери патриоттық тәрбие беруде жеткен жетістіктерімен құттықтап, 70-тен асса да аттан түспей, көлігін өзі жүргізіп облыс аудандарындағы ұстаз, оқушылармен кездесуден қашпайтын, аудан жастарын әскери патриоттыққа, отансүйгіштікке тәрбиелеу жолындағы үлкен еңбегі үшін алғысын айтты.
Серік Надырбаев,
«Алматы облысы білім беру мекемелер қызметкерлерінің
жергілікті кәсіптік одағы» қамқорлық бірлестігінің төрағасы
Бір аптада (18.05 – 24.05.2021 аралығында) Еңбекшіқазақ ауданында ПТР сынама арқылы 54 адамнан коронавирус анықталды. Олар:
Есік – 8
Шелек – 5
Тескенсу – 5
Достық – 5
Қайназар – 4
Қырбалтабай – 4
Қазақстан – 3
Бәйдібек би – 2
Бижанов – 2
Ащысай – 2
Байсейіт – 2
Сатай – 2
Түрген – 1
Балтабай – 1
Қаратұрық – 1
Ақбастау – 1
Ақши – 1
Малыбай – 1
Бәйтерек – 1
Қайрат – 1
Тауқаратұрық – 1
Рахат – 1
Тіркелген науқастардың әлеуметтік-кәсіби мәртебесі төмендегідей:
23 науқас – жұмыссыз
14 науқас – зейнеткер
7 науқас – ұйымдаспаған бала
5 науқас – түрлі жеке кәсіпорындарда жұмыс істейді
5 науқас – мектеп оқушысы
Мәлімет Еңбекшіқазақ аудандық санитарлық-эпидемиологиялық бақылау басқармасынан алынды.
Екі жылдың ішінде COVID-19-дан жер жүзінде 3,5 млн-ға жуық жан көз жұмды. Дертті жұқтырғандар саны 168 млн-нан асты. Өкінішке қарай, әлемдегі жағдай тұрақсыз. Ал Қазақстанда 25 мамырдағы жағдай бойынша COVID-19 оң нәтижесімен 376 572 және теріс нәтижемен 54 176 науқас тіркелген. Осылайша жалпы алғанда «сары» аймақтамыз.
Десе де, республика ішіндегі көрсеткіштер бойынша бүгінде Нұр-Сұлтан мен Алматы қалалары және Ақмола, Қарағанды, Атырау облыстары әлі де «қызыл» аймақта тұр. Батыс Қазақстан облысы «қызыл» мен «сары» аймақтың арасында болса, Ақтөбе, Павлодар, Қостанай, Маңғыстау, Солтүстік Қазақстан облыстары мен Шымкент қаласы «сары» аймақта.
Премьер-Министр Асқар Маминнің төрағалығымен өткен Үкімет отырысында ҚР денсаулық сақтау министрі А.Цой еліміздегі сырқаттанушылық деңгейінің біршама төмендегенін, эпидемиологиялық жағдайдың біртіндеп тұрақтанып келе жатқанын айтты. «Жалпы, соңғы айда аурушаңдылық 20%-ға төмендеді. Егер стационарлық науқастар туралы айтатын болсақ, өңірлер бөлінісінде төсек орындардың күнделікті пайдаланылу мониторингіне сәйкес осы жылғы 25 мамырдағы жағдай бойынша республика бойынша инфекциялық төсек-орындарды қамту 33%-ды құрайды және биылғы мамырдың басымен салыстырғанда 8%-ға төмендеді, реанимациялық төсек-орындардың қамтылуы 2%-ға төмендеді және 26%-ды құрайды. Сондай-ақ Нұр-Сұлтан қаласында төсектердің толуының оң динамикасы байқалады – мамырдың (4 мамыр) басымен салыстырғанда төсектердің пайдаланылуының үлес салмағы 60%-дан 47%-ға дейін, Алматы қаласында 57%-дан 35%-ға дейін және Алматы облысында 56%-дан 36%-ға дейін төмендеді» деген министр емделіп жатқан науқастар санының айтарлықтай азайғанын айтты. Сондай-ақ сауығып шығып жатқан азаматтардың тәуліктік саны тәулігіне ауру анықталып жатқан науқастардан көбейіп келетінін де жақсылыққа балады.
Елдегі эпидемиологиялық жағдайдың біршама жақсаруына жаппай вакциналаудың да оң әсерін тигізіп жатқаны анық. Министрдің есебінше, бүгінде COVID-19-ға қарсы вакцинаның шамамен 3 млн дозасы пайдаланылған екен. Оның ішінде 1-компонентті 2 015 053 адам салдырған. Бұл көрсеткіш – вакцина алуға жататын халықтың 20 %-ы. Ал екінші компонентті салдырған адам саны 1 млн-ға жуықтапты. А.Цойдың айтуынша, бүгінгі таңда егу пункттерінде вакцина дозаларының жеткілікті қоры бар: бірінші компонент — шамамен 320 мың және екінші компонент — 650 мың. Спутник V вакцинасының қосымша 1,7 млн дозасы Қарағанды фарм кешенінде өндірілген және кестеге сәйкес өңірлерге жеткізілетін болады.
Елдегі жағдайға кеңінен тоқталған министр эпидемиологиялық жағдайдың болжамын жаңартты. «Мәселен, вакцинациялаудың тиімділігі 60%-дан кем болмайтын пессимистік сценарий кезінде 2021 жылғы маусым-қыркүйекте тіркелген жағдайлардың саны 95 мыңға жуық адамды құрайды», – деген А.Цой: «Екінші реалистік сценарий бойынша вакцинациялаудың тиімділігі кемінде 80%-ды құрайтын болса, 2021 жылғы маусым-қыркүйекте тіркелген жағдайлардың болжамды саны шамамен 69 мың адамды құрайды. Вакцинациялаудың тиімділігі 95%-дан кем болмайтын оптимистік сценарийде 2021 жылғы маусым-қыркүйекте тіркелген жағдайлардың саны шамамен 61 мың адамды құрайды. Бұл ретте, қандай да бір сценарийдің іске асырылуы азаматтардың вакцинация мәселесіндегі белсенділігіне тікелей байланысты болатынын атап өткен жөн. Осыған байланысты, вакцинациямен қамтуды арттыру үшін жергілікті атқарушы органдарға вакцинациямен қамтуды ұлғайту және халық арасында ақпараттық-түсіндіру жұмыстарын жүргізу бойынша шаралар қабылдау қажет деп санаймыз», – деді.
Осы орайда Үкімет басшысы Асқар Мамин: «Қазіргі таңда егу науқанын кеңейту – пандемиямен күресудегі ең маңызды міндет», – деп атап өтті.
Министр айтқандай-ақ, жағдайдың біршама жақсарғанын өзіміз де апта сайын жүргізетін аудандық статистикамыздан көріп отырмыз. Мысалы, сәуір-мамыр айының бас кезінде жұқтырушылар саны ауданда аптасына 200-ден асып кетіп еді. Енді, міне, мамыр айының 18-24 аралығында COVID-19-ды жұқтырған жерлестеріміздің саны 54-ке түсіпті. Жалпы, ауру белең алған былтырғы көктемнен бері Еңбекшіқазақ ауданының 2585 тұрғынында індет зертханалық расталған. Ал бүгінге дейін 2449 жан аурудан сауығып шыққан, яғни жұқтырғандардың 94,3%-ы.
Вакцинаға келсек, коронавирусқа қарсы егу жұмыстары ауданымызда 2021 жылдың 2 сәуірінен басталды. 25 мамырдағы жағдай бойынша «Спутник-V» вакцинасының 1-компонентімен ауданның 21 150 тұрғыны егілсе, 2-компонентін салдырғандар саны – 13 320. «Hayat Vax» вакцинасының 1-компонетімен ауданның 3136 тұрғыны егілді.
Қ.МҰРАТҚЫЗЫ
Келер жылдан бастап учаскелік инспектордың жалақысы тағы 30 пайызға, ал көмекшілерінің жалақысы 7 пайызға артады. Бұл туралы ҚР ІІМ Әкімшілік полиция комитетінің төрағасы Мұрат Баймұқашев айтты.
«Үздік қызметкерлерді іріктеу үшін кандидаттарға қатысты біліктілік талаптары, оның ішінде бос жұмыс орнына орналастыруға қойылатын талаптар күшейтіліп жатыр. Сондықтан 2019 жылы учаскелік инспекторлардың жалақысы 25 пайызға артты. Биыл жыл басынан олардың көмекшілерінің жалақысы 30 пайызға өсті. Қазіргі кезде учаскелік инспектордың жалақысы 177-266 мың теңге аралығында», - деді комитет басшысы Орталық коммуникациялар қызметінде.
2019 жылдың шілдесінен учаскелік инспекторға тұрғын үйді жалға алғаны үшін өтемақы төленіп келсе, биыл 1 қаңтардан бұл тізімге учаскелік инспектор көмекшісі де енген екен.
«Осы жылдың сәуірінен бастап олар осы баспана төлемдерін тұрғын үйді жекеменшікке алу үшін пайдалана алады. Яғни төлемдерді бөліп төлеу немесе ипотекалық несиелеу бағытына қатысу мүмкіндігі бар», - деді Мұрат Баймұқашев.
mezet
Ел премьер-министрі Асқар Мамин тиісті қаулыға қол қойды. Нәтижесінде Түркістан өңірінің аумағы шамамен 796 гектарға ұлғайды. Осы орайда жергілікті мәслихат өкілдері Үкіметке шекараны өзгерту туралы ұсыныспен шыққан. Бұған дейін Бағыс пен Хиебон дербес ауылдар болған. Елді мекен тұрғындарының жартысы Қазақстан, ал қалғаны Өзбекстан азаматтары. Қос мемлекеттің келісім бойынша енді бұл жерлер біздің елдің аумағына кірді.
Мәдениет және өнер қызметкерлері күнінде аудандық кітапханада керемет кездесу өтті. Онда кітапхана қызметкерлері оқушыларға еліміздің мәдениеті мен өнеріне бір кісілік еңбегі сіңген жерлесіміз – Шәрбану Құмарова жайында кеңінен ақпарат беріп, шығармаларымен таныстырды.
Шәрбану Мұхитқызы – көрнекті қаламгер, еңбек жолын «Социалистік Қазақстан» газетінде бастаған, бірнеше БАҚ пен баспада жұмыс істеген белгілі журналист, кинематографияда аға редактор, театрда әдебиет бөлімінің меңгерушісі болған, Қазақстанның еңбек сіңірген қайраткері, Халықаралық «Алаш» әдеби сыйлығының лауреаты, «Құрмет» орденінің иегері. Есік қаласының тумасы екі жыл бұрын өмірден озды.
Дегенмен, аудандық кітапханада жазушының 85 жылдығына орай өткен кездесу жақсының аты, ғалымның хаты өлмейтінін тағы бір дәлелдегендей-ақ. Кездесу барысында кітапхана қызметкерлері оқушылармен BookDating өткізіп, Шәрбану Құмарованың «Сезім патшалығы» романын талдап-талқылады. Шығарманы алдын ала оқып келген балалар ондағы оқиға желісін үлкен қызығушылықпен баяндап, автор мен кейіпкерлердің іс-әрекеті мен мінез-құлқына өз бағаларын беріп, талқылауда үлкен белсенділік танытты. Кітапханада өтетін мұндай іс-шаралар оқушылардың кітапқа қызығушылығын арттырып, оқу-білімге ұмтылтары хақ.
Құралай МҰРАТҚЫЗЫ
Кез келген ұлттық мәдениеттің бет-бейнесі болады. Сол бет-бейне – ұлттық бірегейліктің көрінісі. Ата-бабаларымыздан қалған ұлттық ойындар спорт деңгейінде емес, кезінде мәдениет биігіне көтерілген еді. Сол мәдениет қазақ өркениетінің өзегі болатын. Ал қазір біз ата-бабадан қалған сол мұраларды сақтап, әрі қарай жаңғыртып отырмыз ба? Қазақ балаларының ұлттық ойындарға деген қызығушылығы қандай?
Жамбы ату – қазақ халқының көнеден келе жатқан ұлттық ойыны. Жамбы ату үшін мергенге жүйрік ат пен садақ керек. Жамбы алтыннан немесе күмістен құйылады. Ойыншы атпен шауып келе жатып, нысанын садақпен атып түсіреді. Мұндай жаттығулар көшпенділердің әскери күш-қуатын жетілдіріп отыру үшін ауадай қажет болған.
Жалпы, жамбы ату ойыны – қазақ халқында кең тараған мергендік сынның бір түрі. Атпен шауып келе жатып жігіттер екпінін бәсеңдетпестен құрулы бақан үстіндегі нысананы атып құлатуы тиіс болған. Ереже бойынша жігіттер сөреде өз сәйгүліктерінің жанында болады. Төреші белгі берісімен олар аттарын тез ерттеп, шаба жөнеліп, жолындағы нысаналарды атып құлатуы керек. Төрешілердің ұйғарымы бойынша нысаналар бірнешеу болады. Кермеде жылқының қылынан жасалған жіңішке арқанға асылатын күміс дискті «жамбы» деп атайды. Ойын қатысушылары атпен шауып келе жатқанда оны қағып түсіру керек. Кімде-кім аз талпыныстан кейін жамбыны қағып түсірсе, сол жеңімпаз атанатын болған.
Қазір уақыт басқа. Қазақ халқының ұлттық спорт түрлерінің ережелерін де қайта қарап, заман талабына сай ұлттық ойындар өзгеріске ұшырап отыр. Қазақтың ұлттық «Жамбы ату» ойыны 18 ғасырға дейін жасөспірімдер үшін міндетті болған. Садақпен дәл ату үшін жүргізілген байқаулар көшпенділердің мергендік қабілеттерін жақсартуға көмектесіп, өздерінің бапта болуын және дәстүрді үзбей қолдап тұруларына ықпал еткен. Жамбы ату ұлттық ойнын қайта жаңғыртушылардың – бірі Алдияр Нұрғазиев. Оның республика көлемінде бапкерлігін білмейтін жұрт кемде-кем. Жамбы ату ұлттық ойнын Корей еліндегі семинарда қорғап шыққан ағамыз Алдияр Нұрғазиевтің үлесі зор. Осы ағамыздың арқасында ұлттық ойнымызды дәріптеуге мүмкіндік алып отырғанымыз шындық.
2020 жылдың қазан айында «Талдықорған қаласының Ұлттық және ат спорт түрлерінен мамандандырылған балалар мен жасөспірімдер спорт мектебі» коммуналдық мемлекеттік мекемесіне барып, өз мектебімізден «Жамбы ату» ұлттық спорт түрін ашып, қоғамдастық құруға рұқсат алдық. Еңбекшіқазақ ауданы, Қазақстан ауылындағы Жүнісбай Қайыпов атындағы орта мектептің 5-9 сынып оқушылары жамбы ату ұлттық ойнын үйренуде.
Қазіргі таңда үйірмеде 20 оқушы бар. Әр жаттығу сайын оқушыларымыз садақ атудың қыр-сырымен танысып, қызығушылықтары артуда. Садақ атудың ерекшелігі басқа спорт түрлеріне қарағанда адамның қырағылығына, жылдам шешім қабылдауына, аттың үстінде емін-еркін отыруына, шапшаңдыққа тәрбиелейді.
Рухани жаңғыру жылдарында ұлттық ойындарымыз арқылы сана-сезімімізді оятсақ, Тәуелсіздігіміздің жарқын бейнесі емес пе? Тәуелсіздігіміздің 30 жылдығы қарсаңында «Жамбы ату» үйірмесіндегі оқушыларымыз Жетісу телеарнасына түсіп, Түрген шатқалында «Қыран» дәстүрлі аңшылық орталығында өз өнерлерін көрсетті. Атап айтсақ, Жолдас Әділхан, Мәдияр Шәріпбай, Нұрдәулет Нұрахмет, Ислам Нүсіп, Ибрагим Нұрәлім сияқты оқушыларымыз өз мергендіктерімен көзге түсті. Бұл оқушылар – біздің ата-бабамыздың ұлттық ойындарын қайта жаңғыртатын жасампаз жастар. Болашақта олар облыстық, республикалық халықаралық бәйгелердің жеңімпаздары болатынына сеніміміз мол.
Саржан БАЙКЕН,
Ж.Қайыпов атындағы орта мектептің
дене шынықтыру пәнінің мұғалімі, Қазақстан ауылы
Сонау ежелгі заманнан бері батыс пен шығысты тоғыстыратын керуен жолдың бойына орнығып, шартарапқа өркениеттің шам-шырағын жаққан шаһарлар қаншама. Өйткені жол – халық қажет ететін тауар тасымалының тамыры, өркениет ағысының өзені. Бүгінде әлемдік нарықтың айналысы теңіз жиегіндегі порттардың экономикасына тебін берумен бірге құрлықтағы күре жолдың да маңызын күн санап арттырып келеді. «Жол жағалаған жоғын табады» демекші, жақында халықаралық және республикалық маңызы бар күре жолдың жиегінде қоныс тепкен ауданымыздағы іргелі елді мекеннің бірі Бәйдібек би ауылдық округінің бүгінгі тыныс-тіршілігімен танысып қайтқан едік.
Қарқынды қадам
Бүгінде ауданымызды өзге өңірлермен жалғайтын күре жол ауылдық округ экономикасының күретамырына айналған. Ертелі-кеш толас таппайтын көлік керуені жол бойын жағалай мекендеген Бәйдібек би ауылының тіршілігіне тыңнан серпін беруде. Дамылсыз жөңкілген жүргіншілерге қызмет көрсететін сауда нысандары мен дәмханалар бұл округте шағын және орта бизнестің қарқынды дамып келе жатқандығын аңғартады. Осыған орай ауылдық округтің тұрақты тұрғын саны да артуда. Округтің тыныс-тіршілігін таныстырған әкім Ержан Әмірденов ең алдымен өткен жылғы экономикалық өсім мен тындырылған жұмыстарды тіліне тиек етті.
– Округ бойынша 205 шаруа қожалықтары тіркелген, 2020 жылдың қорытындысы бойынша, ауылшаруашылығының өнім көлемі 4,6 млрд теңгені құрады. Оның ішінде 2020 жылы алма бақ жерлері 1300 гектардан асып, өнім құны 4,2 млрд теңгені құрап, 2019 жылдан 38,7 пайызға артты. 2020 жылы Бәйдібек би ауылының ағымдағы жол жөндеу жұмыстары аясында 23 млн теңгеден астам қаржы бөлініп, 7720 шаршы метрді құрайтын Ж.Зорманов көшесі асфальтталды. Ауылдық округ бойынша көпқабатты үйлердің аулаларына жалпы сомасы 5 млн 600 мың теңгеге балаларға арналған үш алаң салынды. Абаттандыру бойынша 1 млн 500 мың теңге, жарықтандыруды қамтамасыз етуге 4 млн теңге және санитарлық тазалау жұмыстарына 1 млн 600 мың теңге бөлініп, барлық қаражат толықтай игерілді. Ағымдағы жылы бұл бағытқа 30 млн теңге бөлініп,абаттандыру мен жөндеу жұмыстары жалғасады, – дейді Ержан Әмірденұлы.
Жасыл бақтар жайқалған
Бүгінде алма шаруашылығы округэкономикасының тірегі саналады. Сондықтан бұл аумақта алма бағын өсіріп, өңір экономикасының әлеуеттенуіне жол ашқан шаруа қожалықтары жетерлік. Солардың бірі «Алдажаровтар» шаруа қожалығы. Өткен жылы аталған шаруа қожалығы 150 гектарға жуық алма бағынан 2500 тонна өніп алыпты. Бүгінде шарауа қожалығы 22 адамды тұрақты жұмыспен қамтыса, жиын-терін кезінде жүзден аса адам еңбекке тартылады екен.
– Қазір бізде алманың сегізге жуық түрі өсіріледі. Жақсы өнім беретін алма сұрыптарын жетілдіру мен алма бақты суару технологиясын жаңалауға басымдық беріп келеміз, – дейді шаруа қожалығының иесі Саида Алдажарова.
Өнер өрінде, табыс төрінде
Бәйдібек би ауылындағы мәдениет ошағы бүгінде округ руханиятының ордасына айналған. Аталған өнер ордасы 2018 жылы мәдениет үйлері арасында өткізілген облыстық «Ауылым – алтын бесігім» атты байқауда «Үздік мәдениет үйі» номинациясын жеңіп алған.Сонымен бірге «Самғар» ұлттық би тобы 2019 жылы Алматы қаласында өткен халықаралық байқаудың бас жүлдесін жеңіп алған.
– Өткен жылы Ұлттық домбыра күні мен Абай Құнанбаевтың 175 жылдығына арналған онлайн концерттер өткізідік. Ал биыл жыр алыбы Жамбылдың 175 жылдық мерейтойына орай мәдени іс-шаралар ұйымдастыруды жоспарлап отырмыз. Біздің көптеген іс-шаралармыз өнер ордасының әлеуметтік парақшасында тікелей көрсетілім арқылы өз көрермендеріне жол тартып келеді, – дейді мәдениет үйінің көркемдік жетекшісі Рахат Әлқожа. Бүгінде аталған мәдениет үйінде ән және би, домбыра, қолөнер, «Әжелер» тәлім шежіре отауы сынды үйірмелер ауыл руханиятына нәр беріп келеді. Округтегі өнерпаздар өздерінің толағай табыстарының толыға түсеріне сенімді екендіктерін айтады.
Көп тілегі – көпсалалы емхана
Бәйдібек би ауылдық ауруханасында бүгінде 46 адам толық штатта қызмет атқарады. Аталған аурухананың 15 орынға арналған терапия және жаңа ашылған невралогия бөлімдері бар. Аурхана мамандарының сөзінше 2020 жылы 14200 адам стационарлық ем, ал 1200 адам амбулаторлық ем қабылдаған. Ал ауыл тұрғындары елдімекенге көпсалалы емхана керектігін жиі айтады.
Кәсіпкерлерге қолдау зор
Округ аумағындағы тұрғындарды «Еңбек» бағдарламасы арқылы жұмыспен қамту және кәсіп ашқысы келетіндерге әкімдік тарапынан қолдау көрсету ешқашан назардан тыс қалған емес. Әкімдік мәліметтеріне сүйенсек, 2020 жылы округте «Нәтижелі жұмыспен қамту және жаппай кәсіпкерлікті дамыту» бағдарламасына 57 адам қатысып, 8 адам қайта даярлау оқуларына жіберілген. 2 адам жастар тәжірибесіне жолдама алыпты. Сонымен бірге өз кәсібін дамытуға талпынған 4 адамға жалпы 13 млн 800 мың теңге несие беріліп, 38 ауыл тұрғыны қоғамдық жұмыстарға тартылған. «Атамекен» Ұлттық кәсіпкерлер палатасының бастамасымен өңірлердегі қаржылық сауаттылықты арттыру, жаңа бизнес көздерін ашу, халықтың әл-ауқатын жақсарту мақсатында «Бастау Бизнес» жобасы аясында кәсіпкерліктің негіздері бойынша тегін семинарларларды тәмамдаған 5 ауыл тұрғыны арнайы гранттарға ие болған.
Бүгінде округ аумағында 400-ге жуық жеке кәсіпкер тіркелген.Тоғыз жолдың торабында ірге тепкен ауылдың сауда-саттықпен айналысқысы келетіндерге берер мүмкіндігі мол. Нұрсұлтан Сейітжанов осыдан үш жыл бұрын құрылыс материалдарын сататын шағын дүкен ашып, кәсіп бастапты. Бүгінде жас кәсіпкердің шағын дүкені аумағы 500 шаршы метрден асатын сауда орталығына айналған. Ол қазіргі таңда құрылыс материалдарына сұраныстың жоғары екендігін, болашақта сауда көлемін ұлғайтқысы келетіндігін айтады.
Округ әкімдігінің мәліметіне сүйенсек, 2020 жылы әлеуметтік қолдауды қажет ететін азаматтарға барынша қолдау көрсетілген. Айталық, 279 көпбалалы отбасылары, 138 алтын алқа және күміс алқа иегерлері және 34 тыл ардагерлерін қамтыған жалпы 2 236 адамға 1 млрд 520 млн 896 мың теңге көлемінде әлеуметтік көмек көрсетілген.Сонымен қатар «Nur Otan» партиясының қолдауымен 2020 жылы коронавирус пандемиясына байланысты, округ бойынша жағдайы төмен 237 отбасына бір реттік 50 000 мың теңге көлемінде ақшалай көмек берілген.
Қашықтан оқытудағы үздік нәтиже
Округтегі іргелі оқу орындарының бірі Н.Островский атындағы орта мектепте 1357 оқушы білім алады, 112 ұстаз тәлім береді. Бұл оқу ордасы бұдан бұрын да сан мәрте үздік атанса, бүгінде сол қарқыннан жаңылар емес. Аталған мектеп қашықтан оқытуда республика бойынша алда келеді. Онлайн мектеп платформасындағы бұл жетістікті мектеп ұжымы өздерінің кәсіби шеберіліктерімен байланыстырады. Өңірдегі Т.Әубәкіров атындағы орта мектептің оқушылары да облыстық және республикалық додаларда топ жарып жүр. Демек бұл мекеннен болашақтың дарынды ұл-қыздары түлеп ұшатынына сенім мол.
Бәйдібек би ауылындағы100 бүлдіршінге арналған «Нұршуақ» балабақшасында қазіргі уақыт-та 92 балдырған тәрбиеленуде. Мұнан өзге жеке меншіктегі 4 балабақша 200-ге жуық бүлдіршін болашағының іргетасын қалауда.
Жарық көше, жаңа жолға қол жетсе...
Өңір жұртшылығын жыл сайын артып келе жатқан экономикалық және демографиялық өсім қуантады. Әрине, халық бар жерде қажетсіну бар. Қоғамдасқан өмірде қордаланған мәселелердің болатыны шындық. Осындай шешімін күткен түйткілдің түйініне округ басшысы арнайы тоқталды.
– Жалпы округ бойынша ұзындығы 42,7 шақырымды құрайтын 41 көше болса, қазіргі таңда оның 5 шақырымы ғана немесе 11,7 пайызы жарықтандырылған.Қазір Алмабеков, Васильев, Сейфуллин сынды 11 көше жарықтандыру жұмысына өтінім бердік.Сонымен қоса, маңызды ішкі жолдардың түйілісіне бағдаршам орнату, орталық көшелерге арық жүйесін салу, ескірген құбыр жүйелерін жаңалау сынды өз шешімін күткен мәселер бар, – дейді округ әкімі Ержан Әмірденов.
Татулықтан тәтті сый бар ма?!
Статистикалық деректерге үңілер болсақ, округте 18 ұлт пен ұлыс өкілі өмір сүруде. Көпұлтты округте тұрғындар бір атаның балаларындай тату-тәтті күн кешуде. Сонымен қоса этнос белсенділерімен өңірдің тұрақты дамуына мүмкіндік беретін түрлі мәселелер талқыға салынады. Татулық пен ынтымақты ту еткен ауылдағы этностар бір жағадан бас шығарып, жаңа мешіттің қабырғасын қалай бастаған. Мұндағы ауыл тұрғындары бәрін ізгілік пен бірілікке шақыратын тағы да бір ғибадат үйінің жастар тәрбиесінде маңызды рөл атқарарына сенімді.
ТҮЙІН:
Бәйдібек би ауылдық округі топырағында түтін түтеткендерді саясына алған мәуелі бәйтеректей бұтағын кеңге жайып, тамырын тереңге тартып келеді. Ондағы жұртшылықтың тірлігіне тың серпін беретін мүмкіндіктер жеткілікті, экономикалық өсім де көңіл қуантады, тұрғындардың татулығы да тамаша. Жаңа өмірге талпынған ауыл жұртшылығы жарқын болашаққа сеніммен қарайтындығын сезіндік. Ондағы көптің көкейінде жаңа әлеуметтік нысандар мен жарық көшелерге деген сұраныс барын байқадық. Берекесі жарасқан, белестерден ары асқан елдімекеннің келер күні толағай табыстарға толы боларына сенім артып қайттық.
Ерзат АСЫЛ